Il Patriarcjât di Aquilee. Une storie di interès european
Al è stât rilevât in maniere juste cemût che intai libris di test che si doprin tes nestris scuelis nol sedi nissun spazi pe storie dal Patriarcjât di Aquilee, che dal pont di viste politic istituzionâl intal cors de basse Ete di mieç si identifiche tout-court cul Friûl. E je une mancjance grave, prin di dut parcè che cence storie no esist identitât e dopo parcè che e disprive de pussibilitât di sclarî in dute la sô bielece tante part dal patrimoni storic artistic che ancjemò al reste di chest periodi. Une tâl ignorance e je tant plui sorprendente, intal câs dal Friûl, se o pensìn al interès che a àn indreçât ae nestre storie i studiôs di altris paîs. Lu testemonein publicazions di fonts, ats di cunvignis, monografiis e studis dedicâts ai patriarcjis e al patriarcjât. Al bastarès citâ il volum di Heinrich Schmidinger de Universitât di Salisburc “Patriarch und Landesherr. Die weltliche Herrschaft der Patriarchen von Aquileia bis zum Ende der Staufen” (Graz – Köln 1954) e la racuelte di studis in so onôr dal titul “Patriarch im Abendland. Beiträge zur Geschichte des Papstum, Roms und Aquileias im Mittelalter” (Salzburg 1986). Intal 1985 al jessive pes edizions de Academie des Siencis di Viene il prin di une serie di volums su lis Fonts documentariis dal patriarcjât (“Vorarbeiten zu einem Urkundenbuch des patriarchats Aquileia”). A chest volum su la abazie di Mueç, curât dal prof. Reinhard Härtel de Universitât di Graz, a son vignûts daûr i volums su Sante Marie di Aquilee intal 2005 e su la abazie di Rosacis intal 2017. Prime che l’Istitût Pio Paschini pe storie de Glesie in Friûl al inviàs in maniere sistematiche, di intese cul Istitût Storic Talian pe Ete di mieç, la “Serie medievâl” dai regjistris dai nodârs patriarcjâi, a Toronto il Pontifical Institute of mediaeval Studies al publicave i Acts of Gubertinus di Novate, notary of the Patriarch of Aquileia, 1328-1336 e l’editôr Bärenreiter Die liturgischen Musikhandschriften aus dem mittelalterliche Patriarchat Aquileia (Kassel-Basel-London-New York-Prag 1997). Plui di resint, intal 2016, e je saltade fûr la monografie di Ondrˇej Schmidt in lenghe ceche sul patriarcje Zuan di Moravie (Jan z Moravy, Vyšerad, 2016), cumò disponibile ancje intune edizion inglese dal titul John of Moravie between te Czech Lands and the Patriarchate of Aquileia (Brill, 2019). Restant aes biografiis dai patriarcjis al è tant che mai significatîf che cualchidune tra lis vôs plui impuartantis dal Nuovo Liruti. Dizionario Biografico dei Friulani, I. Il medioevo (Forum, 2006) e sedi stade scrite di studiôs forescj e ricercjadôrs su la base di une grande bibliografie internazionâl. Peter Štih, docent di Storie medievâl te Universitât di Lubiane e cumò president de Academie nazionâl slovene, al à scrit la biografie di Siart di Sighardinger, il patriarcje che al è stât protagonist al at di fondazion dal stât patriarcjâl intal 1077. Gerard Schwedler de Universitât di Kiel al à curât lis vôs biografichis di Marquart di Randeck e di Zuan di Moravie, cognossûts in maniere rispetive par vê promulgadis lis Costituzions de Patrie dal Friûl e promovût riformis popolârs che a devin podê aes corporazions citadinis in oposizion ae nobiltât. Dieter Girgensohn de Universitât di Gottinga al à ricostruît la figure di Ludovì di Teck, ultin sorestant temporâl dal patriarcjât intal moment che lis trupis venezianis a àn concuistât il Friûl intal 1420. Si puedial ancjemò relegâ la storie de Ete di mieç furlane intal ambit dai studis locâi o no si aial pluitost di ricognossi che e je une storie di respîr european e duncje meritevule di jessi studiade ancje intes nestris scuelis? ❚
