Belen, divinitât panceltiche venerade in buine part de Europe, diu protetôr di Acuilee, cjapât sù in forme sincretiche dai Latins fin de Tarde Antichitât, al à gjoldût di une fortune grande e sflandorose. La etimologjie dal so non e volarès dî “riflès dal soreli su la ingrispadure da la aghe”: e di fat, al è il simbul de rinassite de lûs daspò de lungje gnot invernâl. Divinitât solstiziâl – celebrade te Patrie tant la gnot dai 24 di Jugn che inte grande Vilie dai 24 di Dicembar, cui siei tancj capitei sparniçâts inte campagne aquileiese cun tant di dediche votive e cu lis numerosis statuutis gjavadis fûr di sot tiere dai archeolics e che a rapresentavin chel Apol-Belen cu la carateristiche corone a cinc pontis, simbul dal Soreli –, al è jentrât a pôc a pôc tal cult dai Cristians, cjapant sù daûr des voltis la muse e i simbui di Sant Zuan Batiste o dal stes Crist. Al è jentrât a plen dirit intes cerimoniis dal folclôr, jenfri lis faliscjis dai pignarûi, inte ruede infogade des cidulis, intes rapresentazions simbolichis tant misteriosis dai mosaics di Acuilee, o ancjemò pituradis o sculpidis su la muse des glesiis che de Basiliche Mari a seguissin i trois antîcs pal Noricum, la grande regjon che e cjapave dentri buine part de Carinzie e de Slovenie di cumò. Al reste, ore presint, un simbul potent e plen di magjie par ducj chei che a cjalin la gnot plui scure di un Invier dal presint cu la sigurece che prime o dopo Belen al tornarà, cu la sô lûs, a stiçâ lis cussiencis par che a sepin imagjinâsi un Friûl diferent e soredut libar. ❚
“Se tu ciris ispirazion, prove a lassâmi chi, sot dal altarut di marmul, une fuiace di mei impastade cu la mîl. A saran almancul mil agns che o tiri la gole, ma nissun mi puarte plui nancje une gruse di ufierte”. Mi cjali ator ma no viôt anime. Il cîl di Acuilee in chestis zornadis di Dicembar al è sflandorôs. Il frêt al cisiche tes orelis, ma ti console une lûs clarissime, che e somee cjantâ l’avent dal Solstizi di Invier, che o celebrarìn di chi a cualchi zornade. I miei pas a cricin su la glerie dal biel viâl dal vecjo puart fluviâl, ma no sint nissun altri rumôr e dulintor di me nol è nissun: “Cjale chi po, parsore dal capitel”. O alci i voi, e propite parsore dal monument dedicât al diu Belen mi pâr di viodi un alc. Un lamp, un riflès, mi pâr. Un zûc dal soreli in cheste ore che e sbrisse svelte sul savôr de sere.
“Tu âs intervistât par un an intîr personaçs de culture, de storie, de leterature furlane. E jo? Ce soio? O voi trastolon di miârs di agns pai trois di cheste Tiere. O ’nd ai viodudis di musis, o ’nd ai cerçadis di etis. O savarai esprimiti un pinsirut, no crodistu? Ti confessi che un tininin mi consideri escludût. Ancje ofindût. Oh, i umans! No rivin mai a vêti agrât, di memorie curte, si dismentein svelts di ce che si à fat par lôr”.
