Ce che nus disin i efiets de pandemie in Friûl
Tancj a cjapin il virus cence savêlu. Lu svilupin e lu difondin cence rindisi cont. No mostrin segnâi de lôr cundizion, ma cu la prove dal tampon e vignarès fûr la veretât. Cu la prove dal Covid-19 ancje il Friûl al à mostrade la sô vere nature. Chê di une regjon plui simile a chês de Europe centrâl e danubiane che a chês de Italie setentrionâl. Lu disin i numars, massime il dât plui grues, chel dai muarts par numar di abitants: inte Alte Italie il Friûl, che fin cumò al à vût un centesim dal totâl des vitimis talianis, al è la regjon cun mancul vitis pierdudis in rapuart ai abitants. Ae fin di Avrîl, il tribût paiât de Lombardie (1.345 muarts par milion di abitants) al è il plui alt, ma Emilie (771), Ligurie (752), Piemont (662) i stan daûr e fintremai lis plui piçulis Val di Aoste (1063), Trent (752) e Bolzan (507) a àn frontât dificoltâts une vore griviis.
◆ Nô o sin, cence savêlu, part di un altri senari. Che al è diferent ancje rispiet al Venit dulà che in ogni câs il dât al è une vore plui bas, di 275 muarts ogni milion di abitants. Il Friûl-Vignesie Julie a ‘nd à vûts une medie di 226, ma se si gjavin i dâts di Triest si rive a 126 rispiet ae popolazion des ex provinciis di Udin, Pordenon e Gurize. Numars plui dongje de Austrie (65) e de Slovenie (42) che dal rest de Italie.
I dâts de pandemie a disvelin une realtât che dispès nus scjampe dai voi. Che la struture insediative e economiche, dal sisteme dai traspuarts e dai rapuarts sociâi nus lein di plui ai nestris vicins di là dal confin che al rest de Italie. O sin part di une “Euroregjon de responsabilitât” dulà che il distanziament dai centris abitâts e des concentrazions produtivis al à limitât i dams. E i nestris compuartaments a àn fat il rest, cuntune responsabilitât e un grant sens de autorganizazion des comunitâts che nus à menât a fâ svelts e ben dut ce che al coventave par frontâ il burlaç. Tropis voltis lu aie za fat la nestre int? Te storie e je simpri stade usade a vê un nemì su la puarte. E a fuarce di dai, alc di bon al è restât: e ancje cuant che il nemì no si viôt, o mostrìn di savê fâ lis sieltis justis.
◆ Par sigûr, une sielte responsabil (ancje se costose) le vin fate plui di 20 agns indaûr cjapant sù in autonomie la gjestion de nestre sanitât che in chest câs e à dimostrât di lavorâ une vore ben massime in confront di altris modei. Al è matematic che dopo cheste crisi la cuistion de gjestion sanitarie lassade aes regjons e deventarà un dai scuintris politics plui pençs tai mês a vignî. Al coventarà jessi bogns di difindi cheste competence, ancje se intai ultins agns e à patît par une vore di tais di belanç.
◆ Tal avignî o varìn di jessi bogns di no sbassâ lis difesis. Ni cuintri dal virus, ni cuintri dal centralisim. O varìn di jessi bogns di rispietâ lis normis par podê tornâ a partî. Ma ancje di pretindi che il Stât nus lassi sielzi cemût. La situazion e sarà une vore pesante, cun aziendis che a varan pierdût marcjât e ativitâts dal cumierç, de ristorazion e dal turisim a tocs.
◆ La sensazion e je che fin cumò nissun al vedi imagjinât une strategjie par jessî di cheste situazion. Il guvier centrâl al somee in confusion, ma nancje in cheste regjon fin cumò si viôt une direzion. Zonte e industriâi a son plui ocupâts a criticâ Conte che a burî fûr soluzions alternativis, e i sindacâts no san se batisi pai puescj di vore o pe salût di chei che a lavorin. Mai come cumò al covente che i sorestants no si contentin di declarazions buinis dome par fâsi biei, ma che a scrivin clâr neri su blanc une mape par saltâ fûr dal palût. Il model lu vin tai nestris vicins de Euroregjon: se no vin fantasie, al baste cjapâ ispirazion.
◆ Cuntune sigurece. In Friûl la int e à mostrât di no jessi il probleme, ma di volê jessi la soluzion.
I volontaris organizâts par puartâ a cjase di ducj lis mascarutis e par judâ vielis e puars a son la part plui biele di un popul che no si rint. Ni ae pandemie, ni ae rassegnazion. ❚
