La Europe nus judi a dismenteâ un secul di casermis
Intal moment di cjalâ ae nestre tiere o sin simpri condizionâts de “naine” che nus à fat pensâ par 100 agns di jessi la “sentinele de Patrie” taliane sul cunfin todesc e slâf. Al varès di jessi clâr a ducj in dì di vuê che il nestri al è invezit un teritori che al è intal plen cûr de Europe, ma ce fasial il guvier di Rome par jemplâ chest sproc di contignût e mendâ i dams che la militarizazion e à puartât in dut chest timp? Intal ultim secul e mieç, al notave cualchi setemane indaûr il diretôr dal setemanâl “Il Friuli” Rossano Cattivello, il Stât e i siei aleâts no àn fat altri che tirâ su casermis, bunker, poligons, zonis di siervitût pleadis a un ûs che nol è lât a pro dal disvilup dal teritori, ma de sô distruzion. Cumò dute cheste ereditât e je un pês che al continue a marcâ la tiere furlane, parcè che la plui part di chestis struturis a son bandonadis e degradadis: ogni tant a son stadis trasferidis a Comuns che no àn ni i bêçs ni i progjets par recuperâlis, ma pe plui part a son ancjemò in man al Esercit e al Demani. Se îr a jerin il metodi per mostrâ la difese dal bloc capitalist rispiet a chel comunist, vuê chestis struturis a laressin rigjeneradis. Cheste e varès di jessi une des sfidis che UE e Italie a varessin di frontâ cun serietât “par comedâ il tuart – al dîs Cattivello – che al è stât fat al Friûl”.
◆ In timps di “Recovery Fund”, dulà che dome par Triest al somee jessi un progjet fuart di cressite a partî dal so puart, parcè no si pensial a scancelâ chest ricuart di une tiere umiliade e a fâ tornâ il Friûl tal cûr de Europe? Chest cjanton di Italie là che si cjatin i trê grups linguistics dal Vecjo Continent, ven a stâi chel latin (cul furlan e il talian), chel slâf e chel gjermanic, al podarès deventâ l’esempli di une riconversion massive e “green” perfetamentri in linie cul plan che Ursula von der Leyen e diseve di volê prontâ. Il consum di teritori che al è stât fat chenti e nol è mai stât mendât al è un dai plui grancj misfats de Vuere Frede. Platât, par tant timp, dal fat che i militârs a fasevin zirâ la economie: ma cumò che i soldâts no son plui, e je ore di pretindi un intervent che la UE e la Nato a varessin di fâ ancje dome par creance.
◆ Cheste condizion e varès di jessi za avonde par fâ capî a Rome e a Bruxelles trop speciâl che e je la nestre tiere. Ma stant che il fat nol somee jessi clâr, parcè la nestre Regjon no sburtie in cheste direzion? Parcè nissun, a part Cattivello, stiçial a pro di un intervent che nol sarès un plasè, ma dome un at di justizie? ❚