GRIGNEI DI STORIE. Il purcit: dal “tragos” grêc a chel furlan

I grêcs antîcs, tal mês di Març, a veneravin la fieste di Dionisos, il Diu de cjoche mistiche, de Primevere che e torne a fâ vivi il mont. Un diu che al mûr e che al torne a nassi, dimostrant ogni an che il spirt de Tiere al è imortâl, e il so destin chel di tornâ simpri come un cercli là che muart e vite si dan la man. Par celebrâlu degnementri a puartavin ator pe citât, cjase par cjase, un bec. Al varès netât fûr ducj i mâi de int, cjapantju su di se. Ae fin dal percors rituâl e dolorôs, lu varessin copât, e cun lui dutis lis magagnis dal mont a saressin stadis purificadis vie. Chel bec alì lu clamavin “tragos” e la sô storie e jere, secont il non, la tragjedie. Il rît al somee jessi cuasi il stes, cun contignûts simbolics antîcs tant che l’om. Al cambie dome il timp e il nemâl: Sorinvier e il purcit. Ma i segnâi culturâi si smicjin une vore di dongje. Il purcitut comprât un an prime, cuant che al jere di lat, ae sagre marcjât di Sante Luzie – la Sante dal Solstizi di Invier, la Sante de Lûs (e no si fasevino lis cjandelis, cul gras dal purcit, une volte?) –, al ven sacrificât intune cerimonie di purificazion là che dut il paîs al devente teatri dal so maçalizi. Arlêvat come un di famee, al cjape ancje un non, “il cjacjà”. Al devente amì dai fruts, che a zuin cun lui fin cuant che al è picinin. La sô muart e je publiche, e va daûr di un rituâl precîs, simpri compagn, che al tache cul rivâ dal purcitâr e dai siei amigos, cun sacs plens di struments di martiri. E po dopo, il strissinament de bestie dal cjôt ae bree, il curtìs che al fas sanganâ e berlâ. Peât pai pîts, netât cun aghe bolint, viert e fat a tocs, la sô cjar e ven lavorade daurman, tal frêt che al fâs fumâ cuarps e cjalderiis, cu la sapience di mans che a san ce tant sâl e mindriculis cjapâ sù dai sacs par che luianiis, sanganelis, palmonariis, persuts, bafis di ardiel a podin durâ tal camarin, veglâts de vecje di cjase, la femine cu la clâf, che e varà il compit di dâ a ognidun il so, cence mai strassâ. Al finirà l’Unvier. Fin a cuarante dîs de Pasche si podarà fiscâ ce che al reste, intun pignaton di ligrie inte prime fieste di vierzidure dai cjamps. Cuant che la antighe dee Maja (di chê al ven il non talian “maiale”) e tornarà a soflâ vite su la tiere. Po dopo, fin cuant che l’ort nol tornarà a florî e lis gjalinis a fâ ûfs, ven a stâi la Pasche di Resurezion, a saran di mangjâ jerbis amaris, e sopis di magri, e renghe cence sâl.

Arduinna, la Dee dai Celtis_ In principi al pâr che a sedin stâts propit i Celtis a cjareçâ pe prime volte la cjar dal cenglarut salvadi cul sâl gjavât fûr des lôr minieris, scuvierzint la pussibilitât di conservâle par tant timp, trasformant cussì in maniere radicâl lis abitudins alimentârs dai popui: no plui copâ e mangjâ, ma copâ e meti in bande. Une rivoluzion culturâl straordenarie, che e varès modificade in maniere definitive la mentalitât dal om, simpri plui stanziâl e peât ae tiere mari, libar di no seguî plui lis mandriis, lis pioris o lis predis: simpri plui contadin duncje, e simpri mancul cjaçadôr o pastôr. Di Cracovie a Salzburg, la influence de lôr grande culture, chê di Hallstatt, e à travanade la Europe a scomençâ dal secul VIII fin al so straordenari sflandôr, tal secul VI devant di Crist, cuant che la sô egjemonie culturâl si slargjave de Sizie russe fin aes valadis dal Friûl. Pe lôr alimentazion, il purcit salvadi al jere tant impuartant che a veneravin une Dee potente e tremende, Arduinne, rapresentade in cetantis medaiis, golainis o rincjins intant che e cavalche un cenglâr: misture interessante di feminilitât e di bondance, di fuarce salvadie e di fertilitât. Cuant che il segretari dal Patriarcje di Aquilee Pauli Santonin, tal 1482, al compagne il so princip in visite ae grande Diocesi, al note – tal so diari gustôs e intrigant – l’incuintri cuntun personaç curiôs, ven a stâi la “Domina Omelia”, femine dal feudatari di Ornech in Carinzie.
