I CLASSICS. 12 – CUINTRISTORIE DAL FRIÛL La albe de nestre Patrie

Chel dai spirons di aur
La republiche di Vignesie e tirà il sghiret il mês di Mai dal 1797. E veve comandât in Friûl par 376 agns e cualchi mês: in dut chel timp e jere rivade adore di ridusilu come un peçot sbrindinât. No si jere contentade di gjavâi sanc di dutis lis bandis: i veve distudade la anime. Nissune memorie plui de antighe indipendence, nissune brame di tornâ a vêle; nissun furlan che al ves podût fâ alc di bon, se no sgarfâ tes cjartis dai archivis un fregul di storie e presentâle ben morestade a un public impegnât in peteçs, in luianiis; nissun om di biel inzen che al ves podût doprâlu altri che a fâ viersuçats di Arcadie e sunetessis par cualchi predicjadôr di cuaresimâl; la nobiltât scomparide o imbastardide midiant i matrimonis cui arlechins des fameis di buteghîrs de Serenissime; la gnove nobiltât, rivade di là, imberdeade tai vizis e tai sporchets dai cavalîrs servents; il popul instupidît te sô miserie e cence sperance di podê mai plui gjavâsi fûr; la Regjon interie cence une difese, cence une fuarce, cence une dignitât. A jerin aromai secui che la maraveose citât e platave, sot la vernîs des sôs pieris e dai siei carnevâi cence fin, une vecjaie che i roseave i vues e i faseve fraidessi la polpe; a jerin secui che e veve bielzà imparât a vivi cu la industrie dal forest, al ven a jessi spelant i dordei che a capitavin di ogni bande a gjoldi lis sôs fiestis e a cognossi lis sôs pelandis inscueladis, e turclant cence pietât i “fedelissimi distrittuali” de Tiere ferme.
Di là de stangje – che le contin cemût che a vuelin i turiferaris iredentiscj – il guvier de la Austrie al jere stât plui svelt e plui onest. Gurize, di un cjistielat che e jere sot i siei conts, e jere deventade une citadine di gale, cui siei palaçs, cui siei zardins e une vite cetant plui facile e comude. I furlans di là, se a vevin un fregul di cjâf e di spirt, a cjatavin la strade vierte par Viene e no ur mancjavin ni lis pussibilitâts di butâsi fûr, ni lis sodisfazions. E no forin pôcs chei che si faserin onôr.
De bande di ca, invezit, al è dome Udin che al pues tignî in bon di vê vût cualchi stamp di grandece, in chei secui, par vie che cualchi luctignint ambiziôs al bramà di scrivi il so non suntune piere, e cualchi siôr di là, dopo comprât il titul di un nobil furlan ruvinât, al pensà di implantà chenti un fregul di chê borie che nol podeve mostrâ a Vignesie. Ma al è vonde pôc par un timp cussì lunc.
Dal 1797 Vignesie e lassà che Napoleon (1) – un gjenerâl di 28 agns! – al puartàs la vuere cuintri da la Austrie sui cjamps de Furlanie, che i francês a fasessin man basse di ce che a cjatavin di miei tes glesiis o tai palaçs, che a mangjassin e a bevessin a spalis de puare int. E Napoleon, tornant indaûr di Leoben, le ringrazià mangjantle jê intune bocjade. Po dopo, pestant i pîts tal palaç dai Manins di Passarian e in chel dai Florios a Udin, se lassà gjavâ di bocje e le bandonà in man da la Austrie cul pat di Cjampfuarmit. Dopo doi agns a rivarin i cosacs di Suvarow a disvuedà lis panariis dai Furlans, po a tornarin i francês a cjastiâju di vêlis lassadis disvuedâ.
Dal 1805 al passà Massena (2) e il Friûl, cu la pâs di Presburc, al deventà “Dipartiment di Passarian” sot dal “Regno Italic” di Napoleon. Dal 1809 e tornà la Austrie cui arcabûs dal Arciduche Zuan; ma i tocjà di spesseâ a tornâ indaûr par difindi la capitâl, lassant il Friûl semenât di cadavars. Dal 1813 une altre sopressade e scovà vie par simpri i francês e il congrès di Viene nus lassà sot da la Austrie une altre volte. Sot di chestis montanadis i Furlans lis cjaparin di chescj e di chei, cjantant tedeums mo par chei mo par chescj, paiant contribuzions e sopuartant recuisizions, robariis, mangjariis e liberazions a cjadene.
I cincuante agns da la Austrie
Dal Congrès di Viene (1814-1815) fintremai ae vuere dal ’66 dut il Friûl al restà sot dal ream Lombart-Venit che al veve come re l’imperadôr da la Austrie e une autonomie aministrative, in man des Congregazions – o assembleis – provinciâls e regjonâls, che e risultave in pratiche une vore balarine e plui formâl che altri (3).
Chest al è un slambri de nestre storie tant intrigôs che mai, di contâ. Il Paschin nol à olsât a meti lis mans daprûf; chei che lu àn tratât, si son tignûts scrupolosementri tes sinis segnadis de plui conformistiche mitologjie uficiâl taliane, che al ven a jessi te fumate nazionalistiche creade cul intindiment di impiâ e di nudrî, in barbe aes plui claris veretâts, la asse plui velegnose cuintri di dut ce che al pues savê di Austrie.
