Gnûf dossier sul insegnament
de lenghe furlane tes classis
Leçs talianis e regjonâls a pro dal insegnament dal furlan a scuele, listis regjonâls di docents increditâts, percors di pueste pe formazion cualificade, publicazions trativis pai fruts.
◆ A prin viodi, il sisteme scolastic furlan al somearès pardabon un paradîs, cun tante int passionade e dute une schirie di imprescj par podê trasmeti la nestre lenghe ai fantats di un Friûl che, magari cussì no, ogni an al piert une part de int che e fevele furlan. E je vere: la societât e je simpri plui miscliçade, cun int che e rive di fûr, tantis fameis (massime i gjenitôrs) a doprin il talian (o altris lenghis) cui fruts. Ma une part di responsabilitât e je ancje di un insiemi di regolaments che no àn nissun mani par judâ la lenghe furlane a jentrâ intes classis e che, anzit, a van a risi a deventâ la lame uçade dal curtìs che al sassine ce che di bon si podarès fâ.
◆ Tachìn de opzionalitât: un gjenitôr al pues decidi se il fi al varà di partecipâ aes lezions di furlan o mancul, lant a creâ la idee di une materie di scjarse impuartance (fâle o no, al è compagn), prejudizis (par religjon, al è un discors di fede, ma pal furlan al devente pardabon un at di discriminazion) e berdeis inte gjestion de classe (ce i fasino i fruts che no àn aderît? Se ur va ben, alc di plui tratîf, tant che dopo i compagns a domandin ai gjenitôrs di gjavâju dal insegnament de lenghe furlane, se di no, a restin in classe ancje lôr, a fâ compits, o se di no a vegnin smacâts in altris classis, cence indicazions ben claris). Une sielte che no lasse nancje spazi a une programazion o a un percors di cressite, stant che ogni an la spade di Damocli e torne a colâ su la classe, lant dut câs a cuvierzi dome la fasse de scuele de infanzie, de primarie e de secondarie di prin grât, cence considerâ dut il cicli dal oblic scolastic.
La leç, cun di plui, e fevele di “almancul trente oris di insegnament”, li che invezit la plui part des lezions si ferme a chel limit, nancje che al fos un pericul fâ une ore di plui.
◆ Di là dal probleme des classis dai fantats (se no si rive a un minim di fruts, facil che dut al ledi sù pai stecs, no cate la adesion di bande dai gjenitôrs), un altri biel fastidi al è chel di cjatâ la disponibilitât dai docents, stant che no ducj i istitûts a rivin a jessi autonoms e a cuvierzi la domande cun personâl interni cualificât. Si scuen lâ a cirî (ogni tant propit come cercandui) difûr, cun bants di pueste, lant a pescjâ te sacre “liste regjonâl dai insegnants di lenghe furlane”. Une filaine di nons che in dì di vuê (ultin inzornament dal Fevrâr dal 2024) e cjape dentri un esercit di 1920 docents. Pussibil che no si rivedi a cjatâ cualchidun in cheste schirie infinide? Pussibil, sì, viodût che no ducj a dan la disponibilitât o a son impegnâts di altris bandis. Cence fevelâ de cualitât che a podaressin sigurâ, viodût che par cumò par jentrâ dentri, di là de abilitazion, al baste vê frecuentât un cors di lenghe furlane di 26 oris (i cors pratics de Societât Filologjiche Furlane, che par trop babios che a sedin i mestris, disêtmi voaltris, trop che si pues imparâ in cussì pôc timp). E sì, o soi la prime a confermâ cun marum di vê vût tai miei cors ancje int no furlanofone (e nancje furlane), che dopo e je lade dentri di chê liste infinide. Clâr che o sin denant di une situazion cruziade, ma la soluzion che al propon cualchidun, chê di inviâ lis provis di certificazion e di disnotâ ducj chei che no son cualificâts, no pues jessi un rimedi, viodût che si larès pardabon a risi di meti in zenoglon un sisteme za in crôs.
◆ Par fortune, intai ultins agns si à lavorât une vore (e ben) pe formazion cualificade dai docents, in gracie dal Curriculum pal insegnament in lenghe e culture furlane di Siencis de formazion, te Universitât dal Friûl, e il Centri regjonâl di documentazion, ricercje e sperimentazion didatiche pe scuele furlane (Docuscuele), alì de Societât Filologjiche Furlane, che al propon cors (in linie o in presince) di grafie e gramatiche, storie, leterature, culture, in plui di incuintris di formazion cu la condivision di ideis e di buinis pratichis tra docents (Marilenghe&Mariscuele, Scuele di Avost), publicazions didatichis, ancje daûr de metodologjie CLIL (lait a dâ un cuc tal sît www.scuelefurlane.it) e tancj altris imprescj pe scuele, tant che il diari bilengâl Olmis.
