“Za a’ si insede tal cour / il ricuart dal sorêli. / L’arbe ‘a si è fate pluj grise / davôur dal Dogâl. / L’ajar al mene cocâj su dal mâr, / liseirs tanche stras o penseirs, / vêrs dome pal lôr crût piuicâ. // Davôur dai Vârs, l’aghe / no spegle pluj vôj di usseluts, / ma nîts za bandonâts. / Chi a’ nol vignarà pluj nuje, / nuje nol podarà pluj vignî”.
◆ Chest al è l’incipit de poesie che i da il titul ae racuelte Presumût unviâr, publicade intal 1987. Cumò la opare e torne a viodi la lûs, in chest volum che al ten dentri ancje il tratât L’arte dell’andar per uccelli con vischio e vincjeun poesiis ineditis. Il volum al cjate puest inte golaine preseose Ardilut, dedicade ae poesie bilengâl e curade di Giorgio Agamben, che al firme ancje la prefazion, pe cjase editore Quodlibet. A son di segnalâ ancje lis notis di Matteo Vercesi e di Ivan Crico e i dissens di Luigi Zuccheri.
◆ Stant al grant critic Dante Isella, Presumût unviâr e je la racuelte plui intense di Giacomini, une sorte di dialic fra il poete e la nature. Intal vignî de stagjon frede, e nas il lancûr par une robe biele che e finìs. Ma nol è ancjemò Invier, l’Invier al è dome presumût. E salacor il moment al è ancjemò plui mareôs parcè che nus dîs che dut al finìs ancjemò prime che al finissi pardabon. Chest sens di pierdite al somee ancjemò plui fuart intes poesiis ineditis. Aes sîs ripetizions dal sostantîf muart, contadis di Vercesi, si zontin chês dal adietîf che al compagne aghis, fueis, essinsis e chês riferidis aes personis muartis: in totâl cutuardis voltis. Cence contâ i martueris (p. 205) e il simiteri (p. 210). Come se, cheste volte, a sedi presumude e fos la fin definitive e no plui dome l’Invier.
◆ Om ruspiôs, “Medeo”, critic cu la societât, cu la culture e ancje cul so stes partît. E pûr si lu cjate cussì tenar inte poesie, come cuant che al fevele de sô circumstancia (la mê cjase, la mê femine, i miei fîs a son chi), o intes dedichis ai amîs o ancje al so Mi Varmo querido. E po i uciei, cognossûts un par un e tant amâts. La ultime des poesiis ineditis e je une invocazion ae muart, clamade par no sintî plui il beghelâ disperât dai sturgnei. E la peraule Signôr cu la S grande e torne cinc voltis in chestis ultimis lirichis par compagnâ il salût definitîf ae vite. ❚