ART-Â. Fors, fornâs e fûcs di Buie. Un toc di storie dal Friûl

Cui che no à ancjemò viodût la biele mostre te cripte de glesie di Vile di Buie – “Oms, machinis, rigjile. Fâ modon a Buie” – che al profiti dal so sprolungjament par tornâ a gjoldi une sapience antighe, chê dal fâ modon, che si è sparniçade ator pal mont cul lavôr di fruts, feminis e oms. La mostre e compagne la distribuzion dal libri “Fâ modon a Buie” di Laura Nicoloso e Andrea Cattarino, dât fûr de clape culturâl “el tomât”, impegnade di agns te ricostruzion de memorie storiche de comunitât buiese a traviers di testemoneancis orâls e materiâls, par rinfuarçâ lis sôs lidrîs.
La mostre e conte fornâs e fornasîrs furlans di Buie, simbui di un paîs e de sô int, de storie dal lavôr e des migrazions. Esperiencis di vite che a fevelin di capacitâts tecnichis e faturis cuotidianis, di abilitâts specialistichis particolârs e di manoalancis semplicis, di orgoi professionâl, ma ancje di sfrutament de lavoranzie di fruts e feminis.
In esposizion mapis catasticâls che a disin cetant difondudis che a vegnin tal Sietcent lis fornâs rurâls artesanâls sul teritori di Buie e la massarie produsude dai “scudielins di Vile e di Sacuel”. Di no pierdi lis pladinis dal Sîscent e lis preseosis scudielis cun decorazions blu cobalt (finidis di doprâ tal Sietcent), cjatadis, cul cjâf injù, suntun cuviert di une cjase, daspò dal taramot, li che a jerin stadis metudis par no fâ jentrâ aghe dai cops.
Impuartants i materiâi dal “Pravilegjo di Urbignà”, la storiche fornâs industriâl a fûc continui in vore de seconde metât dal Votcent fin ai agns Setante dal Nûfcent, prime dal taramot. In mostre a son imprescj e prodots origjinâi: des cariolis antighis aes primis machinis, dai stamps di len
a chei di ghise, dal vagon sui binaris
al tratôr “lilliput”.
Te glesie di Vile, in gracie de colaborazion di cetancj citadins, il visitadôr al pues viodi modons plens e sbusâts, cops, planelis, clâfs di volte, ma ancje progjets origjinâi di fors e fornâs e fotos vecjis. Une sezion de mostre e je dedicade ai tancj documents – faturis, bolis di traspuart feroviari, letaris, cartulinis – che a testemonein i rapuarts de Fornâs Calligaro&Nicoloso cun dute la Europe e l’indot di cheste ativitât industriâl sul tiessût produtîf locâl, massime pai faris e pai marangons e po ancje pai mecanics e eletriciscj furlans. Significatîfs i modons, fats a man, cu lis scritis CN6, CN5 e CN4: lis iniziâls si riferissin ae Calligaro&Nicoloso, il numar al spessôr in centimetris e i balins, di un a cuatri, ae scuadre di lavôr che ju faseve. Chê che, ae fin de zornade, e veve lavorât di plui, e veve un premi di produzion.
Buie, tiere di fornâs
La nassite e il svilup des fornâs artesanâls, ancje se di dimensions piçulis e a fûc intermitent – lis “cravuatis” –, a son peâts ae nature de tiere che e deve rigjile di cualitât cetant buine dongje di jaciments di torbe, doprade tant che combustibil (memoriis soteranis dal lâc dal Cjamp di Osôf).
Par doprâ tant la rigjile che la torbe tocjave vierzi une gjave, vê un “pravilegjo” (peraule che e indicave sedi la “cjarte” par vierzi une gjave sedi la fornâs metude in vore dongje des gjavis). Tal regjistri dai batisims de plêf di Sant Laurinç di Buie, za sul imprin dal Sîscent,
e je iscrite la nassite a Vile di un Baracchini,
fi di Domeni “scodellaro”.
Documents e reperts inedits, toponomastiche, testemoneancis orâls e materiâls a àn permetût di localizâ almancul altris trê fornâs (in vore dal Sîscent): la Fornasate di Cjocjo, li che a àn imparât il mistîr ducj i fornasârs di Buie, e dôs fornasinis par massarie di taule a Vile e Sacuel.
Il catastic austroongjaric (1850-1950) al à regjistrât 19 fornâs diferentis, massime a Madone e Urbignà, ma ancje a Tonçolan. Ator de fin dal Votcent, te zone di Urbignà, a vegnin dismetudis lis fornâs di Eustacchio “Zorzon”, che a trasferiran la lôr ativitât a Graz, in Austrie, li che a fondaran un grant complès industriâl che al cressarà simpri plui tal Nûfcent e si invie la trasformazion des fornâs dai Calligaro “Lene”, supuest de nassite
de prime fornâs industriâl di Buie:
il “Pravilegjo di Urbignà”.
Tal 1876, l’inzegnîr civîl Enrico Pauluzzi
al firme il progjet di une gnove fornâs a fûc continui cul sisteme Hamilt e e ven metude in pîts la societât cooperative Calligaro&Nicoloso (“Lene e Cavalet”). Tal 1903, te suaze
de esposizion industriâl nazionâl di Udin,
i prodots de fornâs a forin premiâts cuntune segnalazion di cualitât. Dal 1920, passadis
lis dificoltâts de prime vuere mondiâl,
la fornâs e cognòs un moment di fuarte espansion industriâl, mecanizant cualchi
fase de lavorazion.
Erika Adami