Speciâi o no?!
✽✽ Il President de Assemblee de Comunitât linguistiche furlane al à scrit al Ministri de Istruzion Marco Bussetti e al President de Regjon Massimiliano Fedriga domandant la sotscrizion di un protocol di intese pal insegnament de storie e de gjeografie dal Friûl, de tierce classe de scuele primarie fin ae fin de scuele mezane superiôr, e par zontâ fassicui bilengâi (furlan/talian) ai libris di test ministeriâi, li che no cjatin spazi la storie e la gjeografie dal teritori.
✽✽ La iniziative di Diego Navarria e va sul troi di une educazion scolastiche di fonde plui buine e rispietose de identitât plurâl des nestris comunitâts (che i tescj talians a ignorin). Cun di plui, coerente cu lis circolârs ministeriâls che a fevelin di “scuele de autonomie” tant che “lûc li che la diversitât e à di jessi esaltade tant che font di ricjece”, une scuele “clamade a fâ buinis lis istancis formativis che di chês a son puartadôrs arlêfs, fameis e teritori”. In pratiche, chel che al è stât fat in Venit cu la firme, ae fin di Setembar, di un protocol di intese tra il President Luca Zaia e il Ministri Bussetti pal insegnament de storie e culture venitis in ogni ordin e grât di scuelis. E la Regjon Friûl-Vignesie Julie, autonome e speciâl, ce fasie?
✽✽ Cuant che inte VI comission consiliâr regjonâl, di resint, si è discutût di regjonalizazion de scuele, la plui part dai conseîrs e à tirât il cûl indaûr, dopo che in campagne eletorâl ducj a ‘nt sostignivin la necessitât. Ancje devant di une situazion al colàs cun 73 scuelis su 171 cence presidis, insegnants e personâl Ata che a mancjin e un Ufici scolastic regjonâl – declassât intal 2014 e che al dipent dal Venit – cu la metât dai dipendents che a servaressin e cumò ancje cence diretôr, che si è dimetût. Covential altri par fâ valê la nestre specialitât? Se no, tant al vâl dâi reson al judiç emerit de Consulte Sabino Cassese che, ae scree dal an academic de Universitât dal Friûl, al à sostignût la inutilitât sostanziâl des Regjons a statût speciâl. E ancje su chest cantin, pôcs a àn vierzût il bec. Sveìnsi! ❚
di Erika Adami