Interviste cun Loris Tramontin, paron di Azelea Promotion
“Il Friûl al à grandis pussibilitâts di deventâ un lûc di ponte pal turisim e pai grancj events, e lu stìn dimostrant cui grancj concierts che di cualchi an o organizìn in Regjon. Ma a son cetantis robis che ancjemò si podaressin fâ”. Peraule di Loris Tramontin, furlan che di Tisane cu la sô Azalea al somee vê une calamite par puartâ dongje te nestre tiere nons simpri plui impuartants de musiche rock e pop. Une situazion che fin a pôcs agns indaûr e someave un sium pai apassionâts, che a vevin di frontâ lungjis trasfiertis par viodi concierts di artiscj impuartants. Invezit cumò al è deventât cuasi normâl viodi esibizions di nons tant che Madonna, Bruce Springsteen, i Coldplay, che adun cun Bon Jovi, AC/DC e Iron Maiden a àn atirât in Friûl desinis di miârs di personis rivadis di mieze Europe. E chest an i Metallica, ma cumò ancje i Foo Fighters e i Radiohead a puartaran di gnûf la nestre Regjon a jessi un dai plui preseâts palcs pai events musicâi in Italie. “Il Friûl aromai si confronte dome cun Rome e cun Milan” al spieghe Tramontin: “i artiscj no dubitin plui che la place di Udin o che di Vile Manin no sedin ae lôr altece, parcè che zaromai tancj lor innomenâts colegas a àn sunât culì. E cussì al è simpri plui probabil rivâ a convinciju a vignî achì”.
Ma cemût si rivial a tirâ dongje stelis cussì sflandorosis?
Al è il risultât di passe 30 agns di lavôr, e de credibilitât che jo e la mê scuadre o sin rivâts a tirâsi fûr in dut chest timp. Lis agjenziis che a aministrin chescj artiscj a àn bisugne di interlocutôrs afidabii no dome par ce che al inten i contrats, ven a stâi la part economiche, dulà che jo no ai vût mai a ce dî cun nissun; a dî il vêr, ur covente di vê a ce fâ cun int afidabile, che e garantissi ancje serietât su problemis come la logjistiche e soredut che e à une peraule sole. Dutis carateristichis che o ricognòs come patrimoni de int furlane.
Ma la int furlane si rindie cont di cheste fortune?
No masse. E je vere che i furlans a son int serie, di peraule e che e lavore. Ma no àn la misure de lôr realtât in rapuart a chês dongje e a finissin par fâ dal Friul une tiere piçule e insodisfate, che une volte che e rive a cierts risultâts ju dà cuasi par scontâts. Fasìn l’esempli dal balon: l’Udin al è in Champions pe seconde volte consecutive, un risultât impensabil pe storie de societât. Ma al è plui facil sinti a mugugnâ i tifôs che viodiju rindisi cont de fortune che a àn. Pai spetacui al è chel instès. Coventarès lâ a cjalâ ce che al sucêt a Trevîs, Verone, Ferrara, in citâts des stessis dimensions di Udin, par realizâ che in chest moment il Friûl al à une centralitât che si è vuadagnât cul lavôr e la programazion, e tal balon e tai events musicâi al è a nivei di ecelence europeane.
Dut câs a Udin la costruzion dal gnûf stadi e podarès meti a risi chest vuestri progjet…
No, il progjet al va indevant: come che al dimostre il conciert di Bruce Springsteen a Triest, lis alternativis a son. Ma Udin al è une soluzioni ideâl. O vin lavorât un grum par dâji une stature tal panorame talian des localitâts degnis di ospitâ grancj concierts, e cumò parcè vino di disfâ il zugatul? No dome: la place furlane e je perfete ancje pal aspiet logjistic, parcè che il Stadi al è dongje de autostrade, ben servît dai mieçs publics. Pecjât no ristruturâlu aprofitant di chestis carateristichis. Al sarès un tesaur straçât.
Mai pensât di lâ vie dal Friûl e puartâ inaltrò dut il so patrimoni di cognossince?
No, mai. O lavorìn cun tantis localitâts dal Venit ma la fonde di dut e je chi di nô, e o vin fat dut di bessôi. No podaressin lâ vie. Ancje parcè che la gnove economie globâl e à di bon che al è compagn se tu lavoris a Rome o a Tisane: a son lis ideis che a contin. E la posizion dal Friûl, che une volte e jere margjinâl, daspò che il Mûr di Berlin al è colât e je deventade strategjiche: o sin ae crosere jenfri Europe dal Nord, dal Sud e dal soreli jevât. Un altri tesaur di no straçâ. Nô o puartìn chenti int che a ven dal Nord (Gjermanie e Austrie) ma ancje dai Balcans, de Cechie e parfin de Russie: cheste int e larès sburtade a tornâ cjapantle pe gole, e mostrant cun braure il miôr de nestre tiere. ■
Walter Tomada
