“La Patrie dal Friûl” e cambie direzion: di Dree Venier a Erika Adami
Cambi ae vuide dal storic mensîl in lenghe furlane “La Patrie dal Friûl”, fondât tal 1946. A Andrea “Dree” Venier i sucedarà ae direzion Erika Adami. La decision e je stade cjapade cu la unanimitât dal Consei diretîf de associazion culturâl “Patrie dal Friûl”, editore dal gjornâl.
Il president de associazion Andrea Valcic al ringrazie il diretôr di prime Dree Venier, «pal so impuartant contribût professionâl simpri apassionât e impegnât. A lui un graciis di cûr» e al salude cussì la jentrade de gnove diretore: «O soi content e braurôs de nestre sielte: la jentrade di Erika ae vuide dal nestri gjornâl e je la testemoneance de part de femine te societât di vuê, ma massime e pues zontâ une sensibilitât gnove tal cjamp de autonomie furlane, dulà che la presince feminîl e à e e sta deventant impuartante».
Dree Venier al lasse duncje la incarghe marcant che «daûr de mê decision nol è nissun fat particolâr, ma dome dôs cumbinazions: la fadie di trê agns di lavôr penç e la ocasion di vê tant che diretore une giornaliste competente tant che Erika, che e savarà puartâ aiar gnûf te redazion dal mensîl. Jo o resti e mi met a disposizion tant che colaboradôr».
Erika Adami, 43 agns, gjornaliste professioniste, e à une esperience lungje tal cjamp de comunicazion in lenghe furlane. E je stade prime redatore dal setemanâl la Vita Cattolica e de emitente Radio Spazio 103. Pal setemanâl de Arcidiocesi di Udin e à ancje curât la edizion di dôs publicazions impuartantis pal Friûl: la riviste par fruts e fantacins dal dut in lenghe furlane Alc&Cè e il lunari Stele di Nadâl. Tra lis tantis colaborazions si ricuardin chês cun Il Gazzettino, Antenna3Friuli, Udine Economica e Gnovis pagjinis furlanis.
«Assumi la direzion da “La Patrie dal Friûl” al è un privileç – e dîs Erika Adami -. O ringracii l’editôr, la associazion culturâl “Patrie dal Friûl”, pe fiducie che mi à dât e Dree Venier pal otim lavôr che al à fat vuidant il mensîl cun competence e passion sincire; o cjapi sù il testemoni cun entusiasim ancje parcè che o ai cjatât un grup di colaboradôrs straordenaris. Insiemi o cirarìn di stiçâ riflessions su chel che al sucêt te nestre tiere e proponi ideis ufrint un contribût pe cressite dal Friûl e des diviersis comunitâts che lu componin, un impegn che no pues lassâ di bande la promozion dal pluralisim culturâl e linguistic che i ricognossìn dute la impuartance e il valôr».
Adami e je la seconde diretore femine dal sfuei furlan daspò Maria Del Fabro, che e tignì lis brenis de riviste dal 1953 al 1963.
A jê e va il bon lavôr! dal Consei e di dute la redazion.
Udin, ai 23 di Zenâr dal 2018