Disìnlu subit: no vin e no podìn vê nancje la ombre di une nostalgjie par chei timps, se no altri parcè che prin dal ’66 no si jere vîfs dibot nissun di tancj che o sin vîfs vuê; no podìn nancje insumiâsi di tornâ a viodi il Friûl tes condizions di za un secul; o savìn benon che la storie no torne mai indaûr par chê strade che e je vignude: par fortune – e ven voie di dî! E alore, nancje a misurâ lis robis cul braçolâr de oportunitât, a Machiavelli vie, no je plui nissune reson di lâ indenant cu lis sflocjis. Ma no fasìn nancje stât su lis buinis relazions che, in chest moment, si son stabilidis cui nestris vicinants di là de stangje: e je simpri une stangje in jenfri; e o sin sigûrs che i gazetîrs nostrans che in dì di vuê no si sparagnin di fevelâ dai “fratelli carinziani” a son bogns di tornâ a fevelâ doman di buinore dal “secolare nemico” cu la plui candide disinvolture. E o savìn ancjemò che il velen scliçât tes venis dai furlans cu la scuele, cu la stampe, cu la propagande fate in dutis lis manieris, al è ancjemò lì dentri, e un grum de nestre int no je madure par gloti ciertis veretâts.
Il guvier da la Austrie in Friûl al veve dôs pecjis tal mani: al jere, ancje chel, un guvier forest e al jere, massime tal imprin, un guvier reazionari. Il popul furlan al veve tra lis altris, une pecje: al veve pierdude, in cuatri secui passâts sot paron, ancje la memorie e la brame de sô indipendence.
E, massime dopo lis sacodadis e lis vuadulis cjapadis sot di Napoleon, al bramave nome di jessi lassât in pâs. Il guvier da la Austrie, cun ducj i difiets che i vin ricognossûts al fo il plui sapient, il plui prevident, il plui tolerant, il plui ordenât che il Friûl al vebi mai vût. I storics patriotics si disperin a lâ a cirî il fatut che ur permeti di fevelâ di crudeltâts, di opression, di coruzion: no rivin adore di documentâ altri che cualchi incident di chei che a capitin sot di cualunche guvier: la storie di Crovich che al fo condanât parcè che nol veve volût consegnâ lis armis, la storie di cualchi pôc di bon mandât a fâ il soldât in Boemie daûr de segnalazion dal plevan, la storie de femine di Osôf, contade de Percude (4) (ma une conte no je un document, e si sa cetantis che a ’ndi nassin di chês contis). Noaltris che o vin vude e che o vin ancjemò la sorte di viodi cun ce mieç che si son difindûts e che si difindin i guviers di dopo, forescj e talians, cuintri dai lôr aversaris, no podìn propi sgrisulâsi a lei chês robis; noaltris che o vin viodût e che o viodìn cemût che e à lavorât e che e lavore la polizie taliane di dopo, no si sintìn il flât di fevelâ di opression sul cont di chê da la Austrie. E no si varès mai di dismenteâsi che lis autoritâts comunâls e provinciâls, i tribunâi, i uficis di reclutament, che a vegnin acusâts di coruzion, a jerin formâts di int nostrane e che il guvier nol mancjave di cirî e di becâ chei tâi che no fasevin il lôr dovê.
Intant lis tassis che i Furlans a scugnivin paiâ, a jerin ridiculis, di no podê nancje crodi, in confront di chês che dopo ur forin rifiladis dal guvier talian; e no stin a fevelâ di chês di cumò. Intant in Friûl a vignivin clamâts sot lis armis dusinte e trente fantats in dut e pardut, e la plui part a jerin di chês plumis che nissun vaive la lôr partence. Intant la burocrazie e jere fate di pocjis cjartis, di disposizions claris, di personâl rispietôs, dret e svelt, ben sielzût, ben paiât e ben cjastiât se al faseve falopis. L’ordin al jere perfet, la int e jere contente, e faseve i siei afârs e si deve il bon timp.
Pieri Çorut (5) nus presente il spieli plui vêr e plui just dal Friûl di chê volte: e al è miôr no fâ confronts! I malcontents si ju contave sui dêts e ducj a vevin il lôr parcè: uficiâi che a vevin servît Napoleon, e la Austrie no veve volût cjapâju (passant sot la Austrie a rineavin lis lôr ideis: ce fâ dai rineâts?); int scostumade o fanatiche che e veve fote cuintri i predis (e i predis che a vevin cercjât i risultâts des ideis francesis, si capìs che no clopavin di chê bande); cualchi framasson o ebreu che si tignive in rie cui compagns talians o francês, sbisiant di riscôs. O vin provât a passâ cun calme dute la sfilze dai manifescj che a forin publicâts an par an, cun decrets e provediments dal guvier, e no vin podût cjatâ fregul di conferme di nissune di chês mil colpis che o vin sintudis tantis voltis sul cont da la Austrie. O chel al dipent dai parevoi che si dopre…
pre Josef Marchet e pre Checo Placerean