Al secont mandât a palaç Belgrât, za vice president dal Consei provinciâl, dopo une lungje esperience come Sindic di Maian (dal 1988 al 2001), Adriano Piuzzi al à cjapât sù l’impegn di stâ daûr des politichis sociâls deventant tal 2006 assessôr. Lu vin sintût in ocasion di une impuartante iniziative adun cu la Aido (Associazion taliane pe Donazion Orghins, Tiessûts e Celulis).
Cualis sono lis carataristichis di cheste iniziative?_ “E je une campagne di sensibilizazion pe donazion: il materiâl (3000 volantins) al sarà distribuît in ducj i comuns e tes Asl. O vin ancje lavorât in maniere atente par contignî i coscj e di chest o scuen ringraziâ i dipendents provinciâi: la stampe e je stade fate de tipografie interne de Provincie e o vin vût ancje la colaborazion dal servizi comunicazion e dal servizi pes identitâts linguistichis.
Une conferme dal impegn de provincie pes associazion…_ “Sì, il rûl des associazions al è fondamentâl te nestre societât. Chest progjet al è stât fat cu la Aido, ma mi plâs ricuardâ che a Dicembar dal 2006, par esempli, o vin sostignût in maniere convinte e determinante lis celebrazions dai 30 agns di fondazion de Ado (associazion donatôrs di orghins), une altre impuartante realtât che tal stes cjamp e opere sul teritori cun grant sucès. E no mancjaran ancje altris ocasion par cirî di premiâ chei che cun tante buine volontât e tante passion si metin al servizi de nestre int”.
Par cheste campagne al è ancje un element in plui, vere?_ “Sì, o vin doprât dome la lenghe furlane e lis motivazions a son semplicis: o sin convints che la marilenghe al sedi un otim mieç par veicolâ chest impuartant messaç che al rivuarde la donazion. Dal sigûr une maniere plui fuarte e incisive par jentrâ tes cjasis des nestris comunitâts”.
Cuâl isal il valôr de donazion?_ “O vivìn intun mont li che la disgregazion no fâs plui notizie, dulà che l’egoisim al semee che si sedi sostituît ai valôrs che a àn fat grant il nestri paîs. Ta chest contest al è straordenari che une vore di int e vedi fat de donazion une reson di vite”.
Ancje Adriano Luci lu à capît e lu à dimostrât…_ “Ancje se al à declarât che e je une sielte personâl, nol pues scjampâ che cheste persone e je a cjâf de Associazion dai Industriâi de nestre provincie e duncje chest at al à un valôr in plui. Mi à fat une vore di plasê di sintî che Adriano Luci al desiderarès che il so esempli al vedi un seguit: e chest i fâs onôr”.
Prossins impegns?_ “L’impegn prioritari al è la promozion de culture de solidarietât, cence pierdi di viste la impuartance de prevenzion. Di fat e je nestre intenzion di promovi traviers cunvignis e publicazions stîi di vite che a vedin come obietîf di evitâ che in cierts câs la uniche rispueste al sedi il traplant: par esempli o vin intenzion di fâ une campagne informative par une alimentazion sane e naturâl, ma ancje di combati i abûs dai alcolics e des droghis”.
::::::::::::::::::::::::::::::::::::::::::::::::::::::::::::::::::::::::::::::::
CARTULINIS
GREGORICCHIO SU ONDE FURLANE
Vie par dute la istât, Radio Onde Furlane e trasmetarà il radiodrame di Gianni Gregoricchio «Îr e doman», che al vincè une edizion dal premi leterari «Sant Simon» di Codroip. La opare, realizade tai agns Otante dal stes autôr, e larà in onde il lunis, il miercus e il vinars aes 10 e mieze di matine. Une biele iniziative par memoreâ Gregoricchio, il grant autôr che nus a lassâts tal mês di Zenâr stât.
IL TIMP IN MARILENGHE
L’Osmer (Osservatori meteorologjic regjonâl de Arpa) dal Friûl Vignesie Julie al à comunicât di jessi rivât a fâ lis previsions dal timp tes cuatri lenghis feveladis chenti: furlan, italian, sloven, todesc. No dome: si puedin ricevi vie email lis previsions in formât pdf te lenghe che si vûl. Lis traduzions a son par cure de coop. Serling. Dut chest si cjate tal sît www.meteo.fvg.it. (lenghe.net)
ILEGJITIM IL CONTRAT RAI
Il Comitât tecnic consultîf pes lenghis minoritariis de Presidence dal Consei dai Ministris al à declarât ilegitim il contrat di servizi Rai-ministeri des Comunicazions. L’organisim al da il parê sui progjets finanziâts di Rome e al à une funzion di vigjilance pe metude in vore de leç di tutele 482/99. L’ilegjitimitât e ven fûr dal fat che il contrat nol fevele di contignût minim di tutele des lenghis minoritariis e de sede Rai competente (tant che al dîs il regolament di atuazion de leç 482 su la tutele des minorancis linguistichis storichis). La declarazion e je vignude fûr de riunion dal Comitât, che si è tignude miercus ai 11 di Lui li dal dipartiment dai Afârs regjonâi a Rome, daspò che il sindic di Udin, Sergio Cecotti, al veve domandât di meti dentri la cuestion tal ordin dal dì.
«SANT SIMONUT e SANT SIMON» A CODROIP
Il “Sant Simonut” al è il concors leterari par students des scuelis mezanis, fi dal aromai innomenât premi leterari «Sant Simon» di Codroip. I fantats a varan timp fin ai 12 di Otubar par concori. A son ametudis contis lungjis, racueltis di contis o ricercjis. Par informazions telefonâ al 0432 908198.
NICO COLLE, ARTIST VIERS LA CINE
Une opare dal scultôr furlan Nico Colle e je stade sielzude par la Galarie des Sculturis Olimpichis di Pechin 2008. La opare, che si clame «Il volo delle parole libere», une volte costruide e vegnarà alte sui 6 metris.
