A TU PAR TU. La feste de Patrie di Arnalt

“Se tu vuelis cheste interviste, tu âs prime di spiegâmi ce che al è sucedût in Consei Regjonâl in chei dîs passâts! Che il scjas al è stât ben grant, e al è pardut un grant tabaiâ. Ma chi, lis ediculis no son mighe tant furnidis. Se tus sês fortunât e rive la Vite Catoliche, chê sì. Nuie altri”. Mi somee inrabiât l’onorevul. E soredut impazient, cussì o cîr di rispuindi in pocjis peraulis: “Al è stât un biel burlaç. Il contindi: la Fieste de Patrie!”. Mi discocole doi voi sglonfs come dôs coculis: “Ce àno, ancjemò cualchi probleme a sostignî il sacrisant dirit di un popul a gjoldi di un zornade di fieste? Insome, cuant che no tu scombatis cuintri di nissun ma tu pandis il plasê di jessi braurôs de tô storie, no tu fasis nuie di mâl!”. No savarès cemût metile jù cence fâ masse scjas, e o continui: “In efiets, plui di cualchidun al à tirade fûr la cuistion de identitât nazionâl, ven a stâi chê taliane, là che ducj a puedin ricognossisi, e no dome i furlans. E che une zornade dedicade ae Patrie e sarès esclusive, duncje une zornade cuintri chei altris”. Si agjite, l’Onorevul, e intant che o feveli al svintule une copie de Unità come se al ves di copâ cualchi moscje fastidiose. “Po si sa, simpri chei fassistats, pronts a striçâ sot dai pîts lis resons de storie. A àn pierdude la vuere, ma no àn mai molade la prese. Travistîts di mil gabans, a son simpri chi a rompi i cits cu la lôr arogance e cu la…”. Mi tocje interompilu sul plui biel de sô tribune. Mi displâs, parcè che cuant che Baracet al fevele, la sô passion si sglonfe e e cjape il svol, cul so furlan di bassarûl, e il sanc ros e sclet come chê bandiere che lui al à onorade par dute la sô vite. Dongje di chê altre, chê di Bertrant, cence mai sintîsi in contradizion par chest. Cussì, o doi une sgrasaiade ae vôs e o provi a fâi capî la cuistion, ancje se o crôt propit che no sarà une robe facile: “A dile dute… no dome chei. Insome, une buine part dal PD e jere cun lôr. Anzit. La maiorance.” Diu nus deliberi. Come il lamp e il ton, la rispueste no si fâs spietâ: “Se tu âs voie di coionâmi, tu puedis ancje lassâ intindi che il PD al è al guvier de Italie cu la diestre! O sarai ancje muart, ma mighe par chest no soi deventât stupit!”. E cumò, cemût fasio jo a spiegâi che e je propite cussì? Che in cheste nestre (?) puare Italie, il circ al è il riferiment plui facil par rivâ a spiegâsi cemût mai che cussì tancj paiaçs a puedin ancjemò cjoli pal cûl un paîs? Le grandi intese! O ai miôr tasê, e insisti su la cuistion furlane. “E invezit, ancje se al pâr dal impussibil, e je vere. Chei dal PD cu la diestre a disin che il progjet di une fieste che e ricuardi il 3 di Avrîl e sarès un erôr. Une azion che e puce di anticostituzionalitât e di regjim”. E chi, dute la anime libertarie di Baracet e cjape fûc tant che il pignarûl grant di Tarcint: “La Costituzion! Lizzero, che al jere dal PCI come me, lui sì che al veve ancje scombatût par che e nassès, cheste benedete costituzion. E pûr, lui al à ancje scombatût cun me pe dignitât e pe libertât dal popul furlan, insiemi cun ducj chei altris che a vivin, che a pensin, che a scrivin, che a produsin art, sience, leterature jenfri i confins dal Stât talian. E pense tu che al jere il 1973 cuant che o discutevin insiemi de fuarce dal articul 6 de Costituzion, là che si tutelin lis minorancis. Fuarts di chê concuiste, tal 1976, cuntun Friûl sdrumât dal Orcolat, o vin