La edizion numar 11 dal festival direzût
de flautiste furlane Luisa Sello
e je pronte a scomençâ
Al cjape ispirazion dai agnui indicadôrs, prin di ducj chel dut di aur che si viôt sul cjampanili de glesie di Sante Marie dal Cjistiel di Udin, e aes segretis, chei lûcs che a son presons, scjaipulis, puescj platâts e plens di storie e di misteri. Al è il “Festival Udine Castello” organizât dai Amîs de Musiche di Udin che al rive ae sô edizion numar 11. L’event al è direzût de flautiste di innomine internazionâl Luisa Sello, ambassadore furlane de musiche intal mont, che e zire par concierts e docencis in lûcs preseâts sedi in Europe, che intes Americhis e in Asie. Cheste gnove anade e je incentrade sul fâ cognossi lûcs dismenteâts dal Friûl par proponi concierts e incuintris di nivel alt cun artiscj internazionâi in ambients inedits cun vocazion turistiche. Volê pontâ la atenzion sui agnui che a segnin il lâ dal vint, un patrimoni e une particolaritât trascurade de nestre tiere, e invidâ ae cognossince, cun visitis vuidadis di esperts in lûcs platâts, dispès sot tiere, e je une iniziative une vore origjinâl. Dut chest, par pontâ voi, orelis e la curiositât su prospetivis gnovis e scoltis di musiche cuntun rai di propuestis une vore larc, dal Rinassiment ae contemporaneitât, in graciis di soliscj, grups e orchestris, là che no mancjaran propuestis leadis ae storie musicâl e no dome dal Friûl.
◆ Dai 5 ai 26 di Mai a saran dîs i apontaments che si davuelzaran a Udin, Cividât, Palme, Dartigne, Murùs, Grau e Rosacis, cun chê di cognossi e esplorâ agnui sui tors e segretis o presons.
◆ Il prin apontament al è domenie ai 5 di Mai aes 11 tal Salon dal Parlament di Udin, cu la Orchestre di arcs “Arrigoni” di San Vît dal Tiliment, direzude di Domenico Mason, che e sarà insiemi al pianist ecletic di grande innomine Andrea Bacchetti, par un program che al met dongje Mozart e Nino Rota a 45 agns de sô muart.
◆ Domenie ai 12 di Mai, aes 4 dopomisdì inte glesie di San Pieri ai Volts di Cividât, anticipât di une visite tal Ipogjeu celtic, l’insiemi di flauts e di microteatri “Lis Aganis” al sunarà un program cun musichis ancje di autôrs furlans o che a àn operât in Friûl, come Orologio e Mainerio, e dongje di lôr Ryerson e Praetorius. Lis esecuzions si daran il turni cun leturis sul teme des aganis e dai benandants.
◆ Joibe ai 16 di mai, aes 5 dopomisdì intal Tor di Sante Marie a Udin, al larà in sene un duel musicâl, come che si faseve une volte, ricuardant chei tra Händel e Scarlatti, Mozart e Clementi, Beethoven e Jelínek, Liszt e Thalberg. In chest câs a zuiaran in cheste simpatiche sfide, cu la votazion dal public, doi zovins pianiscj che a frecuentin di un biel toc il Friûl: Emma Brumat e Paolo Zentilin. Il dì dopo, vinars aes 5 dopomisdì li dal Baluart Garzoni di Palme, cun prime une visite ai Bastions, al sunarà il “Trio Tempestoso” dal clarinetist Andraž Golob, dal violoncelist Urban Megušar e de armoniciste Sanja Mlinarič, cuntun program cun musichis di Stravinsky, Haydn e Piazzolla. Cheste esecuzion e vignarà replicade il dì dopo inte glesie di Sant Martin a Dartigne, anticipade di une visite tal cjistiel.
◆ Domenie ai 19 di Mai, intal Museu di Cjase Cavazzini a Udin, aes 11 di buinore, al sarà ospit il l’innomenât violoncelist Giovanni Gnocchi, che al sunarà une racuelte di musichis intitulade “Des corts aes galeris”, cun oparis di Ortiz, Kurtág, Gabrielli e Dall’Abaco. In chest câs l’apontament al sarà anticipât di une visite aes presons dal cjistiel.
◆ Si rive cussì tal ultin fin di setemane, cuntune rose di cuatri apontaments. Ai 24 di Mai aes 19.30 inte Vile Perabò della Savia di Murùs, cuntun ghiringhel di bande de Pro Loco, al sunarà il cuartet di arcs DCMF Korea, un insiemi corean preseât che al dedicarà un program a Brahms e a Beethoven. Sabide ai 25 a son doi i moments di incuintri: il prin al è aes 11 inte Tor di Sante Marie in vie Zanon a Udin, cul musicolic Danilo Prefumo che al tignarà une conference cun proiezions sonoris dal titul “La musiche in Friûl ai timps de Serenissime”; invezit aes 8.30 sot sere inte Basiliche di Sante Eufemie a Grau, il diretôr di orchestre armen Nurhan Arman al direzarà la orchestre furlane “Naonis Donatello” in composizions di Vivaldi e dai compositôrs contemporanis Carlo Corazza e Valter Sivilotti. Ultim apontament domenie ai 26 di Mai aes 4 dopomisdì inte Badie di Rosacis, cuntune visite tal munistîr. Al sarà il “Trio Haydn” formât di doi flauts e un violoncel a fâ sintî bielis musichis, caladis tal contest, di Haydn, Mozart, Sammartini e Purcell.
◆ Al è tant Friûl in chest Festival, sedi pai lûcs e pai panoramis, tra agnui e segretis, ma ancje cun bastions, muris, spazis evocatîfs sore e sot tiere. Dongje di lôr, lis musichis: cun autôrs furlans o che a àn vivût in Friûl in confront cun compositôrs storics de mitteleurope. La plui part dai concierts a àn jentrade gratuite, invezit pes visitis si pues consultâ il sît www.amicimusica.ud.it par ogni informazion. Il “Festival Udine Castello” al met insiemi tancj comuns e si inmanee in graciis di une convenzion cul European Festival Association e dal contribût dal Ministeri talian de Culture, de Regjon Friûl-Vignesie Julie, di Promoturismo, de Fondazion Friûl, de Cjamare di Cumierç di Udin, dal ERT e di tancj sponsor privâts. ❚
