VIERTIDURE – Razionalizazion o centralizazion?

La peraule di ordin e je, soredut, une: razionalizâ. E dongje: taiâ, sparagnâ. Par vie che no si puedin plui permeti di meti, te tresêf, la stesse rate di fen di dîs, vincj agns indaûr. Lis vacjis grassis de politiche a scomencin a sintî i sampogns de crisi. Ma lait a spiegâlu ai nestris politics che forsit al è di bande lôr che la int si spiete che a batin il prin claut. E che a part propuestis di tais sul numar dai conseîrs – propueste che e varà i timps luncs di une riforme costituzionâl prime di jentrâ in vore – no à viodût tais concrets sui fringe benefit, sui vitalizis, sui funzionaris e lis segretariis: dutis rinunciis che a varessin permetût un tai des spesis e bonât il rugnâ popolâr su lis straçariis e lis massepassuderiis. Insome, la soluzion par taiâ, i nestri sorestans le àn cjatade tal acentrâ. Dut sot un unic centri di podê. A ce pro pal Friûl?
Sanitât
La riforme de Sanitât regjonâl al è un pont centrâl e forsit chel plui impuartant volût de aministrazion Tondo. Il president al volarès tocjâ la governance, propit par miorâ e rindi plui eficient il servizi, smagrint proceduris di apalts e subapalt, timps di spiete. La prime vôs e fevelave di un unic dirigjent regjonâl (invezit di 6). La ultime di un spachetament in trê di chest rûl (Friûl centrâl e alt – Friûl orientâl e provincie di Triest – Friûl ocidentâl). A restaressin cussì il Cro, i Irccs, i grancj ospedâi. E lis garzis e lis siringhis a costaran compagn e a rivaran sveltis dapardut, lis listis di spiete si taiaran, i bisturis a lusaran tant che spiei. Trê belançs (al puest dai atuâi sîs). Eficienze? Par fortune che za o jerin la miôr sanitât di Italie, che se paìn dute nô. Ce che si stente a dî al è che il gnûf model al sbreghe il leam stret cul teritori – che al fo il pont di fuarce de riforme Fasola. Si divît il servizi teritoriâl di distrets, in mans a altris managers, dai ospedâi e dai ospedâi di rêt, e puartant la gjestion di chescj sot di altris direzions si riscje che si blochi chê continuitât e integrazion di cure che e fâs in maniere che un vieli dimetût di Tumieç daspò une operazion al puedi continuâ a vê assistence dominciliâr in automatic, cence pierdite di timp, cence altris domandis e impegnativis. E soredut, o tornìn a cjâf de cuistion cuant che si domandìn cui che a saran i responsabii dai distrets teritoriâi. Managers. E i managers a son managers. E come pal solit culì no si taiarà, parcè che a saran paiâts tant che i trê sorestans des trê aziendis. La spending review e va a finîle “tal bano”.
Universitât
Su la alte formazion, chê par intindisi cressude e sostignude dal grant moviment popolâr ancjemò prime dal taramot, si à fat un grant dibatiment. Cualchidun, soredut  esponents dal autonomisim, al fevele di pierdite di autonomie, cuant che al sint fevelâ dal progjet di federazion dai Ateneus di Udin e di Triest, chest ultin par dîle dute mai al mandà ju la istituzion de Universitât dal Friûl. Al moment, i senâts academics di Udin e Triest a àn dât acet a un cuadri di colaborazion par alçâ i “indicadôrs di cualitât, il Font di finanziament ordenari e garantî gnovis risorsis” (la suaze di dut chest moviment e je la riforme Gelmini). Si davuelzarà prime su ricercje scientifiche e formazion, che su aspiets gjestionâi e aministratîfs. Vie ai doplons, professôrs che a fasaran sù e jù, i doi Cda si daran dongje insiemit 2 voltis par an. La cjarte e je ancjemò un nûl fumôs. Ma. Un: la ricercje e à di smicjâ a une prospetive globâl. La eventuâl colaborazion no à di jessi ferme ae citât de Alabarde, ma e à di cjalâ oltri confin a nord e a est, pene l’isolament de cognossince. La federazion e à un sens dome in cheste prospetive. Doi: lis motivazions storichis no puedin jessi dismenteadis. Ni voltadis come gabanis. Si sa benon parcè che la Universitât e je nassude. Bisugnarès butâ vie scuasi 40 agns di storie. Si rindarès il teritori plui puar, si secjarès la lidrîs de ricercje. Trê: il caratar e il curriculum de Retore Cristiana Compagno nol permetarès mai un at di suditance, un degradament di Udin a dipartiment o sede di rapresentance stacade di Triest. No je tipo. E po: cui si cjaparessial la responsabilitât di un tâl at di masochisim?
