Aquilee capitâl dal “Isontino” o dal Friûl?

La propueste dal prin citadin di Aquilee, di zontâ la citadine patriarcjâl ae future Provincie di Gurize, e sta fasint discuti. Biadelore! O sperìn che la riorganizazion des areis vastis al deventi un moment impuartant di discussion politiche intal panorame grîs e vueit di chescj timps. I motîfs di discussion no mancjin.
◆ Prin di dut ce competencis varano lis gnovis Provinciis? Edilizie scolastiche e manutenzion des stradis come une volte? Valie la pene meti in pîts une istituzion eletive, ven a stâi votade di ducj i citadins, par dôs competencis che a podaressin jessi gjestidis di une buine agjenzie?
◆ E po dopo, cemût varessino di jessi pensâts chescj ents di aree largje? Come une emanazion dal alt, ven a stâi come une diramazion dai uficis regjonâi, o come agregazions dal bas, par une utilitât pai Comuns vuê in grande dificoltât pal personâl a disposizion prime ancjemò che pe carence di bêçs? E cuâl saressial il personâl di meti tes Provinciis? Dut gnûf cun altris concors?
◆ Dal pont di viste teritoriâl i grops che a varessin di jessi disfats vuê a son evidents. Scomencìn des aspirazions di Triest che no son un probleme. La norme dal statût dal F-VJ volude dal Stât roman in maniere unilaterâl, ven a stâi cence la aprovazion dal Consei Regjonâl, che e proviôt la pussibilitât di creâ une citât metropolitane lu met tes cundizions di cjatâ chê autonomie che i permetarès di rispuindi ae sô funzion storiche di puart franc internazionâl pai scambis comerciâi tra il Mediterani e i paîs dulintor cul Centri e cul Est de Europe. Cun di plui vuê la vuere fra Russie e Ucraine e fâs evidente la sô dimension strategjiche adiriture in funzion militâr, tant che baluart de NATO tai confronts de minace di Putin. Se mai, al sarà di domandâsi se chê sô funzion internazionâl e pues coesisti cul rûl di cjâf lûc regjonâl, viodude la necessitât – no semplice – di armonizâ lis justis esigjencis dai varis teritoris de regjon.
◆ Par ce che al reste de regjon, al sarès impuartant – ancje se dificil – valorizâ il policentrisim di un teritori che al à mîl cjampanii, metûts in mont, su lis culinis, te plane e sul mâr. Comunitâts che a fevelin cuatri lenghis diferentis – cence considerâ chês dai migrants – cuntune economie svariade e cun rapuarts fuarts cu lis comunitâts dongje.
◆ Par Gurize, striçade fin cumò de tendine di fier, podìno fâ di mancul di cjapâ in considerazion la sô oportunitât transfrontaliere (pensait dome ae gjestion dal Lusinç) cun o cence Aquilee? Ricuardìnsi che la grande Provincie dal Friûl, volude tal 1923 di Mussolini par diluî il pês dai slovens intal confin orientâl de Italie, e je stade un faliment, combatude fin al sfiniment propit di Gurize che si jere viodude gjavâ il so rûl di cjâf lûc, cun di plui che e jere (e e je) sede de Arcidiocesi cu la catedrâl aquileiese. Tant che tal 1927 il Duce al à fat cessecûl. Duncje, parafrasant Bugatto, nuie di Gurize cence Gurize…
◆ E no isal ancje il timp just – par esempli – par superâ il confin dal Tiliment che al spartìs dal pont aministratîf un teritori che invezit, pes valencis storichis, gjeografichis, economichis, finanziaris e sociâls, al è dal dut vualîf? Pensait dome al cuadrilatar San Vît, Spilimberc, San Denêl, Codroip dulà che e je insedade la magna pars de agriculture regjonâl cul consorzi dal persut e chel dal Montâs, cul lis cooperativis Friulkivi, Friulfruct, consorzi agrari e circul agrari, associazion arlevadôrs e Vivârs coop. di Rossêt, cantinis viniculis e latariis, irigazion e riordins fondiaris. No ise la ore di valorizâ chel distret, cence gjavâ nuie a Udin e a Pordenon?
◆ E a proposit de citât sul Nunciel, simpri in crisi di inferioritât no cate la personalitât di Agrusti, se Aquilee e va cun Gurize no isal il câs di pensâ che ancje Concuardie e Puart a tornedin te lôr juste dimension gjeografiche che e pee la plane di là da la Aghe cul mâr di Cjaurlis? Ancje in chel câs si trate de stesse diocesi eclesiastiche. Il dubi però al reste: Puart cun Pordenon saressial il compiment dal Friûl storic? O la jessude definitive di Pordenon viers il Venit?
◆ E la mont, che no je dome la Cjargne, no aie di jessi ogjet di intervents particolârs e di misuris urgjentis di pupilance e di une politiche pes areis internis che smicjedi a evitâ il dispopolament e il degrât sociâl?
◆ Tantis domandis no simpri di rispueste comude soredut se no si vûl tornâ sic et simpliciter al vecjo model aromai superât di Provincie come man lungje dal Stât par controlâ la perifarie. Ridiscuti di cuistions istituzionâls nol scjalde il cûr de int, ma e pues tornâ a dâ un rûl seri a la politiche. Dut câs no si pues da rispuestis semplicis a problemis complicâts. Ma se no covente a chel, a ce servissie la politiche?
◆ E il parlamentin regjonâl che al varès di jessi il lûc privilegjât di confront e di decisions batial un colp? Ce disial par esempli il vicepresident de Regjon Anzil za sindic di Rivignan Teôr che cualchi an fa al veve fat une grande bataie pes dôs Provinciis autonomis di Triest e dal Friûl su la ande di Trent e Bolzan? No si impensial plui dal grant moviment di opinion metût in cjamp cu la partecipazion di tante int e cu la poie di personaçs famôs che si jerin iludûts e che a vevin adiriture firmât par chê soluzion? Aial cambiât idee, o no vuelial disturbâ il manovradôr Fedriga? ❚