Tal mieç di tantis fufignis e garabatulis, e je tante int che chest Istât e à cjatât il timp par dâsi dongje cun nô “sot dal tei” dal so paîs cu la braùre di dimostrâsi furlane. Cuntun at di responsabilitât e di amôr pe sô tiere e pe sô identitât, e à sielzût di fâ come i nestris vons, che al timp des viciniis si metevin dongje par frontâ i problemis de lôr comunitât. E nus à dât acet ator pal Friûl scoltant lis nestris vôs, ma soredut cjapant la peraule e dantnus la sô vision des robis.
◆ O vin di ringraciâ une vore lis aministrazions e lis associazions che nus àn judât a puartâ indevant chest biel zîr di incuintris in cetancj puescj: di Cjarlins a Cormons, di Plasencis a Cuar di Rosacis, di Tumieç a Roncjis, di Cjopris a Glemone, di Tavagnà a Risan, di Spilimberc a Lignan, fin a Vilegnove di Sant Denêl. Intal progjetâ chest lâ a torzeon pal Friûl cun Dree Valcic, Dree Venier e Diego Navarria, che o ringraci adun cun ducj i colaboradors par vê poiât e cjapât part a cheste iniziative, no varès imagjinât di cjatâ tante presince e calôr ma soredut tante voie di jessi scoltâts di bande dai furlans.
◆ In chescj incuintris o sin restâts distanziâts, ma no distants: anzit l’afiet pal nestri gjornâl al cres e pardut a son vignûts fûr biei dibatits, dulà che lis personis a àn vût plasê di pandi lis lôr ideis, contâ lis lôr esperiencis, resonâ sul stât presint des robis e sul avignì che nus spiete. Un avignì che a tancj ur somee ledrôs, e che ducj a considerin pussibil sledrosâ dome intune maniere: tornant a scuvierzi la nestre identitât, e lis lidrîs che nus pein ae nestre tiere. La nestre fuarce e je simpri stade la voie di no pleâsi al destìn e di organizâsi cuntun sens di comunitât: une robe che e somee vignî mancul cul individualisim che al marche la societât di vuê. Ma par no jessi scancelâts inte omologazion al covente tornâ a sintîsi speciâi, unics, origjinâi, come che la Storie nus à fats: ni miei ni piês di chei altris, ma diferents.
◆ E je cheste la riflession che plui di dutis e je vignude fûr di chescj incuintris fats sot dai arbui dai nestris borcs, scoltant la memorie dai testemonis de nestre antighe democrazie paisane: dai teis, dai maronârs, dai cjastenârs, dai cjariesârs dulà che une volte i cjâfs di famee a decidevin dut ce che al jere di fâ pal paîs. Insiemi. Dant vôs a ducj e cjatant un acuardi pal ben di ducj, cence spietâ che a rivin imposizions di inaltrò. Si clame autonomie, e e fâs part des nestris lidrîs. ❚