◆ Magari cussì no, e mancje ancjemò une cussience di bande di tantis fameis (ma ancje di bande di coleghis docents e di dirigjents scolastics), convintis che il furlan a scuele al sedi dome cjançonutis di nuie e pierdite di timp. Forsit, pardabon, dongje dal insegnament par students e docents, bisugnarès meti in pîts un percors di sensibilizazion e di formazion par noaltris grancj, di mût di fâ viodi ancje ducj chei progjets di cualitât (e a son tancj, crodêtmi) che si puedin puartâ dentri des scuelis, cimiant pardabon al plurilinguisim e al aprendiment multidissiplinâr, cence pierdi di cualitât e soredut cu la trasmission di valôrs, emozions e passion ai fantats.
Gnove edizion dal dossier Mercator sul insegnament de lenghe furlane
Al è pene jessût dal scus ma al à za fat il zîr dal Friûl, cuntune vore di dibatiments e di propuestis di bande dal mont de scuele e dai aministradôrs. O fevelìn dal gnûf dossier “La lenghe furlane tal sisteme educatîf talian”, par cure di Ada Bier (Universitât dal Paîs Basc), Gabriele Zanello (Universitât dal Friûl) e Antonella Ottogalli (Docuscuele de Societât Filologjiche Furlane) pal Mercator – Centri European di Ricercje sul Multilinguisim e sul Aprendiment des Lenghis cun sede in Frisie (Paîs Bas). La publicazion, la uniche de golaine a presentâ lis traduzions dal inglês ancje par talian e par furlan, inte version di cjarte stampade de Societât Filologjiche Furlane, e salte fûr 10 agns daspò de prime edizion, par cure di Cinzie Petris, e e marche une situazion critiche pal insegnament de lenghe furlane. I dâts pal an scolastic 2022-223, di fat, a mostrin che 26.285 students a àn frecuentadis lis lezions di furlan tra lis scuelis de infanzie e primariis dal Friûl-Vignesie Julie, suntun totâl di 56.908 students, par une percentuâl dal 46,74%. Percentuâl che e je restade sù par jù stabile rispiet a dîs agns indaûr, aben che si sedin sbassâts i numars assolûts (in chê volte 32.130 students su 68.749). E se pe ex provincie di Udin o podìn dî di no vê masse fastidis (il 76% di students a sielzin di frecuentâ furlan), la cuistion si fâs grivie par Pordenon e Gurize, li che lis percentuâls si sbassin al 17% e al 8%.
◆ Lis trê zornadis di presentazion dai 11 ai 13 di Avrîl (inte Universitât dal Friûl, intun apontament a Udin par cure de ACLiF e a Codroip) a son stadis la ocasion par presentâ il percors che al à puartât ae realizazion dal dossier, in part risultât dal progjet “FURLEUS” di Ada Bier, finanziât dal program di ricercje e inovazion Horizon 2020 de Union Europeane cuntune borse di ricercje Maria Skłodowska-Curie ospitade de Universitât dal Paîs Basc. Cun di plui, al è stât presentât ancje l’operât dal Centri Mercator, in gracie dal intervent di Charlie Robinson-Jones.
◆ Il dossier al tache cuntun insuazament sul furlan e sul so status intal sisteme educatîf talian, cun aprofondiments e dâts sui diviers grâts scolastics (infanzie, primarie, secondarie di prin e di secont grât, ma ancje universitât e formazion pai adults). Po dopo, a vegnin presentadis ancje lis ricercjis sul ûs dal furlan tal sisteme educatîf, tacant des primis esperiencis de metât dai agns Setante. Par sierâ, a vegnin proponudis ancje pussibilis soluzions par miorâ il sisteme in vore ore presint, cuntun voli ancje ae pussibile autonomie scolastiche che e podarès jessi esercitade de volontât politiche.
◆ Il dossier si pues discjamâ (intes trê diviersis lenghis) dal sît dal Centri Mercator: https://www.mercator-research.eu/regional-dossiers/friulian-italy/. ❚
