CULTURE. I Langobarts, patrimoni de umanitât e dal Friûl

E ancje i Langobarts a son finîts in chescj ultins timps in prime pagjine dai gjornâi, tornâts di mode dopo tant timp che a polsavin tai libris di scuele o dai studiôs o in cualchi buteghe di oresin, un pôc dismenteâts ancje in Friûl che al somee invezit traviersât di une passion pe Ete di mieç mai viodude prime, baste viodi lis fiestis ator pai nestris paîs.
DI GNÛF LÔR, FINALMENTRI_ Forsit e je ore che si torni a fevelâ di lôr par vie che a àn segnât te fonde la storie, il paisaç, la lenghe, e cualchidun al dîs ancje il fisic dai furlans. La nestre cognossince in fin dai conts e nasseve di sigûr de gjite che ducj o vin fat, tal timp des elementârs, a Cividât tal Museu a viodi la crôs di aur di Gjisulf e la plui antighe copie de Historia Langobardorum di Pauli Diacun, e di sigûr i monuments plui famôs: il Tempietto, il batisteri di Gjisulf e l’altâr di Ratchis, prin duche dal Friûl, ma nuie di plui. Forsit cualchidun plui indenant cui agns al veve slargjade la sô cognossince cu la grande mostre fate a Vile Manin e a Cividât tal 1990, une des ultimis bielis mostris fatis in Friûl e pal Friûl.
Ma cumò bisugne dî che i Langobarts a son tornâts a fâ fevelâ di lôr par dôs robis: la prime, pe gnove necropoli “de stazion” a Cividât, e la seconde pal ricognossiment che tal Jugn dal 2011, propit ai 25, juste un an fa, i Langobarts a àn vût di bande de Unesco tant che patrimoni de umanitât.
GNOVE NECROPOLI_ Dôs peraulis su la gnove necropoli vignude fûr, ancje se si saveve de sô esistence za di timp, tal cantîr de gnove viabilitât dongje de stazion de ferade. A son stadis cjatadis plui di cent tombis, une vere necropoli che e à pandût une vore di reperts: crôs di aur, umbons di scûts, spadis, ornaments feminîi e vie indenant, che cumò a son ducj in mostre tal Museu di Cividât. Di gnûf, la dimostrazion di cetant che al sarès di cirî ancjemò tal sot tiere dal nestri Friûl, specie pes etis plui antighis, soredut par capî miôr la nestre storie.
Ma forsit la robe che e à fat plui scjas al è che Cividât, o miôr i monuments langobarts di Cividât, in compagnie di chei di Brescia, Castelseprio, Spoleto, Campello sul Clitunno, Benevento e Monte Sant’Angelo a son aromai impuartants no dome pal Friûl e pai furlans, ma par dut il mont.
Un biel sucès par un popul che al jere definît barbar e che di solit al ven metût insieme a chês altris popolazions barbarichis che a son passadis pal Friûl, a scomençâ dai Gôts, dai Uns e par finî – une vore dopo – cui Ongjars e cui Turcs. Un popul che al rive dret in Friûl tal 568, par sparniçâsi po dopo in Italie, cun a cjâf il re Alboin. Si ferme prime di dut a Forum Iulii (Cividât) là che al lasse lis miôr fameis e un grant trop di cjavai sot di so nevôt Gjisulf, come che al conte Pauli Diacun te sô famose storie.
OLMIS ATOR PAL FRIÛL_ No si pues culì contâ de storie e dai fats che in passe dusinte agns, fin ator dal 775, a son sucedûts in Friûl e in Italie tal grant ream dai Langobarts, ma invezit al è miôr cirî in curt di contâ alc di chel che i Langobarts a àn lassât al Friûl di vuê. Prin di dut, a son plui di 40 lis localitâts che a son cun sigurece stadis ocupadis di fameis langobardis. Lûcs che a jerin dispès dongje i flums, insom lis valadis, o dongje lis stradis plui impuartantis, soredut tal Friûl orientâl e te pedemontane. Ancjemò vuê a son paîs che tal non a àn cheste olme: Farle, Fare, Gjais, Sale, Modolêt…, ma soredut te microtoponomastiche rurâl, cui tantissims bearç e braide, che a segnin no nome cul non il paisaç furlan. E te lenghe, lis peraulis  – magari vuê dismenteadis – che nus àn lassadis a sunin ancjemò di antîc: bleon, roste, lescule, scaie, sgrimie, vuate, gorne, crucje, gastalt… e ancjemò: grapâ, sbrovâ, sgarfâ, rassâ, sbregâ…
Planc a planc, ancje i Langobarts si metin adun ai colons romans che a vevin za ben organizât il Friûl rurâl cu la centuriazion e lis gnovis coltivazions. E cussì i gnûfs parons, a part i nobii che a stavin tes citadinis, a van in campagne cambiant il fundus roman cu la curtis, un aziende che e jere fate de cjase paronâl, de tiere di lavorâ, des cjasis dai fameis, dai magazins, des cantinis, dai lûcs par filâ e tiessi la lane, e cussì indevant.
REGÂI LANGOBARTS_ Il paisaç al jere fat di piçui borcs rurâi, di cjamps lavorâts a siale, mei, spelte, vuardi e sorc; di prâts là che a passonavin soredut pioris, ma ancje purcits; di boschetis di rôl e di faiâr; di plantis di vîts e ulîfs e in ca e in là cjastinârs, piruçârs, melârs. Insome, un paisaç che za in chê volte al veve lis carateristichis dal paisaç furlan che par lungjissim timp al sarà il senari indulà che si davuelzarà la vite dal popul furlan.
Ma i plui biei regâi che i Langobarts a àn lassât ai furlans e a Friûl a son propit…regâi! Si trate des donazions che trê fradis langobarts, Erfo, Anto e Marc, a àn fat a cuatri munistîrs: la Badie di Siest, il munistîr di Salt di Paulêt, la Badie di Sant Michêl di Çarvignan e il munistîr di Sante Marie a Sant Canzian dal Lusinç.
Cun chestis donazions, i lûcs a deventarin une vore impuartants e la Badie di Siest, insieme al Tempietto Langobart e al convent di Sante Marie in Val a Cividât, al è sigurementri un lûc speciâl che al permet di rivivi lis atmosferis di chei timps passâts tra duchis, rês, regjinis e cavalîrs cun lungjis barbis…
Ma no je finide ca. Propit te donazion pe badie di Siest, pe prime volte – o sin tal 762 – al ven citât, tra i bens regalâts, “un monte in Carnia”, la prime atestazion uficiâl de ativitât di monteâ inte mont furlane. Se us somee pôc! ■
Mauro Pascolini