E je vere che il vin in Acuilee al è straordenari, bon, pastôs e profumât. Dal timp dai Latins in ca al è cognossût e preseât. Ma no crodevi di vê bevût cussì tant di imagjinâmi un incuintri come chest. Cussì, tant par butâle in ridi, o stoi al zûc cu la mê cjoche e mi tiri dongje dal altarut: “Siôr Belen preseât, us presenti i miei rispiets”, e mi inchini un pôc inte sô direzion. “No sta fâ il bulo. Chi no si trate di vin, matucel, ma di une aparizion. Probabilmentri la mê ultime, in cheste Tiere, dal moment che le ricognòs simpri di mancul. Anzit, par dîle dute e francje, par rivâ fin chi, a Acuilee, la mê citât, mi soi ancje pierdût. Tarondis, autostradis, deviazions par lavôrs, une perifarie dute compagne plene di capanons, supermarcjâts, magazins, vetrinis. Un lusôr tant di gnot come vie pal dì. Ma ce staiso fasint? Nancje Atile al veve olsât cussì tant! Cussì, cirint di visâmi la vecje strade, mi soi pierdût su chê gnove. Ce malatie vêso cjapade? Chê di jemplâ dut di asfalt e di ciment?”. O tachi a pensâ che forsit nol è il bon Refosc che al sunsure pinsîrs stramps al gno cjâf, ma che salacor alc di maraveôs mi sta sucedint propit a mi, chi, in chest moment. E alore o insist: “Tu as di perdonâmi. Nol capite mighe tant dispès di fevelâ cuntun Diu!”. E lui, sgagnint: “O varessis di jessi ben usâts voaltris Furlans, dal moment che tancj di lôr, crodint di jessi divins, nancje si sporcjin a fevelâ cun voaltris. O stoi pensant a dute chê galarie di galantoms che a presumin di vê cjapât sù il nestri puest e a restin sentâts sui lôr trons, ven a stâi ducj chei predis curiâi, o piês ancjemò chei galantoms de politiche plui o mancul alte, i funzionaris des istituzions, plui o mancul inutilis. Vuelistu che o ledi indevant?”.
Mi plâs la ironie che e sclopete in cheste vôs che e fevele di dentri di une lûs che mi inçussìs i voi: “Mi somee che di là sù tu rivis a viodi tantis robis!”. La flame di aur e fâs une vampe, e devente rosse, come rabiose: “Sbaliât! Jo o soi stât par agnorums un diu furlan che nol à mai vude la usance di cjalâ il mont di là sù. Mi soi simpri impastât cu la Tiere. O soi la anime di ogni risultive. La linfe che us puarte lis rosis, il forment, la ploie. Cemût podaressio fâmi une idee dal Friûl se o vivès lontan di voaltris?”. Mi ven di ridi pensant che plui di cualchi governadôr o assessôr lu fâs di simpri, e pûr al pretint di jessi autorevul e profont cognossidôr de int che al è clamât a aministrâ.
Cumò no volarès jessi stracapît. Nol è che cun cheste ultime pagjinute mi sedi votât al mont paian, funzionant lis mês preieris al diu Belen. Però, ce che mi conte mi pâr sensât. E mi convinç, Refosc o no Refosc, che al è cetant plui sintiment parsore di chê piçule piere epigrafade a Acuilee, che in dute la presunzion che e salte fûr di ogni scansel di tancj di chei uficis, chi di nô, che magari cussì no!
E alore, no sai voaltris, ma inte lungje vilie dai 24 di Dicembar, dome par precauzion, une fuiaçute di mei e di mîl jo le poi sul capitel. E magari o voi ancje a trai cualchi cidule. E o buti alc di vecjo tal fûc dal pignarûl. Cussì. Tant par restâ dentri dal agâr de tradizion. E tal cûr de gnot, o alçarai i miei pinsîrs e bogns proponiments par che i progjets inmaneâts pal an che al ven a vadin in buine. Ae fin, nol sarà come presentâ une domande intai uficis de “Regjon Friûl-Vignesie Julie”. Ma almancul, e di chest o soi sigûr, mi divertirai une vore di plui!
E, tal non di Belen, augurons a ducj di bon finiment e di bon principi.. ❚
Angelo Floramo
Apontaments / Tarcint, Vinars 6 di Setembar aes 18, Presentazion dal libri “Feminis furlanis fuartis” di Erika Adami te terace de Biblioteche Comunâl
Redazion
L’apontament si tignarà doman, Vinars ai 8 di Mai, aes 18, te terace de Biblioteche Comunâl, vie Divisione Julia a Tarcint. La Aministrazion Comunâl di Tarcint cun la Comision de Pari Oportunitât nus invide ae presentazion dal libri di Erika Adami “Feminis furlanis fuartis” che viodarà la partecipazion di une protagoniste dal libri e de […] lei di plui +
L'EDITORIÂL / LETARE AL GNÛF VESCUL. LA LEZION DI AQUILEE NO VA DISMENTEADE
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
L’EDITORIÂL / Letare al gnûf Vescul la lezion di Aquilee no va dismenteade
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin
Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +