“Stant che i sanz a son personis straodenariis rispiet a la normalitât, come stelis ch’a lusin tun cîl dut fumul, al è evident che ancje la lôr vite e jè diferente di chê de ‘massa damnatorum’, de ‘fole dai danâz’ che o saressin nô. La diference di fonde e jè la lôr vite interiôr, il lôr grât di gracie, la santitât de lôr anime, ma chest al è masse pôc pai nestris vôi curiôs e alore bisugne che la straordinarietât si palesi ancje par di fûr”.
Al è l’incipit di une des oparis plui significativis di pre Antoni Beline, li che al conte la sô la sô vocazion e la sô vite, che di chê vocazion e je stade condizionade e determinade.
Beline, si sa, al veve simpri tantis robis di dî, di contâ, di scrivi. Al veve une largje pradarie dulà cjapâ sù il so fen: la Bibie, prin di dut, ma ancje ducj i libris che al veve let, une culture a 360 grâts che i permeteve no dome di nudrî la sô anime, ma ancje di pandile, di resonâ sui problems e su la nature dal om, sul so rapuart cun Diu, su lis domandis ultimis (o primis) che ogni jessi uman si pon, timp o tart.
In chest libri, salacor il plui ‘patît’ di ducj i siei, al met in lûs la sô donazion totâl al progjet che Diu al veve fat su di lui e par lui e, intal stes timp, il marum pe struture dal ‘seminari dulà che al va a vivi che no simpri si palese a la altece de grande puritât de sô vocazion. Lis polemichis che a àn compagnade la jessude dal libri plui di dîs agns za fa, no àn tignût cont, mi pâr a mi, di trop che al pues sedi constât a pre Toni di butâi al public une critiche cussì precise de institituzion che in fin dai fats, lu rapresente, che lu ten drenti. E je vere che no dutis lis pagjinis a son de stesse intensitât, ni dutis cussì claris e e je ancje vere che il spirt polemic di pre Toni nol mancje mai, scuasi un gust pe provocazion. Ma la opare e reste une testemoneance straordenarie di un mont plen di contradizions e di debilecis, sicu che je simpri la vite di ognidun di nô. Al dopre la vuiscje, pre Toni, cence remission. Ma al è cussient che chês vuiscjadis no puedin no fâi mâl ancje a lui.
Di chê altre bande e ven fûr in dute la sô penzece, la sô vicende umane, scuasi une autoanalisi, che e ingrope pe scletece di ciertis confessions di un om che al à scugnût scombati par sedi degn de sô vocazion.
La Fabriche dai predis, alore: al è just il titul cun dut ce che di critic il tiermin “fabriche” al puarte cun se. Ma ancje la storie di une vite: “Mame, mi plasarès lâ predi”… ■
Laurin Zuan Nardin