pandude chê famose scriture, là che tal prin articul si sosten che: “La Republiche, in osservazion dai dirits civîi e democratics stabilîts de Costituzion, e protêç il patrimoni linguistic e la culture des popolazions dal Friûl”. O cîr di inserîmi in cheste straordenarie e passionarie fuarce di peraulis e di ideis: “E propit su chest, i contraris ae fieste, chei di çampe, si son impontâts, disint che lis celebrazions a escludaressin ducj chei altris popui che no son furlans: todescs e slovens”. Al cjale jenfri i nûi, l’Onorevul, come a cirî une conferme a ce che al sta par dîmi: “Tu no tu mi crodarâs, ma cualchi minût fa, prime che tu rivassis, o stevi fevelant cun Indrì e cun Siart. No stâ a maraveâti. Chi si cjate di dut, come su la place di Codroip la dì di marcjât. Clarementri, libars di ogni preocupazion, lambic e miserie umane, si piticavin fevelant di ce che nus è simpri plasût di plui. Ven a stâi, il Friûl. Alore, o vin scuvierzût che ducj i trê o vin vude la furlanetât come malatie. Siart si sintive plui patriarcje di Acuilee che vescul ubidient di Rome. Indrì, che al clamave cheste tiere cussì straordenarie e uniche “il zardin dal imperi”, mi à confessât che – passant pes nestris contradis – si dismenteave fintremai di jessi imperadôr. E jo, che tu sâs benon che o soi simpri stât un comunist convint, mi soi simpri sintût un comunist furlan, prime di dut. E cence mai pensâ di contravignî a nissune coerence, anzit. O podarès dîti cun sodisfazion di jessi stât un bon comunist propit parcè che mi soi doprât pe dignitât dai popui, e mai pe ambizion dai lôr sorestants. Chei che cumò no si cjatin mai dacuardi su nuie, fale che su pe tutele dai lôr vitalizis.” Sburtât de onde di cheste idealitât, o cjapi il coraç par stiçâlu ancjemò un poc: “E la cuistion di une fieste esclusive plui che no inclusive, come che a disin i gjornaliscj e i politics triestins?”.  L’Onorevul si lasse scjampâ une ridade: “Intant, al sarès ben che chei galantoms a tornassin a lei il diplome imperiâl che al fonde la Patrie dal Friûl. Il Patriarcjât al jere une istituzion là che ancje slâfs e todescs a condividevin il privileç di gjoldi di une cundizion cetant moderne e gnove, là che si fondave une rapresentance, un dirit a pandi la vôs di ducj, e di rispietâ ducj. La fieste de Patrie e sarès la fieste di ducj. Un alc dal savôr unic in dute Europe. Chei che no rivin a capîle a son in malefede. E cumò, lassimi lâ. O scuen organizâ cun sant Simon (chei di Codroip a fasin simpri front comun…) un coletîf proletari e autonomist cuintri de centralizazion dal podê intes mans di Sant Just: che al vedi cjapade sù la rascje di Triest?”. Al pinsîr che ogni “altri mont” al sedi paîs, mi ven cuasi di ridi. Ma mighe trop! ❚
__
Arnalt Baracet (Codroip 1931- Udin 2012), deputât dal Partît Comunist talian dal 1976 al 1987, furlanist convint, autonomist, al à simpri lavorât pe identitât dal popul furlan. In gracie di un so emendament, la Universitât dal Friûl e ven ricognossude tant che une istituzion che e contribuìs al progrès civîl, sociâl e ae rinassite economiche dal Friûl, par deventâ un strument di disvilup e di rinovament de culture, de lenghe, des tradizions e de storie. Tal 1978 al presente la propueste pe valorizazion de lenghe e de culture furlane, la mari de leç 482/1999. Al à ancje scombatût parcè che la RAI e inmaneàs trasmissions in lenghe furlane e par che la scuele e garantìs l’insegnament dal furlan. ❚
Angelo Floramo