Al salude Borut Pahor, il president dal dialic

Dîs agns a son passâts di bot. Il secont mandât ae presidence de Republiche di Slovenie di Borut Pahor si invie ae conclusion. Domenie ai 23 di Otubar, i eletôrs slovens a àn a pene votât pes elezions presidenziâls, sielzint tra siet i doi candidâts che a laran al balotaç di domenie, ai 13 di Novembar. A vê plui preferencis, cun scuasit il 34%, al è stât Anže Logar, deputât dal partît di centridiestre Slovenska demokratska stranka. Tal guvier stât, dal 2020 al 2022, al è stât ministri dai Afârs forescj. Seconde par numar di preferencis, cun scuasit il 27%, e je Nataša Pirc Musar, indipendente di centriçampe che e à ancje il sosten dai doi passâts presidents slovens Milan Kučan e Danilo Türk.
◆ Il gnûf president al sarà in cjarie dai 23 di Dicembar. Fintremai ai 22, al finirà il secont mandât Borut Pahor, che pal sigûr al restarà in bon ricuart ancje ai furlans. Tantis voltis al à fat alc par puartâ a un nivel plui alt i rapuarts tra Slovenie, Italie e cussì ancje Friûl-Vignesie Julie. Che si pensi dome ae strente di man cul president talian Sergio Mattarella a Basovize tal Lui dal 2020, sedi denant de foibe, sedi denant dal monument ai cuatri antifassiscj fusilâts.
◆ Borut Pahor, che al è president de Republiche bielzà dal 2012, al è nassût tal 1963 a Postojna e al è lât a scuele ancje a Nova Gorica. Forsit ancje par chest al cognòs avonde ben il potenziâl e i problemis des zonis dongje dai confins.
Al veve tacât a interessâsi di politiche bielzà di fantat. Propit a scuele a Nova Gorica si jere iscrit ae Union de zoventût socialiste de Slovenie, rivant ancje tal diretîf.
◆ Daspò de lauree in politologjie te Universitât di Lubiane, inmò te Jugoslavie des sîs republichis, si è iscrit ae Union dai comuniscj de Slovenie, partît politic de Slovenie che al è stât atîf fintremai tal 1990.
Te sô cariere, Pahor al è stât l’unic citadin sloven a rivistî dutis lis plui altis incarghis politichis in Slovenie, parcè che nol è stât dome president de Republiche, ma tal passât ancje president dal consei dai ministris e president dal parlament de piçule Republiche.
◆ Te Slovenie democratiche e indipendente, dal 1992 al è stât elet deputât par cinc voltis. Tal 2000 al è deventât ancje president dal Parlament. Tal 2004, invezit, al è stât elet deputât european, ma dopo cuatri agns di ativitât al è stât une altre volte elet tal Parlament de Republiche di Slovenie.
Leât ae aree politiche dal centriçampe, Borut Pahor al à diret ancje il partît dai Socialdemocratics, che tal 2008 al à vinçût lis elezions politichis. In chê volte Pahor al è deventât president dal Consei dai ministris, ancje se il so mandât al è finît prime dal timp, tal 2011.
Dopo vê lassât la presidence dai Socialdemocratics, tal 2012 si è candidât tant che president de Republiche. Midiant de sô campagne eletorâl, li che al à sielzût di misurâsi fasint plui lavôrs, al è rivât a svicinâsi ae int comun. Cussì, tal prin turni al à cjapât il 40% dai vôts, rivant al secont turni insiemi cul president jessint Danilo Türk. Al secont turni al à vinçût cun scuasit il 70% dai vôts. Al è stât confermât al secont turni ancje tal 2017.
In Slovenie, une part de opinion publiche e critiche Pahor par no jessisi esponût masse a nivel public su lis consecuencis de pandemie dal gnûf coronavirus e dai conflits a nivel politic in chel periodi. Pahor al à plui voltis dit di volê jessi il president di ducj e di vê chê di colaborâ cun ducj e di puartâ pâs su la sene politiche. In chest al à vût sucès, parcè che intun stât cu la storie che e à la Slovenie, li che il dibatit politic tra centridiestre e centriçampe al è dispès avonde polarizât, Borut Pahor al è rivât il plui des voltis a presentâsi tant che une autoritât morâl garante di ducj i citadins. Mighe par nuie al dîs di jessi content dal so popul, parcè che par lui al è un popul bon di fâ, che al pues jessi braurôs dal so stât.
No dome in Slovenie si fevele avonde dal president jessint ancje pe sô presince sui social media. Par esempli Pahor al à plui o mancul 135.000 followers su Instagram. Li nol publiche dome fotografiis di visitis o viaçs uficiâi, ma ancje fotografiis di cuant che al jere frut o fantat. Pahor, che tal passât al à vût ancje cualchi esperience tant che model, sul so profîl al mostre tra l’altri di vê passion di sportîf, parcè che al nade, al va in biciclete e al partecipe simpri ae maratone di Lubiane. Ancje chestis a son robis che ur plasin a cetancj slovens. ❚