Cun “Trente” a segnin il passât
e il futûr de gnove musiche furlane
Trente agns indaûr, inte Vierte dal 1993, al vignì fûr un album che al rapresente ancjemò il principi uficiâl de ‘gnove musiche furlane’. Une misture di rock, folk, ritmis balcanics e rap, intitulade “Ratatuje”, fate in pôcs dîs di un grup che al sunave dute une altre musiche, e che po dopo e je deventade un toc di storie: i FLK (Furlan Liberation Kongress).
◆ Chest an ju tornìn a cjatâ in ducj i festival di musiche e spetacui, par celebrâ cun lôr il gnûf album, jessût tal Istat dal 2023.
“Trente”, trente agns, chei de lôr cariere, regjistrat dal vîf dilunc di un conciert memorabil, tal auditorium di Prissinins te suaze de Fieste de Patrie dal Friûl.
◆ Chest gnûf lavôr che al festeze i trente agns dal grup, al ten dongje 19 cjançons che a son un omaç ai lôr tocs plui preseâts e significatîfs. Pensait dome che il prin toc che a àn scrit insiemi al e stât “Carillon”, tal 1989, vincidôr dal Premi Friûl.
Come che a contin «no si trate di une celebrazion o dal funerâl dai biei timps, ma a son un vêr e propit inizi. Tornâ a cjapâ in man il nestri repertori al è un mût di inaugurâ une gnove narazion condividude par puartâ ancjemò une volte il mont tal Friûl».
◆ Cui che al à vivût i agns Novante nol pues no cognossi lis lôr cjançons iconichis, tant che “My Sarajevo,” “Ratatuie,” e “Tu tramontis.” A son tocs che a àn segnade dute une gjenerazion pe lôr sensibilitât sociâl e politiche fuarte.
Intun timp dulà che la vuere e torne a fâ tremâ i nestris confins, a proponin ancje “Un soldatin” dal Povolâr Ensemble di Giorgio Ferigo. Peraulis che a restin atuâls e nus disin che disertâ nol domande mancul valôr dal combati. I FLK a restin simpri impegnâts e cu la lôr musiche a puartin un messaç di pâs, diversitât, libertât, coragjo e sperance che mai plui di vuê al pues jessi atuâl.
Al amì e poete Federico Tavan, i àn ancje dedicât l’album “Adieu monsieur Federicò”, jessût tal 2015 e ancje chest toc intramontabil al fâs part dal gnûf album “Trente”.
I FLK a son te ultime formazion: Cristina Mauro ae vôs, Stefano Montello ghitare e vôs, Loris Luise aes percussions e vôs, Alessandro Montello al piano, sintetizadôr, armoniche e vôs, Flavio Zanier al bas, piano, cuintribàs e vôs e infin Federico Montello tant che baterist e produtôr musicâl.
◆ Cun lôr a àn sunât plusôrs musiciscj che a àn cjapât stradis diviersis. Dal 1995 al 2000 a àn dade la idee che la gnove musiche furlane, leade aes lidrîs, ma plui eletriche e percussive, e ves la pussibilitât di rivâ a un public forest ancje se in lenghe furlane. Tai ultins agns, di une impostazion rock a àn virât plui viers une musiche folk jazz, in version acustiche, ma simpri par furlan.
«No vin bisugne di justificazions par cjantâ par furlan. Di mil agns la nestre int e fevele cheste lenghe. No lu fasìn par no jessi capîts, lu fasìn parcè che o sin diferents, parcè che ducj a son diviers di ognidun e insostituibii. La diversitât no je une mode. E je un pinsîr. Il jessi stes de umanitât. O podaressin cjantâ intun altre lenghe, ma fasint chest, no saressin plui no stes».
◆ Daspò di siet albums e di une “polse par pensâ” a son tornâts parsore dai palcs e noaltris no podevin domandâ di miôr di cussì! Te ultimate edizion di SUNS Europe 2023, i FLK a jerin i tant spietâts ospits speciâi dal concierton.
No podìn spietâ di scoltâju ator pal Friûl e pal mont. Intant lait a scoltâ i tocs in digjitâl sul lôr canâl YouTube (https://www.youtube.com/playlist?list=OLAK5uy_kSNR7arn_TH7yZe-XsbV3vNxt6kUTkjO4) e stait daûr al lôr Facebook https://www.facebook.com/mitiliFLK par scoltâ lis diretis e savê dai lôr prossims apontaments.” ❚