Sul front universitari, si à fevelât ancje di unificazion intune uniche agjenzie dai Erdisu, i doi ents a pro dal dirit al studi universitari. Percors che al sarès plui logjic viodût che o stin fevelant di un ent che al gjestìs la ripartizion des cjasis dai students, di borsis di studis, di mensis. E pûr ancje in chest câs un ecuilibri al podarès jessi cjatât tra volontât decisionâls, ripartide in maniere compagne tra Udin e Triest, e servizis che a funzionin par students, che a àn di jessi centralizâts sul puest, li che si cjate il student. Scomencìn a taiâ poltronis e relatîfs gjetons di presince.
Ater
Il modon popolâr al à i siei coscj. Dal rendicont 2010: il sisteme Ater al coste 78 milions di euros e di chescj, 30 a son di coscj fis. I dipendents a son 340 e il cost dal personâl al è di 19 milions di euros. Cinc diretôrs gjenerâi (ce torment, chescj managers!) a costin 700 mil euros. Cinc Cda e revisôrs dai conts: un milion di euros. Ogni ent po dopo al à i siei uficis tecnics. La governance e je politiche: l’esempli de poltrone pai “trombâts” o riciclâts de politiche. E di fat e je sogjete a spoil system – simpri politic, clâr. Perfet. Nissun al met in discussion che i uficis tecnics, i dipendents a fasin il lôr lavôr in maniere eficiente. Si trate di centenârs di apartaments che a àn ancje bisugne di manutenzion e la nestre edilizie popolâr, ringraciant Diu, no je lassade a “maç-e-bandon” come in altris regjons talianis. Ma cinc Cda, 5 diretôrs gjenerâi, 5 revisôrs – propit 5 – coventino? No. No coventin. L’acentrament te struture di une uniche agjenzie al à chê intenzion, taiâ culì. Sigûr, si vierç un probleme di rapresentance. Te stanzie dai botons al varà di jessi presint il teritori dut, che al viodi des istancis e des esigjencis dal stes, cence sblancjaments teritoriâi. Cence che lis cjasis popolârs de Alte Cjargne a vegnindin degradadis a stalis, a pro des vilis di Triest. La governance centrâl e varà di jessi virtualmentri policentriche. Un “Cencelli” teritoriâl e – robe impussibil – fûr dai zughets politics.
Ents locâi
Di almancul 10 agns si fevele di riformâ lis comunitâts montanis. Prime Comunitâts, daspò Comprensoris, daspò tornadis Comunitâts. Cumò, forsit: Union dai comuns. Però la “mangjadorie” e je simpri restade. Di fat e je une altre tresêf par politics locâi. Ven a stâi: no baste la provincie “ent di mieç” tra Regjon e Comun. Al covente un altri ent di mieç tra “l’ent di mieç” e il comun. E di fat e ven viodude, dai voi de int, come un dai “cjars inutils” de politiche. E alore la soluzion e je: scancelâju. Ma po dopo se lis funzions di ent “di mieç-di chel di mieç” a vessin di jessi cjapadis sù dal “ent di mieç” chel vêr (ven a stâi la provincie), il pericul al è che si pierdi la eficienze dai servizis erogâts. Cul probleme di scugnî ridistribuî ducj chei dipendents tal fratimp cressûts tant che foncs. A chest pont si inserìs la cuistion dai comuns piçui. Aial sens tignî tantis piçulis unitâts locâls – teritoriâls e par pocje int? Malafessì, se a fossin virtuosis. Il probleme al è che la stragrande maiorance di chescj comuns e à i conts inzessâts e inclaudâts: il 50% dai bêçs in casse a covente par paiâ i dipendents, il rest par garantî mutuos par oparis e infrastruturis. Sperant che tal fratimp cualchi sindic nol vebi ancje zuiât cui derivâts. Domandait al prin citadins di Liussûl se nol spint ancje di sô sachete par fâ funzionâ l’ent che al è de sô int.
Chi tocje fâ une sielte tra cuistion di identitât e di autoguvier e eficienze aministrative. Cjatâ, duncje, un compromès, un ecuilibri dulà che l’un e l’altri fatôr a puedin cjatâ vôs. Cul riordin des provinciis al sarès impussibil pensâ a un “ent di mieç” che al cjapi sù ce che a fasevin lis comunitâts montanis. Ma nancje ipotizâ che chestis competencis a passin bot e sclop ai comuns. Il compromès al podarès jessi davuelt di Union tra comuns ni masse grancj, ni masse piçui. Ents di mieç de “juste misure” che a tutelin la specificitât dal puest (ancje di partignince psicologjiche e di identitât), in stât di gjestî servizis di prossimitât e che no fasin di sgambet al ent sorestan (la provincie). A gjavaressin dal dut ancje une altre tresêf dulà che in masse a àn mangjât. ■
Oscar Puntel