A Çurçuvint al va indenant il progjet ‘Une bibie sot il cîl’

Ai 12 di Avost e je stade screade la “vie di Marie”: dîs oparis (siet fatis cuntune particolâr tecniche di afresc dal artist Paolo Orlando, dôs de Scuele dai Mosaiciscj di Spilimberc e une in spiete di jessi tramudade in opare musive) a son stadis metudis intes façadis di ancjetantis cjasis dal paîs di Çurçuvint Disore.
PRESENTAZION PARTICOLÂR_La presentazion si è disvoluçade fûr in maniere une vore particolâr: une procession cun prime e ultime tape te place de Plêf di Sant Martin; denant di ogni opare, che e mostre un episodi significatîf de vite di Marie, la benedizion, la leture di un toc dal vanzeli e une riflession curte di pre Claudio Como. Tal moment di polse denant a ogni icone, lis comunitâts invidadis (Resie, Liussûl, Salin, Ravasclêt, Iutiz di Codroip, Trep, Peregrinatio Mariae, Sudri e Paluce) a àn fat un cjant marian carateristic de proprie tradizion liturgjiche. Dut il percors al è stât involuçât dal cjant des litaniis de Madone cu lis vecjis melodiis cjantadis de Onorande Compagnie dai Cjantôrs di Çurçuvint.
PAÎS IN FIESTE_Il paîs di Çurçuvint si è vistît di plante fûr a fieste: dutis lis viis son stadis decoradis cun brenis di peç e rosis di stagjon, propit come cuant che e passe in procession la Madone di Avost.
La vie di Marie e je un gnûf percors che si unìs ai grancj mosaics che a pandin “Dîs moments fondamentâi de storie de salvece”, il “Bon Samaritan” tal municipi, ducj realizâts de Scuele Mosaiciscj di Spilimberc su dissen di Paolo Orlando e dongje il grant mosaic in ceramiche dal “Judizi universâl” di Michelangelo, screât ai 17 di lui.
Une biele cjarte zuiade dai Cirubits par cui che nol pues lâ a Rome par viodi cheste opare impuartante; cumò si le pues viodi propit a Çurçuvint, in Vie de Vicinie a pôcs pas dai “Citârs” indulà che tor il 1750 fin al 1882 e esisteve la fabriche di ceramichis. Cu la arzile cjapade sù in Gjai di Mieç a vignivin fats vâs par ogni sorte di necessitâts, pilis de aghe sante, curnîs, cops e planelis che a vignivin vendudis ancje fûr dai confins dal paîs. Alc di chei creps si puedin inmò viodi su pe façade esterne de vecje cjase: une biele crucifission cun Sant Zuan, il Spiritussant cun doi agnui, il Crist in crôs e la Madone.
LA FOTO E IL MOSAIC_Ceramiche dai Citârs peade a strent cu la opare di Michelangelo: di fat, la fotografie a risoluzion altissime de opare origjinâl inviade diretementri (cun ducj i permès) dai Museus Vaticans e je stade tramudade cuntune tecniche particolâr suntun grant mosaic (5,10 x 5,70 m), formât di piastrelis in ceramiche e sistemât su pe parêt di une cjase.
Dut chest al fâs part dal progjet “Une bibie sot il cîl”, volût e puartât indevant de Parochie di Sant Martin Vescul di Çurçuvint, de Arcidiocesi di Udin, de Aministrazion Comunâl e des associazions dal paîs.
Il progjet, che al sta movint i prins pas, al intint meti in contat, midiant da la art, crodints e no crodints cuntun test unic fondamentâl pe civiltât ocidentâl, ven a stâi la Sacre Scriture.
Lis oparis a àn fatis plui bielis diviersis cjasis dal paîs, dantjur plui lusôr e zontantsi al patrimoni architetonic, culturâl e storic ancjemò ben conservât te piçule comunitât.
UNE IDEE PAL TURISIM_Dongje dal valôr spirituâl, la idee e vûl meti in moviment, in cheste piçule realtât di mont, un turisim religjôs/culturâl in grât ancje di puartâ cualchi benefici di caratar economic. Piçulis robis, ma impuartants pe vite di une comunitât.
Il progjet al previôt di slargjâsi inmò tes viucis dal paîs, svilupant temis e tecnichis diviersis, cun mans di artiscj cognossûts e no, dut par dâ vite a percors di formazion umane, culturâl e spirituâl.
Za di cumò la int e rive par curiosâ: lis puartis son simpri viertis in chest paisut di mont par lâ a scuvierzi jenfri lis gossis lis bielis oparis poiadis su pes cjasis di Çurçuvint. Pardabon “Une bibie sot il cîl”. ❚
Marta Vezzi