Alessandro Orologio: orloiâr, musicist e compositôr furlan ator pes corts de Europe

A son 390 agns che al è muart l’orloiâr, trombetist e compositôr di Dograve di San Zorç de Richinvelde Alessandro Orologio, “Alexander Horologius” apont, fi di mestris costrutôrs e assegnâts ae manutenzion di orlois a Udin. I siei parincj, come il pari Pelegrin e il probarbe Jacum, a vevin lavorât par esempli ae costruzion dal orloi de glesie di Sante Luzie, e a vevin comedât e fate la manutenzion di chel di place Contarene, la Place Libertât dal dì di vuê. Inmò sore, a jerin responsabii ancje dal armamentari. Insome, chest fi di faris e orloiârs – nassût a Dograve ai 14 di Zenâr dal 1551, e che al jere ancje sunadôr di trombe e di struments a flâts, ma ancje a cuarde e cjantôr – al veve domandât di jentrâ te compagnie strumentâl udinese, che si ocupave soredut des musichis pes ricorencis civîls ma ancje di cualchidune religjose come intes processions, e li al jere stât cjapât sù ai 18 di Mai dal 1573. Muart il pari, al cjaparà sot de sô responsabilitât ancje i lavôrs pe cure dai orlois e dal armamentari.
◆ Plui o mancul cinc agns dopo, ai 6 di Avrîl dal 1578, al da lis dimissions e al partìs, insiemi cun altris musiciscj de compagnie udinese, par Praghe, par prestâ servizi tant che sunadôr te capele musicâl dal imperadôr Ridolf II. Di chi un lunc torzeonâ fûr pe Europe al servizi di chel e di chel altri regnant, musicist preseât e ancje compositôr, tant che ogni so spostament al jere anticipât o seguît di dedichis ai sorestants, forsit cu la intenzion di fâ biele figure e di sigurâsi un bon puest. Cussì al va a Dresde come sunadôr di cuar, al figure ancje al servizi dal mecenat polac Pietro Myszkowski, tal 1594-95 al è al servizi dal langravi Moritz von Hessen a Kassel, pôc plui inlà al è a Brunswick-Wolfenbüttel, aes dipendencis dal duche Heinrich Julius, e tal 1603 al torne a Praghe, nomenât vice mestri di capele di Ridolf II. Tal 1613 a son dôs lis novitâts impuartantis par lui: une e je vê otignût il titul nobiliâr, e chê altre il fat che al va in pension, podint svantâ il titul par simpri di musicist di sô maestât imperiâl.
◆ Al continue a viazâ che al è un plasê: Dresde, Praghe, Steyr in Alte Austrie, al è fintremai tal munistîr benedetin di Garsten, fin che si ferme in maniere definitive a Viene tal 1622.
◆ Un fastidi che lu ten in preocupazion pal rest dai siei dîs al è il fat che al spiete – e al insist par otignî, ma al rive a tirâ dongje ben pôc – che i sedi paiade buine part de pension, e ancje plui di cualchidun dai siei servizis fats pe cort di Praghe. Nuie ce fâ: nol rivarà a tirâ fûr trop di ce che i à di dâ l’imperadôr. Nol murarà puar, ma nancje siôr e, fat testament tal Fevrâr dal 1633 – a firmâlu al sarà ancje il musicist e compositôr Gian Giacomo Arrigoni di San Vît dal Tiliment, che al jere in chê volte organist te cort di Ferdinant II – al mûr sul finî di Otubar dal stes an. Tant che compositôr si lu presee pe sô vene compositive sclete, autôr di musiche sedi sacre che profane, come lis cjançonetis a trê vôs, i madrigâi a cuatri, cinc e sîs vôs, lis jentradis, un Magnificat, un Miserere e une opare rivade a tocs, o ben i “Cantica Sion” a vot vôs. ❚