Ai 3 di Avrîl une fieste pal avignì

Parcè celebrâ dopo 946 agns la Fieste de Patrie dal Friûl? In fin dai fats al è dome il ricuart di une antighe invistidure medievâl, di chei che la modernitât e scjampe vie cuasi cun fastidi. E alore parcè sintìno a fuart la dibisugne di fermâsi e di tornâ a tirâ fûr une des bandieris plui antighis de Europe? Ancje se al pues someâ strani par un popul che al tint a jessi risiervât e pôc puartât ae ostentazion tant che i furlans, la veretât e je che nus covente tornâsi a peâ a chel passât par vê une fonde dulà fâ sù il nestri avignî.
◆ Pôcs popui a puedin lâ tant indaûr intal timp par recuperâ lis lidrîs de lôr specialitât. Un vêr patrimoni, che in realtât nus ven di ancjemò plui lontan, impastanât za tacant dal cristianisim sincretic e inclusîf di Aquilee, dulà che l’incrosâsi di int, di lenghis e di cults al è stât bon di produsi une identitât une vore origjinâl: tant particolâr di resisti ai diktats papâi e imperiâi cul Schisme dai Trê Cjapitui, che intal 557 al à trasformât i vescui di Aquilee in Patriarcjis. Par dute une fete dal mont mitteleuropean, mediterani e danubian, za tant prime dal 1077 chescj clerics a jerin un riferiment teologjic e culturâl di prin plan (baste pensâ a Paulin di Aquilee e al so rapuart cun Carli il Grant). Intal secul X a àn acuisît ancje podê politic, e intal XI a jerin pronts a deventâ vescui conts, no indipendents ma dotâts di sovranitât – a batevin monede, a vevin un esercit, a esercitavin la justizie in autonomie totâl – e di une capacitât di inovazion ancje istituzionâl avonde fuarte.
◆ Nol è un câs se propit inte Patrie dal Friûl si à disvilupât un dai Parlaments plui antîcs di Europe, o ben une assemblee rapresentative là che a vevin vôs no dome ducj i rancs (i nobii, il clericât e lis comunitâts) ma ancje dutis lis diviersis componentis etnolinguistichis che a formavin il grant mosaic di un Stât multiculturâl e plurilengâl: ognidun al podeve esprimisi te sô lenghe, parcè che la Patrie e jere za – plui di 600 agns prime de definizion famose dal Nievo – un “piçul compendi dal univiers”. Anzit, viodût che chês lenghis a apartignivin, e ore presint a apartegnin, aes trê civilizazions che a àn formât il continent (latine, gjermaniche e slave), o podìn dî che il Friûl al jere Europe za prime che e esistès la Europe. “Unitât inte diversitât”, al è il sproc de Union Europeane: e la dimostrazion che chest al è pussibil le vin vude par 343 agns propit de Patrie, che e à incjarnât chest principi in mût concret.
◆ Il 3 di Avrîl al è la date che e dimostre par tancj furlans la dibisugne di viodisi ricognossûts tant che entitât proprie che no vûl fâsi slungjâ in realtâts aministrativis o istituzionâls eterogjeniis, cui lôr centris decisionâi che si slontanin des comunitâts. Di fat, la Patrie e jere no dome il ream dai Patriarcjis, ma ancje un regjim di prossimitât dulà che (plui par costum e dibisugne che par motîfs ideâi) l’autoguvier al jere esercitât tacant des viciniis, dai conseis dai cjâfs di famee di ogni vile. Par chest, ogni riferiment ae autonomie nol pues mai jessi sleât de ricostruzion dal sens di comunitât: parcè che cence di chel, cence l’empit che al ven de condivision di une identitât che e nas di une storie, di une lenghe e di valôrs comuns, ogni fieste e reste dome une date sul calendari. Il 3 di Avrîl invezit al pues jessi une ispirazion vere pai furlans di vuê e soredut par chei di doman, che a podaran jessi braurôs di fâ part di une tiere che e je di simpri autonomie e inclusive, inovative e plurâl. Une des plui speciâls dal mosaic clamât Europe. ❚