VIERTIDURE. Ce che nus spiete e si spietin cul gnûf an scolastics

Dal prossim an scolastic, chel che in regjon al scomence ai 12 di Setembar, i fruts e fantacins des scuelis maternis e elementârs che a àn dit di sì a varan une ore di insegnament di lenghe furlane par setemane, fintremai a 30 oris. La marilenghe e jentre a dimplen tal percors scolastic, no dome come progjetazion sperimentâl.
Dut câs, cemût che sarà cheste ore te pratiche nol è ancjemò dal dut clâr o almancul no ducj i gjenitôrs lu àn capît. Al è capitât cun di fat che cualchidun al vedi provât a informâsi, par dî la veretât ai prins di Jugn, par savê almancul ce che si fasarà in chel timp: si laraial indevant cul program di une materie par furlan o se, soredut tes elementârs, si insegnarà a scrivi e lei par furlan taiant une ore di une altre materie, stant che il furlan a scuele al à di jentrâ tes oris dal curriculum e no in zonte a chês? Par tancj forsit al sarà bielzà clâr, ma al è sigûr che par plui di cualchidun ore presint al è ancjemò un misteri.
In spiete di vê clarece, la Patrie e à cirût di capî ce che si spietin, o si spietaressin, i direts interessâts, i fruts e lis lôr fameis, magari cjapant a riferiment lis ativitâts che in chescj agns si son metudis adun in cetantis scuelis, cu la passion e la preparazion di tancj mestris.
Te scuele materne_ Fat il scandai, si capìs in forme empiriche, par lis scuelis maternis al salte fûr che il desideri al sarès l’implant metodologjic “une persone-une lenghe”, di mût che il frut al sa che cun chê mestre si fevele simpri par furlan e cun chê altre par talian. Al è un principi di fonde, par vie che la comunicazion cui piçui e à di mantignîsi stabil par un pôcs di agns, fintremai che si invie il procès di insegnament/aprendiment in o cun plui lenghis.
In cheste forme il frut no si cjate devant a la orute di furlan par setemane, ma la lenghe e sosten dutis lis ativitâts de scuelute: a cjantin, a zuin, a mangjin, a fasin dissens, l’ort, lis ricetis, i esperiments doprant il furlan ma ancje il talian dilunc dut il timp che a stan tal asîl. Come che e dîs la leç 482, a disin i plui esperts.
Se dut chest no simpri al sarà pussibil, si zonte tes considerazions gjenerâls, la sperance e je che si procedi cul criteri “une situazion-une lenghe”, ven a stâi une part de zornade destinade al furlan, lant par esempli in laboratori, creant une situazion, fasint une esperience.
Tai ambients de scuele, po, al sarès biel di cjatâ cartelons, libruts, imagjinis, imprescj, videos par furlan, di mût che il frutin in maniere naturâl al sinti la lenghe come part  integrant dal ambient, alc che nol è par nuie strani al so “habitat” e che nol è metût intun cjantonut là che bisugne lâ di pueste.
Inoltri, al è cualchidun che in famee il furlan no lu fevele, ma che al à decidût di fâial imparâ al frut, ricognossint magari di vê pierdût alc tai agns passât  (no si pues dismeteâ che par cualchi gjenerazion no trasmeti la lenghe furlane ai fruts al jere considerât un segn di evoluzion e di sfrancjament di un passât dulà che il Friûl al jere tiere di miserie) o dut câs che al è miôr savê alc di plui che di mancul. Par chescj la sperance e je che i mestris a clamin dongje ancje i gjenitôrs, par spiegâur i obietîfs dai progjets e cirî insieme cemût colaborâ par doprâ il furlan ancje in famee.
Te scuele elementâr_ L’aspiet distintîf des elementârs e je la alfabetizazion primarie. Si che duncje te perlustrazions dai desideris dai frututs e des fameis che a àn sielt il furlan si cjatin pinsîrs che a somein un pôc ai procès des scuelis maternis ma, sore il dut, si spere di rivâ a savê lei e scrivi par furlan par dongje dal talian.
Ma cemût imparâle la lenghe? Cualchidun al à vût pes mans un imprest che si clame “Sghiribiç”, un “sfuei” didatic par imparâ a lei e a scrivi che al è saltât fûr in sîs numars tai agns passâts su progjet de Universitât di Udin, catedre di didatiche des lenghis modernis, edizion Kappa Vu. E al è di li che al à cjapât la idee par imagjinâsi ce che si podarès spietâsi sui bancs di scuele.
Ativitâts fatis ator di tescj (fumuts, piçulis storiis, poesiis, zûcs), dulà che l’aprendiment de lenghe al ven fat in forme di contrast e par mostrâ a clâr i elements che a son diferents tra il talian e il furlan, ma ancje i aspiets che a puedin someâ compagns (ma cussì nol è) procurant une contaminazion no positive, par vie che po si cjapin sù forme di dî sbaliadis che si fâs fadie a corezi.
A chei che a son bielzà in cuarte o in cuinte, par esempli, no ur displasarès di doprâ la marilenghe ancje in forme plui dissiplinâr, tant a dî par fâ storie, gjeografie, aritmetiche, religjon. E je la modalitât che cumò a clamin CLIL, al sotlinee un gjenitôr che al è ancje insegnant, e che e pues jentrâ te formazion cuant che il curriculum al è struturât par materiis.
Par ducj_ Che si vadi tal asîl o tes elementârs, al pâr clâr a ducj che l’implant di une educazion plurilengâl nol è dome linguistic, ma pluriculturâl, une forme par cognossi e rispietâ lis diferencis e duncje jessi fintremai di piçui pronts ae integrazion cul rispiet de sô identitât e di chê di chei altris. ■
Antonella Lanfrit