La desolazion e l’aviliment, la strache di vivi,
si fasin violence e resistence al destìn
CJANT – La perifarie_Inte architeture dal pinsîr pasolinian, la “perifarie” no je dome un lûc fisic, un spazi gjeografic definît di une sô gjeometrie, e nancje la topografie dissegnade di un perît intune mape catasticâl: pluitost e va considerade tant che une cundizion de anime, la proiezion di un malstâ là che desolazion, rabie, isolament a deventin un berli neri e furiôs, bon di trasformâ la malinconie e il marum dai tibiâts e dai ultins intun riviel cuintri de indiference dai sorestants e des istituzions sometudis ae lôr volontât. Il Pasolini marxist, cirint la crevadure de societât là che e passe la energjie de lote di classe, nol rivave a cjatâle di nissune altre bande miôr che lontan di ogni centralitât, sedi urbanistiche che economiche, e duncje ancje sociâl, culturâl e ideologjiche. Cheste sielte si fâs duncje filosofie, vision dal mont e osservatori privilegjât par liberâsi di ogni omologazion, sfuarçantsi di jessi e di restâ libar dai condizionaments imponûts ancje di chel pinsîr di çampe e progressist che al sperave inte “redenzion dal proletariât”, o inte rivoluzion tant che ricete par cambiâ in maniere definitive il cors dai events, fermant il timp cu la scree di une gnove ere. Che e sarès stade dal sigûr plui interessante dal presint. Pasolini, bastiancontrari come che al jere, al cjalave la Veretât in dute la sô crudece, cence finzion, ma dal bas, o pûr di un pont di viste laterâl, inedit, scuintiât, sposant il voli dal “Neorealisim” ma dispueantlu di ogni sô utopie e di ogni sperance platade daûr de rapresentazion dal vêr. La poetiche de perifarie si fonde cussì suntune gramatiche dal “brut”, considerât tant che une “antiestetiche” pardabon rivoluzionarie, peade cu la desolazion di un ambient che al devente aviliment dal vivi, esprimude di une bande midiant de strachetât dal jessi, e di chê altre cu la violence che si fâs cuarp, abandon, tristerie, pôre, malusance e propit par chest resistence. Intune fotografie famose, cjapade in blanc e neri sul set di “Mamma Roma”, un dai siei films plui rapresentatîfs, Pasolini, sentât poiant la schene suntun muralon antîc di marmul e modons, intun stât di evidente decjadence, al cjale l’orizont di une Rome – citât eterne ma lontane, striçade dal ciment, plene di impalcaduris di fier, di cantîrs cence operaris, di palaçons cence anime – là che la vite dai oms e des feminis e ven glotude cence sperance di remission o di salvece. Tal mieç si slargje une plane pustote, là che nol è nancje un segnâl dal “uman”. “Mamma Roma” e devente cussì, ancje tal non sielzût par une des peliculis plui dramatichis dal Nûfcent, une mari sassine che e masane tra lis sôs cuessis i siei fîs. Ma la colpe no je sô. Ancje jê, la Citât, la “Civitas Aeterna”, e je stade violade, imbroiade e coionade di ducj chei che i vevin prometude la glorie, tacant dal Cupolon di Sant Pieri che si piert su la plee dal orizont, impestât dal flât muart de perifarie. Intune altre imagjin, che e somee rispuindi a cheste a pene cjapade in considerazion, nancje che al fos un cuadri pensât par jessi cjalât dentri dal stes colp di voli, un zovin Sergio Citti, un dai atôrs plui significatîfs inte filmografie pasoliniane, vistût di fieste cun tant di bregons luncs, cjamese blancje e golarine, al è par tiere, in zenoglon, cuntune cjiche in bocje. Daûr di lui il stes paisaç di prime. Ma a diference di Pasolini, che al cjale lontan, insumiantsi di cuissà ce, Citti nus cjale come se al volès sfidâ la nestre cundizion di borghês privilegjâts, indiferents ae sô pene e al so malstâ. E forsit, intal trop, al viôt ancje il so mestri, no tant diferent di ducj chei altris. Se Italo Calvino al scriveve lis sôs “Citâts invisibilis” come forme stranide di une utopie che e deventave divertiment di une creativitât cence confins, se Alberto Moravia se cjapave cul conformisim e la sglonfe di une borghesie cence anime, Pier Paolo Pasolini al scometeve su la ande de perifarie, abitade