Architet di furlanitât

D: Cui isal Checo Fratulin?
R: O soi un furlanist nassût a Sisarôl (comun di Sant Micjêl dal Tiliment); penultin di vot fîs e daspò di jessimi diplomât gjeometre a Udin e indotorât architet a Vignesie o vîf e o lavori inte stesse cjase dulà che o soi nassût, fi di un mulinâr (Berto) e di une contadine (Fan?).
D: Cuant ise madurade la sô passion pe storie e culture furlanis?
R: In timps di studis universitaris o ai fat esams che mi àn puartât a lâ in dentri ae storie architetoniche dal teritori de basse furlane, par rivâ insom a discuti une lauree di caratar urbanistic e edilizi su Tisane. Tai agns 70 (daspo de lauree…) o ai publicât articui di caratar storic su libris e periodics locâi come Il Friuli, il Corriere del Friuli, Sot la Nape e no dome; esperience cheste che mi a fat cognossi altris cultôrs di storie locâl. Tai agns otante o ai indreçât la mê ricercje su la edilizie rurâl, sui borcs antîcs e sui cjasons, scrivint libris e articui varis.
D: E il so impegn par fâ tornâ in Patrie lis zonis dal mandament di Puart?
R: Un sodalizi, la bassa, cun finalitâts specifichis storichis, culturâls, lu vin costituît a la fin dai agns otante. Dal 1991 mi soi dedicât al Moviment pe gnove provincie di Puart e Pordenon, progjet nassût e pensât tal 1989 cun intents politics ma no partitics. Di cheste esperiençe e cul jutori di une vore di int a son daspò nassûts altris comitâts paisans (Sant Micjêl, Puart, Pramaiôr, Fossalte, Tei, Gruâr, Cint, Danon e Concuardie) che a àn organizât par lôr cont un referendum par gambiâ regjon. Par podê pocâ cun plui fuarce, e sburtâ lis pratichis pal passaç di regjon, tal 1994 mi soi candidât a sindic (otignint doi conseîrs di minorance) cu la liste civiche Sant Micjêl e Bibion al Friûl publicant ancje un periodic di liste clamât il Timent.
D: Chest, a nivel politic, ma a livel dome culturâl, o savìn che ancje la regjon Venit e à une leç par sostignî lis minorancis: funzionie? E cemût?
R: La regjon Venit e à pratindût un coordinament da lis associazions furlanistis dal Venit, par podê vê finanziament e no fâlis murî mi soi metût a scrivi un at costitutîf e un statût par tignî dongje dutis li fuarcis. In zonte o vin doi portâi in rêt (www.comunichecambianoregione.org e www.in-friuli.org) par rindi visibii a livel locâl e nazionâl lis nestris bataiis.
D: Cemût viodial il futûr de sô bataie?
R: Jo no soi dome convint di impegnâmi pal ben de mê int e dal gno teritori, ma ancje che cheste strade, di mudâ regjon, e sedi une vore la plui juste rispiet a lis alternativis: restâ sot Vignesie; fâ une gnove province cun Puart e S.Donà; altris stradis di mieç che a son daûr a inventâ cumò i politics par confondi la int e tignî dut come che al è. Tor i vincj agns, studiant il teritori des mês bandis, o ai scuvierzût di sei furlan, jo che mi definivi venit, come chi simpri a scuele mi vevin insegnât. In chê volte o ai scomençât a capî la storie e come che e ven scrite (mê mari, di Sisarôl, che e cjacarave furlan cui siei parincj e si crodeve venite ancje jê, par vêlu imparât a scuele). O ai capît la impuartance di imparâ di bessôi la nestre storie e no chê che nus imponin. Daspò di cheste consapevolece di partignince mi si è sclaride la cuistion de “naturâl vocazion teritoriâl” di une zone. Cuestions che nus àn puartât a dî che il teritori dal comun di Sant Micjêl al jentre te aree di influence dal Tisanês; cussì come il mandament di Puart,
–––––––––––––––––––––––––––––––––––––––
Europe tant che santul
Finalmentri, daspò dîs mês di passion, il guvier talian intune uniche sentade al à mandât indenant il dissen di leç pal passaç di regjon di Cint, e di altris doi paîs, no venits, che a vuelin gambiâ regjon. Par chel che al rivuarde il passâç in Friûl, il parlament talian al à dôs stradis: o lâ daûr dal iter de leç costituzionâl, o chel plui svelt de leç ordenarie presentade dal senatôr Ferruccio Saro che timp indaûr al veve bielzà poiât un dissen di leç par dissiplinâ il passaç di regjon di Cint. Chest dissen al è in esam li de Comission Afârs Costituzionâi dal Senât. La pôre di bande dal sindic e de popolazion e je che cumò che la cuestion e passe tes mans dal parlament al sedi cualchi altri intop. Ce che nol zuie a pro dai Cintês al è il fat che i mudaments di regjon a son deventâts un câs nazionâl tant che Galan al berle spes di volê domandâ une revision dai privileçs da lis regjons a statût speciâl. Par chest il Moviment dai comuns che a vuelin mudâ regjon al à domandât ae Cort Europeane che si fasi garant pal rispiet de leç costituzionâl Taliane che e proviôt la pussibilitât, pai comuns, di mudâ regjon. Dut câs a livel nazionâl, Cint al samee l’unic comun a vê lis cjartis in regule par podê gambiâ regjon.
Resistence… linguistiche
Intune interviste radiofoniche di Radio Rai dai 12 di Mai par cure di Donatella Gori – dal titul «mal di Veneto» – il sindic di San Micjêl dal Tiliment Sergio Bornancin ae enesime domande de gjornaliste sul parcè de voie di mudâ regjon, al è sbrocât rispuindint par furlan: «Nô o sin furlans, o sin nassûts furlans, o sin maridâts cun feminis furlanis e o volaressin murî furlans!». L’intervent in marilenghe – che al à vulût meti in clâr la voie di lidrîs e no dome di agjevolazions fiscâls – al à fat scjas sui media talians.