Il Ministri dai Internis austriac al smire di gjavâ vie dal dut lis armis in public e al à dât incarghe a esperts dal ministeri e des direzions locâls di polizie di meti adun un progjet di leç di pueste. Il fin al sarès chel di improibî dal dut l’ûs des armis fûr di cjase. Si domandìn ce che al cambiarà cuntune leç di chest stamp, stant che za in dì di vuê lis armis a son proibidis in public. Prin ancjemò o vin di sclarî il concet stes di arme, che nol sarès dal dut clâr: daûr de Leç su lis Armis, si tratarès di “imprescj che pe lôr nature a varessin di eliminâ o ridusi la capacitât di atac o difese des personis midiant di un efiet imediât o chei che si puedin doprâ pe cjace o pal tîr al bersai”. A son cjapadis dentri dutis lis armis par trai, ma ancje il pevaroncin al è une arme, che dut câs si pues tignî cun se in public pe difese personâl. Un curtissut di sachete pe mirinde o un curtìs di cusine no son cjapâts dentri, tant che invezit une mace di baseball, se puartade in citât. Se però un i des cuintri a une persone cuntun curtìs di cusine o cuntune butilie rote, alore, stant al codiç penâl, al cometarès une “agression armade”. A son dut câs calcoladis armis i curtìs a scroc, lis curtielis e lis britulis e lis armis ae “James Bond”. Duncje une femine no puedie plui puartâsi daûr un spray al pevaroncin? Se chest al vignìs lassât fûr de leç, alore no si tratarès plui di une improibizion gjenerâl. In cualsisei câs, a varessin di jessi lassadis fûr – come che al è stât fin in dì di vuê – lis armis di cjace e chês di tîr al bersai sportîf, che si puedin puartâ in public a cundizions precisis: a àn di jessi scjamadis e metudis intun satûl sigûr. Lis pistolis si puedin puartâ daûr cuntun “puart di arme”, intant che cuntun “certificât di possès” si puedin movi di un puest a chel altri, par esempli sul percors lant o tornant de armarie.
◆ I reâts cui curtìs a vegnin fats soredut cun curtìs sempliçs di cusine e avonde da râr cui curtìs nomenâts intes leçs su lis armis, si che duncje a saltin fûr altris dubis: ce capitaressial cuntune strente de leç? Cui varessial di fâ i controi? Cuale saressie une reson di suspiet fermant salacor une clape di zovins? Un control al sarès pussibil se la leç e previodès la pussibilitât di un control intun moment cualsisei, ma e sarès une violazion fuarte dal dirit costituzionâl. Stant al Ministeri dai Internis, un “compuartament suspiet” al sarès dut câs e simpri un motîf bon par un control.
◆ Za in dì di vuê e esist la pussibilitât che lis direzions di polizie dai singui Länder a podedin istituî – par un timp fissât – zonis proibidis aes armis, tant che par esempli che il Wiener Praterstern e dôs areis a Innsbruck.
◆ Par sghindâ delits in câs di grandis manifestazions, la definizion di arme e je salacor scjarse e une legjislazion istintive e podarès puartâ a problemis sociâi e politics.
◆ Ancje in Carinzie a saltin fûr dubis e domandis sul cont di cheste gnove propueste di leç, par vie che al continue a cressi il numar dai possessôrs di armis, stant che simpri plui personis a van a cjace, o si apassionin a sports tant che il tîr al bersai, o salacor par vie che a sintin la dibisugne di une arme pe lôr sigurece.
◆ I permès par tignî lis armis e i “puarts” a vegnin dâts fûr dal ufici distretuâl competent pes armis di Clanfurt e dai comissariâts di polizie. Par lôr, la leç atuâl e funzione za ben e dut câs la grande criminalitât si zove pe plui part di armis ilegâls, che cuintri di lôr cualsisei leç e varès pocje fuarce.
◆ Une arme dentri di cjase e à sens dome se si sa a doprâle une vore ben. Cun di plui, e à di jessi tignude al sigûr, se no e sarès plui dispès une risultive di pericul. Il diretôr dal ufici distretuâl competent al dîs che il sisteme di sigurece de Carinzie al funzione benon e duncje nol coventarès zirâ armâts pal teritori. E reste la curiositât di viodi cemût che al vignarà metût adun il gnûf dissen di leç. ❚
Abolizion des armis… ma ce si intindial par “armis”?
Barbara Cinausero![](https://www.lapatriedalfriul.org/wp-content/uploads/2024/06/confisca-armi-1.jpg)