di une categorie ancjemò plui degradade di chê classe operarie che intal proletariât e podeve lei la svolte de storie. I fantats di strade e di borgade, il bûs vueit des lôr cjasis sledrosadis di ogni civiltât, vuarfins di ogni pussibilitât di sperance e di salvece, a deventin zigants che cu la lôr vite, no par sielte ma par condane, si fasin blesteme e furôr, scandul orent pe cussience che no jes di sagristie, ma nancje de celule di partît. Testemoneance rude, sclete, barbariche e forsit par chest, ai voi di Pasolini, libare e cetant biele di dignitât morâl parsore di ogni moralitât. Dal Stât e de Glesie. ❚
:::::::::::::::::::::::::::::::::::::::::::::::::::::::::::::::
Scjampâ di une provincie che ti glot nol fo un esili, ma une sielte
DISCJANT. La metamorfosi pasoliniane e tache cuant che al scjampe dal Friûl, compagnât di sô mari, cu la convinzion di podê disfâ i siei grops inte panze puçolente di Rome. I critics pasolinians – e ae fin di chestis notazions ereticâls bisugnarà fâ i conts ancje cun lôr! – par solit nus contin che la cressite inteletuâl e poetiche di Pier Paolo e podeve tacâ dome bandonant il contest antîc, contadin, ancestrâl di dulà che al jere partît. Il Friûl, duncje, Cjasarse, i cjamps, lis gravis dal Tiliment. No sai se a àn reson o no. Lôr le poin sul plat come se, liberât finalmentri dal demoni furlan, Pasolini al ves podût tacâ a svolâ alt. A mi, cheste, mi somee une grande stupidade, ma o varai mût di tornâi parsore intun altri “Cjant e Discjant”. Dal sigûr, il Friûl par Pasolini al jere une perifarie. E la diestre dal Tiliment e podeve jessi considerade la perifarie di chê perifarie. E veve ducj i elements par garantî un laboratori straordenari al poete, al scritôr, al inteletuâl e al regjist. Une perifarie economiche, culturâl, sociâl. Fintremai etniche, par cualchidun. Imbastardide cul todesc e cul sclâf. Tant lontane dal profîl “talian” di jessi sconfondude cun l’altrò! Il diferent di scjafoiâ cul regjim militâr des casermis, di colonizâ e dumiesteâ, mastiâ e gloti. No dome de bande di caporaluts talianots che vignint fin ca sù di ogni altre perifarie taliane a varessin metude semence intune tiere cuntun spirt di “slungjâ” cun alc altri, pûr che al fos diferent e bon di copâ la “biodiversitât” di chenti; a meterin dongje in vore ancje la scuele: un reziment di mestris e professôrs che a varessin dimostrât une volte di plui che la identitât furlane no esisteve. E jere dome un erôr gramaticâl di segnâ cul lapis ros e blu. E alore? No jerial chest il lûc ideâl par restâ, par scombati, par dâ vôs a une perifarie tant plui tibiade di dutis chês altris? Une ocasion uniche par Pier Paolo Pasolini, il cjantôr di chê vision laterâl che i permeteve di contâ ce che altris no vevin nancje mai olsât cognossi! Duncje? No, no crôt ae narazion dal scjampâ lontan di une persecuzion. L’esili dopo dal scandul. Pasolini al doprave il scandul tant che une bandiere: mi pâr strani che si sedi slontanât par lassâ che lis vôs, cul timp, si studassin intal cidinôr de dismenteance. E, cun di plui, a Rome nol varès fat nuie, ma propite nuie, par vivi in maniere che no fos scandalose. No, jo o crôt che Pier Paolo al veti fate une sielte cetant studiade jenfri dôs perifariis diferentis: il Friûl e Rome. Se al fos restât chenti al varès fate une fadie mostre par deventâ Pasolini. Parcè che chi di nô, inutil contâse, la perifarie ti glot. Tu puedis vê vôs, inteligjence, imprescj culturâi, gjenialitât. Ma la condane e sarà simpri chê di jessi e di restâ – pal mont – un provinciâl. Un periferic. Un nissun. Rome e rapresentave la ocasion. Il puest là che si podeve dâ vôs ae perifarie, ma soredut une ocasion pe proprie cariere. Produtôrs, inteletuâi, regjiscj, politics, scritôrs a vevin cuside une grande rêt inte capitâl. Li il scjas al sarès stât plui grant che no a Cjasarse. Tradî une perifarie cence rifletôrs, in fin dai conts, al reste un pecjât veniâl par un che al vûl deventâ Pier Paolo Pasolini. Siro Angeli e Davide Maria Turoldo docent! ❚
