RICUART. Intal segn di Jone

Sot dal arbul di qiqajon dulà che il profete Jone al è daûr a polsâ, al è rivât a riparâsi un altri profete, dai segns però plui simii a chei dal Batiste, la vox clamantis in deserto no scoltade. A Renato Iacumin, che i siei funerâi a son stâts celebrâts inte piçule glesie li de Basiliche di Munistîr lunis ai 18 di Jugn, al à di jessi ascrit cence dubi il merit di vê “discuviert” par prin i mosaics dal complès catedrâl aquileiês. Ancje se rinvignûts intai prins agns dai Nûfcent, chei doi ciclis iconografics straordenaris a son restâts in sostance indecifrâts fin che, in dôs publicazions publicadis intal 1990 e intal 1993, il studiôs nol è rivât a meti la clâf juste inte sieradure di chei doi satûi antîcs e preziôs, che a rapresentin in sostance la plui impuartante, e probabilmentri plui antighe, atestazion dal cristianisim a Aquilee.
SOT DAL TOR DI POPON_ Di fat, il paviment de Aule Nord, ancje se mutilât in maniere serie des fondis dal cjampanili poponian, al è decifrât di Iacumin, intes campadis che lui al stime plui antighis e origjinariis, tant  che la trasposizion iconografiche maraveose di motîfs e temis gnostics, chei stes che, a nivel leterari, a rivocaran dopo inte opare impuartante Pistis Sofia, cjatade fûr intai agns 40 dal Nûfcent tra i tescj coptis de egjiziache Nag Hammadi. La persuasivitât di cheste ipotesi ermeneutiche e pues ben jessi garantide dal fat che in chel autentic labirint musîf dal assurt, che al veve impresonât dute la ricercje anteriôr, al ven davuelt infin chel fîl miracolôs di Ariane che al permet, par esempli, di dâ sens e significât teologjic ben precîs a chê aragoste splendide poiade tra i fueams frindôs di un arbul. La propueste no je ciert francje di risiervis – dal rest i mosaics stes a presentin lacunis gravis – ma e je in vore salde la norme che une teorie sientifiche e reste buine fin che no sotentre une altre miôr, e, in maniere francje, al orizont nol pâr configurâsi in assolût nuie, se no lis ripetizions ranzidis di banalitâts desolantis. La inventio di Iacumin e permet ancjemò di plui di otignî, sul plan storic, doi risultâts ecezionâi: la evidence di un lûc di cult gnostic – che se di no nol jere testemoneât che di fonts leterariis – e, par chel che al inten in maniere specifiche Aquilee, la conferme di une origjin alessandrine dal so cristianisim primitîf.
JUDEOCRISTIANISIM_ Alessandrinitât di mari gnostiche, o plui in maniere proprie origjeniane, che no si pues in ogni câs assolutizâ, se al è vêr che a iluminâ il percors sucessîf sui mosaics de Aule Sud, seont il stes studiôs, al è propit un test judeu-cristian, il Pastôr di Erma, che al fonde lis sôs lidrîs inte apocalitiche judaiche dal Secont Templi, chê stesse recepide intai circui gjovaneis de Asie cuartodecimane. No par câs, sui mosaics teodorians la pasche no je transitus, ma passio, la resurezion no je anastasis, ma katapausis, lûc escatologjic de polse – di Crist e dal just – intal Ream milenari, e, cemût che nus ateste il vescul Cromazi, la lavande dai pîts e je tal puest dal batisim, par chê tradizion recepide dai maiores nostri che, in chescj câs, e condûs ancje in Orient e no dome a Alessandrie, par chel procès miracolôs di communicatio idiomatum che al fâs dal cristianisim aquileiês no la semplice sume di plui tradizions religjosis, ma un organisim autonom e vitâl.
RIVOLUZION IACUMINIANE_ I studis di Renato Iacumin, che lui al à puartâts indenant in maniere fisse in chescj ultins vincj agns, a àn rivoluzionât la ricercje sientifiche su lis origjins dal cristianisim a Aquilee. Ma, come che al sucêt ai profetis in patrie, la sô e je stade la vôs di un che al à berlât intal desert: il desert de sience, sclerotichementri fissade ai protocoi positivistics detâts sul tacâ dal Nûfcent di Pio Paschini; il desert de academie, suspietose e duriote viers di dut ce che si elabore fûr des sôs muris scjafoiadicis e simpri plui sclesadis; il desert, forsit chel plui arit, de “culture” furlane che, no podintlu combati par mancjance di munizions argomentativis, lu à emargjinât o adiriture ridût fûr.
La celebrazion dai funerâi intun lûc diferent de Basiliche Patriarcjâl – no cate chês che a sedin stadis lis resons – al pues ben jessi let tant che simbul slambrant di un rapuart cence soluzion fra il studiôs e la glesie mari di Aquilee: a pet des curis amorevulis prestadis a cheste dal studiôs, fi valorôs propit di un custodi de Basiliche, e sta la disfigurazion che no si ferme di bande di ents e di istituzions che, dopo vê comprometude la visibilitât dai mosaics cu la realizazion di un passadôr indecent, vêr “abomini de desolazion”, cumò, al esterni, a àn tirât sù une sorte di acuari mimetic par protezi un mosaic modest, savoltant cussì fintremai la organizazion dai spazis.
LA EREDITÂT_ Cu la muart di Renât Iacumin si siere la ultime valve di chel tritic miracolôs che – cun Guglielmo Biasutti al centri, lui e Gilberto Pressacco ai flancs – al à onorât une lungje stagjon di ricercjis e di studis par cincuante agns intîrs. Di chest magjisteri, ce restial? Al scrîf Mateu che Jesù, sustât de bibiose domandade di un “segn”, al à esclamât: «Une gjenerazion triste e adultare e pretint un segn! Ma no i sarà dât nissun segn, se no il segn di Jone». Di “segns” la gjenerazion “triste e adultare” dal Friûl contemporani a ‘nd à vûts almancul trê, e ju à in pratiche ignorâts. Al reste il “segn di Jone”, almancul fin che une cualchi altre imprese disgraciade no nus impedirà in Aquilee la viste. A chel pont, al zovarà visâsi cemût che si siere il verset evangjelic: Jesù, dopo jessi sbrocât in chê esclamazion, “ju à lassâts e al è lât” (M 16,4). Forsit al è iminent il timp di lassâ che “i muarts a sepulissin i lôr muarts” (M 8,22  par Lc 9,60), rinunziant ae sperance che in Friûl si puedi ancjemò produsi savê, organizâ ricercje, e alimentâ culture. ■
Remo Cacitti e Gabriele Pelizzari