![](https://www.lapatriedalfriul.org/wp-content/uploads/2024/07/image.jpeg)
✽✽ A son timps nereôs, cun aiars di vuere che a soflin sul mont. Chel che no varessin mai crodût che al podès tornâ al è li par verificâsi e no restâ plui dome une pussibilitât.
✽✽ Di chestis tragjediis i Furlans no dome a son stâts testemonis, ma tant che pôcs altris popui a àn patît in maniere tragjiche lis soferencis. Al è clâr che la pâs e je un ben primari di ogni uman, ma si pues declinâ la peraule, batile intai corteus, dispès tradintle daûr des simpatiis politichis o des sieltis ideologjichis. Insume la pâs puedie lâ ben par un cun dam di un altri?
✽✽ In fin dai conts la pâs vere il Friûl no le à mai gjoldude. Pensait ae sô storie milenarie, di chi a son passâts ducj, lassant daûr muart e distruzion, devastazions e miserie, lis nestris monts mudadis in trinceis, lis nestris planis in distesis di lapidis, i naziscj nus àn non fintremai cambiât il non: Adriatisches Kunstenland lu clamavin.
✽✽ Ancje la Italie e à fat la sô part, cun chê Vignesie Julie zontade par risultât de situazion post beliche a Triest. Intant nus àn jemplât di casermis, ancje di une base americane a Davian cun tant di bombis nucleârs. Savêso cemût che si clamave la prime linie difensive dal esercit talian? La “Soglia di Gorizia”. E veve di tignî bot al nemì, i cjararmâts rus e chei dal Pat di Varsavie, par pôcs minûts, intant che i lôr missii e lis lôr bombis a saressin coladis sui stabiliments chimics di Tor di Zuin produsint un nûl tossic che al varès involuçât il rest dal Friûl.
✽✽ A someavin timps lontans, un passât di dismenteâ pai “danni collaterali” causâts di chestis presincis ae nestre economie, ma dut câs une ereditât no preseade.
✽✽ E invezit venus chi intune Europe che no je buine di jessi protagoniste intal scuintri tra lis potencis, vitime ancjemò une volte di chel nazionalisim chauvinist che no le à abandonade mai, une Europe dai Stâts e no dai popui, cemût che i autonomiscj a àn sostignût simpri, cul pericul aes elezions prossimis di jessi guviernade di cui che al è simpri stât nemì di dutis lis minorancis, scomençant di chês etnichis e linguistichis.
✽✽ Ce fâ alore? O podìn meti il cjâf sot dal savalon e spietâ che il destin al fasedi il so, ma savint che i prins che a viodaran tibiâts i lôr dirits o sarìn nô furlans, sarts, slovens, sudtirolês, catalans, bascs, ocitans e ducj i popui che a olsaran inschiriâsi cuintri il centralisim.
✽✽ Preparìnsi, tant o sin usâts. ❚