LaLa seconde ondade de pandemie, magari cussì no, e je rivade. E daûr di chel che o viodìn, nancje cheste volte no sin pronts a frontâle. O varessin vût dut il timp di organizâsi, ma e je stade plui fuarte la tentazion di fâ fente di nuie. Ma cheste epidemie e je triste, seneose di mostrâ a ducj la sô fuarce che e je prin di dut chê di mostrânus dutis lis nestris contradizions. E ven a misurânus, a metinus ae prove, par fâ viodi ce che o sin bogns di lassâ in bande e ce che propit no rivìn a fâ di mancul di fâ o di jessi.
◆ A son passâts pôcs mês, ma la lezion di cheste Vierte no je coventade a nuie. Ni al Guvier, ni a la int. I sorestants, tacant dal prin ministri Conte, a son stâts pronts e bogns a dî ce che ducj i citadins a varessin vût di fâ: ma daûr de sglavinade di decrets e prescrizions che a son stâts dâts pe tutele de salût publiche, il Stât aial rivât a jessi credibil tant che model di organizazion? Lis rispuestis di caratar sociâl e economic, ma soredut sanitari, a mostrin chest Atom dute la lôr precarietât. No vê potenziât il sisteme di traspuart al sburtarà a sierâ di gnûf lis scuelis, dal dut o in part: la emergjence istruzion dut câs e je stade frontade pensant plui ai bancs cu lis rodelis che a potenziâ la bande largje e la fibre e a judâ ducj i students a vê i imprescj par praticâ la didatiche a distance, cence jessi deprivâts dal dirit di imparâ par vie di problemis di conession che a esistin ancjemò di cetantis bandis.
◆ Ancje in Regjon, al ven di domandâsi, isal stât fat avonde? Cjalant il numars dai puescj in terapie intensive che nol è cressût cuissà ce, la dificoltât di fâ i tampons, la amputazion des direzions dai Distrets sanitaris che e lasse cence regjie la assistence teritoriâl, la rispueste no je masse positive. E se il president Fedriga al cjalàs mancul bande la polemiche cul Guvier e al cirìs di organizâ un model furlan par frontâ cheste emergjence, forsit i risultâts pai citadins a saressin miôr. La pandemie fin cumò nus à sparagnâts, ma nol è dome cu lis cjacaris che o rivarìn a difindisi.
◆ Ni cu lis cjacaris ni cu lis polemichis. Cuant che tancj furlans a domandin di evitâ lis restrizions des normis anti-Covid lant daûr al model dal Sudtirôl par no sierâ bars e ristorants aes 6 invezit che aes 10, al ven di pensâ che al è dibant reclamâ la autonomie dome par tignî vierte la ostarie. La vere autonomie e je chê che e cres su la fonde di une identitât che si e pronts a difindi ogni dì, no chê che e ven fûr dome ogni muart di Pape se ti gjavin il “dirit” di lâ a bevi un tai prin o dopo cene. E je chê che e sburte a difindi ogni dì la lenghe e la culture di un popul, no a jessi sotans di un model compagn di chei altris. E je chê che e ven fûr de lezion di mestris tant che pre Checo Placerean, che o ricuardìn su chest numar parcè che a son juste 100 agns che il Friûl al à vût in regâl la sô grande figure. “No stait a vê pôre di vê coragjo” e di “judâsi di bessôi”, nus diseve chest profete, che al saveve che lis disgraciis a coventin a misurâ la nestre fuarce. E alore sperìn che come la seconde scosse dal taramot tal 1976 nus à dât il vêr sburt a cjapâ la strade de ricostruzion “in autonomie”, ancje cheste volte la seconde bugade di un destin contrari e coventi a judânus a cjapâ lis decisions plui justis. ❚