Di jê, nus conte la sô bielece: zovine, tal flôr de sô etât, legre e graciose. Vistude di neri, cuntune coronute di aur sui luncs cjavei, intorteade di butui di rose e fueis di muscli. Imbambinît di tante sensualitât, il nodâr dal Patriarcje al mangje tocuts di cjar che la principesse i puarte diretementri in bocje, al bêf vin de sô tace dopo che jê e à bevût. Al somee cuasi un rituâl antîc ministrât di une sacerdotesse pagane!
Ma la robe plui curiose al è propit il fat che un cenglâr i ven daûr come che al fos un cjanut, ubidient e mugnestri.
Mode Langobarde_ I Langobarts a son stâts i prins a vê un concet di arlevament dal purcit. La dimension e restave chê dal bosc, a cjaval tra il mont dal salvadi e chel dal uman, là che i nemâi a podevin nudrîsi di foncs, lidrîs, glants e cjastinis. Purcits neris, une raze bastardide cul cenglâr, che cumò e torne di gran mode su lis taulis ancje nostranis: “pata negra”, lu clamin. Il valôr di un bosc pai Langobarts al vignive misurât in purcits! Sui contrats dal secul VIII si rive ancjemò a lei: chest toc di bosc al val trente purcits, chel altri cincuante. E par cualchi storic e je stade lôr la idee di produsi pe prime volte cuessis di cjar salade cun dut il pît: a lavin ben di peâ tal cjaval cuant che si spostavin. Une riserve straordenarie che, une volte disniçade, e podeve durâ ancje cualchi mês: particolâr no di pôc, pal popul dai cjavai!
Sant Antoni_ Il purcit di sant Antoni al è il simbul vivent de solidarietât. La fraterne dal Sant, che te Ete di Mieç e gjestive ospedâi e ripârs pai pelegrins (e cetancj te nestre Patrie: un dai plui famôs si cjatave a Sant Denêl, là che il non dal ospedâl al è ancjemò peât a cheste antighe tradizion), e veve a disposizion cualchi purcit che al podeve cjaminâ libar pal paîs: ducj i davin di mangjâ, ducj lu nudrivin come une forme di assicurazion coletive. Une musine vivente (che, tra l’atri, no par câs e à la forme dal purcit!) là che si podeve meti dentri un alc pai timps di magre, o pal forest che al podeve vê dibisugne, o pal malât che al scugnive ripiâsi a la svelte. Ancje pal mont monastic che al veve une diete principalmentri vegjetariane, la cjar dal purcit e ven dispensade come medisine pai fradis che si inmalin. Si lu lei te regule di Sant Benedet. Une volte copât, il purcit di Sant Antoni al devente riserve alimentâr di ducj chei che a àn dibisugne. Providence, sparagn, gjenerositât e une vision ecumeniche dal sociâl come une specie di tindince antighe dal popul furlan. Cence mai dismenteâsi di une grampe di ligrie ancje jenfri il dolôr. Che il cjacjà di famee si lu vai scjafoiant il marum cuntun bon tai in compagnie! ■
ANGELO FLORAMO