DI BESSÔI – SCUELE. Par vinci, une scuele a furlan vie

Tal 1980 Zuanfran D’Aronc al scriveve intun articul po dopo ripuartât tes sôs “Pagjinis furlanis” che “il Friûl al à za un so sisteme scolastic speciâl”: e pardabon i arlêfs furlans a son jenfri dai plui preparâts di Europe, secont dai risultats dal Ocse Pisa, un dai plui complets sistemis par cognossi lis competencis dai students europeans. Alore aial sens imagjinâ un sisteme di istruzion difarent, che al rapresenti fin insom la specificitât de int di chenti? Jal vin domandât a Bruno Forte, formadôr cussì preseât e passionât che al è un plasê sintîlu fâ un dissen di chê che e podarès jessi la scuele che i furlans si struturin “di bessôi”.
Professôr, di dulà si varessial di scomençâ? De ridefinizion dal percors di studis dai arlêfs o des modalitâts di formazion e reclutament dai mestris?
Nissun dai doi aspiets al à suficient se prin no si è bogns di lei lis bisugnis dal teritori par meti dongje lis rispuestis che a coventin a frontâ lis problematichis plui sintudis de sô int. Cemût si fasial? Al covente cjalâsi ator, nasâ l’aiar, scuvierzi il miôr e il piês par mendâ cuntun blec ce che si po justâ e rinfuarçâ invezit lis oportunitâts che si cjatin intune realtât come la nestre. In cheste maniere si pues rindisi cont che la plui grande ricjece dal teritori furlan e je il so jessi un contest plurilengâl. E cheste e je une oportunitât straordinarie no dome pai rapuarts internazionâi ma ancje pe suaze formative che e regale al Friûl. Savê plui lenghis al regale plui capacitâts, ma ancje un voli plui viert ae diviersitât e ae complessitât dal mont: chest in dì di vuê al pues jessi un grant vantaç. Une realtât multilengâl e varès di jessi buine di judâ a dâ bon acet ancje ai tancj imigrâts che vuê nus permetin di restâ in ecuilibri di popolazion cun tant che la denatalitât record furlane e condizione in maniere une vore penze la nestre demografie.
Plui lenghis regalino plui fuarce di competi di un mont globalizât?
Sigûr. Jo o ai mê fie che e vîf cu la sô famee in Sudafriche. Si trate di un puest dulà che la comunitât e fevele 11 lenghis difarentis dutis batiadis tant che uficiâls dal Stât. E no a câs al è un dai paîs che al cres une vore in chescj agns. In Friûl o podaressin fâ compagn, sperimentant un model european di insegnament che al tegni dongje dutis lis lenghis dal nestri teritori intun percors di continuitât verticâl che de infanzie ae lauree al regali ai nestris fîs plui visions dal mont in simultanee, par vierzi lis cocis adun cu lis cussiencis.
Il Friûl isal pront a un model dal gjenar?
Un model “a furlan vie” al scugnarès jessi condividût aes sôs fondis cu lis realtâts de societât e de economie. Parcè che se nol è espression di une cussience coletive fuarte, al sarès timp butât vie. La culture omologade e omologante de globalizazion e varès vinçût, se no si rivàs a declinâ intune clâf pleade al teritori cheste didatiche di reinventâ. Cence sotanance. Dispès o vin un difiet di vision, parcè che nô si crodìn “minorance” e chest nus puarte a zuiâ in difese, a vê un complès di inferioritât pensant di jessi scjafoiâts di chei plui grancj di nô. E invezit il Friûl al è “un piçul compendi dal univers”, come che al diseve Nievo, no dome pal paisaç: ma ancje pe sô int che e je un tesaur di esperiencis, di lenghis e manieris difarentis di cjalâ il mont.
Il furlan di une volte isal un model?
No bisugne bandonâsi su lis lidrîs de memorie. Ancje a mi mi plâs la storie, ma la Bibie te Gjenesi e conte che voltantsi indaûr la femine di Lot e devente une statue di sâl. Nol è cu la glorificazion di Aquilee e dai Patriarcjis che si cjale indevant. Bisugne vê lidrîs, ma ancje alis par svuelâ lontan. Al covente elaborâ il doman, strenzi in man l’avignì.
Chest compit al varès di tocjâ ae Universitât…
Sul rûl de Universitât, che al è impuartanton, al covente dut câs sburtâ une vore. Parcè che la tentazion de retoriche e de autoreferenzialitât tal mont academic e je tante. Invezit plui l’ateneu si pee al teritori e al cree rêts, partnership e condivision, plui al determine la cressite de tiere che lu à fat nassi. ■
Walter Tomada