Ogni an, come par tradizion inte dì di Sante Caterine, la Societât Filologjiche Furlane e à presentât il Strolic furlan pal an gnûf. Tal salon di onôr di Palaç Mantica a Udin Martina Delpiccolo, cu lis musichis di Gianni Fassetta e Giovanni Maniago e lis leturis di Dolores Miotto, e à mostrât in struc lis tantis gnovis stuzighinis che che a son tal volumut rivât ae edizion numar 105, metût adun di Dani Pagnucco e che al compagnarà i letôrs par dut il 2024 cun contis, poesiis e rubrichis scritis tes diviersis varietâts dal furlan: tra i tancj, a àn scrit Gianni Colledani, Angelo Floramo, Laurin Zuan Nardin e 12 autôrs de Cjargne pe rubriche “Linda cjargnela”. I dissens a son di Annalisa Gasparotto e Oriana Cocetta.
◆ Il Strolic pal 2024 al presente mês par mês une biele schirie di rosis che a cressin inte nestre regjon: cutuardis speciis fotografadis di Serena Chiapolino e descritis di Alberto Candolini, sieltis fra lis cirche 3500 che o vin sul nestri teritori. Si à sielt prin di dut lis plantis raris e chês che a vivin nome te nestre regjon, po i diviers ambients di partignince, in mût di spaziâ il plui pussibil ta cheste biodiversitât maraveose: no dome la mont ma ancje lis risultivis, i magrêts de Celine-Midune, il Cjars. Infin si à cirût la singolaritât dal scat fotografic, parie cu la bielece de plante. Lis didascaliis a presentin il non sientific latin, il non talian e il non furlan, cuant che si à rivât a cjatâlu.
◆ Cul Strolic al è stât presentât ancje il “Lunari” de Filologjiche, stampât cu la poie di Civibank. ❚
Ae scuvierte dai plui biei flôrs dal Friûl cul “Strolic furlan” pal 2024
Redazion
