Lis emozions dai cjants de tradizion popolâr furlane

Il gnûf album “Zornant”
di Alvise Nodale
Alvise Nodale al è un cjantautôr za cognossût tal panorame de musiche furlane. Ancjemò cetant zovin al à za publicât il so disc “Conte Flame”, che o vin ancje scrit su La Patrie. Daspò al à publicât il so secont album “The dreamer” e al à colaborât in diviers progjets cun altris cjantautôrs tant che Lino Straulino, Cinque Uomini sulla Cassa del Morto, Nicole Coceancig e Cristian Mauro. Par scomençâ l’an, al à partecipât ae opare coletive “Le Lotte del Cormôr 1950 – Le canzoni del Cormôr 2020” dongje di tancj altris artiscj furlans cul so toc “Las Rostes dal Cormôr”. Chest an, ai 23 di Març, e je jessude in version digjitâl “Zornant”, une racuelte di cjants popolârs furlans cjantâts, sunâts, prodots e rangjâts dal dut dal zovin artist.
◆ “Zornant” al è un viaç fûr pes lidrîs de musiche popolâr de tiere furlane. Alvise nus compagne cu la sô vôs, ghitaris, mandulins e bouzoukis, e al cree une melodie e un involuçâsi di suns emozionants, delicâts e armoniôs.
◆ «L’album al è nassût tant che un piçul progjet di dôs o trê cjançons par capî miôr e sperimentâ jo stes il mont de regjistrazion» – nus conte l’artist – «ae fin, mi soi lassât cjapâ la man e al è jessût un album cun nûf tocs. Ju ai regjistrâts cussì come che ju ai imparâts a sunâ. Cualchi volte cun rangjaments robâts o altris origjinâi, ma simpri cul rispiet che cheste musiche e merete.»
◆ Di ispirazion par chest album a son i siei mestris Lino Straulino, Giulio Venier e Loris Vescovo.
◆ Tal album a son ducj cjants popolârs furlans che lu àn compagnât di diviers agns e che ur è afezionât. Nûf tocs che a tegnin dongje intun disc dut il stîl di Alvise, e cjants popolârs come “Fasìn un cjant”, “Aghe aghe benedete”, “Done mari”, “Dait un pic” e “La biele stele”.
◆ «O ai sielzût i tocs che a rispietin di plui il stât di anime di tancj di nô intun moment dulà che si sint fuarte la mancjance des personis e dal contat uman.» Tai tocs si fevele di amôrs lontans, di partencis e des personis che no tornaran plui. “Fasìn un cjant” al è il toc che plui di ducj al sta a cûr al cjantautôr. «Chest toc lu ai imparât di Lino, cuant che o vevi sì e no 7 agns e no vevi ancjemò cjapât in man la ghitare.»
◆ Il titul “Zornant” al cjape il so non di – come che al dîs Alvise – «une peraule che e sa di antîc. Al è un verp che no si doprilu plui, un pôc come i contignûts di chest album, e e vûl di “cjantant”. Il cjantâ dai uciei al sclarî prin di tacâ la zornade.»
◆ Cuant che Alvise al à sielt tant che cuviertine dal album la foto cetant biele dal scriç fate di Nicola Silverio, cheste e je stade di ispirazion finâl pal titul.
L’album al è stât produsût in cjase, intun studi che Alvise si è fat sù di bessôl, e judât ae fin pal mixaç di Leonardo Duriavig. Dilunc de reclusion, causade dal covid, l’artist al à duncje imparât a regjistrâ, produsi e, come che nus conte, ancje a sunâ cualchi gnûf strument, tant che il pianoforte, il mandulin e il ba,s e al à tornat a cjapâ in man la ghitare eletriche.
Cheste Istât il cjantautôr al à za presentât il so album in diviers contescj e festivals, e no viodìn la ore di podê scoltâlu tai prossims concierts e di comprâ il so album “fisic”. Pal moment, si pues scoltâ e lassâ un contribût su la pagjine Bandcamp https://alvisenodale.bandcamp.com/album/zornant e discjamâ di https://music.apple.com/us/artist/alvise-nodale/1348512857
Par jessi simpri inzornâts, stait daûr su Instagram e Facebook. ❚