E in Gjermanie lis politichis pes lenghis “altris”
a son di nivel bon
Aiar gnûf a soreli jevât e confermis positivis te zone centrâl. Nol è un boletin meteorologjic, ma une sorte di rapresentazion di cualchidun dai fats plui interessants che a son stâts in Europe jenfri Març e Avrîl.
Lis bugadis di aiar orientâl a rivin des elezions presidenziâls in Slovachie e di chês aministrativis in Turchie. La balotazion dai 30 di Març e conferme il risultât positîf dal prin turni: Zuzana cˇaputová, che e veve za cjapât la maiorance relative dai vôts ai 17 di Març (passe il 40%), lassant daûr ducj chei altris candidâts e soredut chei plui nazionaliscj e conservadôrs, e à vinçût (cul 58,4% dai consens) il duel cun Maroš Šefcˇovicˇ, il candidât dal partît di guvier – il socialist e tendenzialmentri nazionalist Smer – che di zaromai dîs agns al è comissari european. Ai 15 di Jugn la esponente de liste Slovachie Progressiste (PS, Progresívne Slovensko, fuarce politiche di centriçampe, di orientament socialist liberâl, europeist e ecologjist) e deventarà la prime femine a cjâf de republiche che e je indipendente dal 1993. Avocat di profession, mari di doi fîs e divorziade, il so impegn politic al è tacât intes bataiis ambientalistis, pe libertât di stampe – dopo dal sassinament dal gjornalist Jan Kuciak e de sô femine – e pai dirits civîi. Vie pe campagne eletorâl e à rivât a imponi il so stîl positîf, popolâr, ma no populist. La sô elezion e rapresente par sigûr un moment di roture intal clime politic che al segne, in gjenerâl, la Europe e, plui tal specific, i stâts di chel che lu clamin il Grup di Visegrad. Viodarìn se e segnarà pardabon un svolt.
Ai 31 di Març si à votât ancje in Turchie pes aministrativis. Il grant impegn dal president turc Recep Tayyip Erdog˘an inte campagne a pro dai candidâts dal so Partît pe justizie e pal disvilup (AKP, Adalet ve Kalkınma Partisi, conservadôr e confessionâl) i à dât ae consultazion un significât politic fuart. Cuntune vision di cheste fate, si pues dî che no je lade cemût che al sperave il president. Cun di fat, tes citâts plui impuartantis, a tacâ de capitâl Ankara, e di Istanbul, e à vinçût la aleance tra i socialdemocratics dal CHP e i nazionaliscj laics dal IYI e soredut tal Kurdistan dal Nord al à vinçût il Partît democratic dai popui (HDP/PDG, Halkların Demokratik Partisi/Partiya Demokratik a Gelan) – fuarce politiche di çampe, espression maioritarie de comunitât curde e plui in gjenerâl atente aes minorancis e ai dirits fondamentâi – che al à tornât a vuadagnâ il guvier di chês citâts, tant che Amed/Diyarbakir, Mardin, Batman, Van, Siirt e Hakkari, là che i siei rapresentants a jerin stâts destituîts tal 2016 cu la acuse di colaborâ cui indipendentiscj dal PKK. Cun di plui, l’HDP/PDG al à vinçût ancje a Igdir e a Kars, intant che Dersim al varà un sindic dal TKP (Partît comunist) e l’AKP al à rivât a cjapâ la aministrazion di Sirnak, in graciis dal vôt di tancj soldâts che a son stâts mandâts culì dal guvier di Ankara. In tiermins precentuâi gjenerâi, i vôts cjapâts dal HDP/PDG a son mancul di chei di cinc agns indaûr, ma salacor, consideradis lis cundizions di cumò, il risultât al è ancjemò plui impuartant, sedi pal Kurdistan dal Nord che inte suaze dal Stât turc.
Buinis gnovis ancje in Gjermanie. Cualchi setemane indaûr al è stât publicât il sest rapuart dal Comitât di esperts, che al fâs i monitoraments periodics pe preparazion des Risoluzions di valutazion de bande dal Comitât dai Ministris dal Consei de Europe, in cont de metude in vore de Cjarte europeane des lenghis regjonâls o minoritariis de bande de Republiche federâl, che le à ratificade ancjemò tal 1998. Daûr di ce che si lei, la normative specifiche e lis politichis pes lenghis “altris” a son di nivel bon, miôr ancjemò di cualchi an indaûr. Cundut achel, al è ancjemò ce fâ tal cjamp de istruzion e de formazion dai insegnants. ❚
Marco Stolfo