Ce ise e cemût ise nassude la ASFO Arbeç?
“La ASFO Arbeç e je une associazion di volontariât cence fins di vuadagn impegnade a fâ cuintri al contrastâ l’abandon dal teritori e a valorizâ il paisaç identitari des Vals dal Nadison.
E je nassude peantsi ae Leç 10, l’imprest che al è la fonde di dut il nestri lavôr), e si è costituide in maniere formâl intal 2016 in graciis dal impegn dal Sindic di Stregne e di un grup di volontaris. Cumò e conte plui di 80 socis e e je ative intai Comuns di Stregne, Drencje e Torean.”
_
Cuâi sono i vuestris obietîfs?
“I obietîfs che si si metûts no son pôcs e a son avonde impegnatîfs, calcolant la cuantitât di lavôr che e sarès di fâ in dì di vuê tes zonis di mont là che o volìn operâ, che a son avonde “fûr di man”. A ogni mût, l’obietîf che di fonde al è chel chel di contrastâ l’abandon dai terens dentri dai trê Comuns che nus interessin intes Vals dal Nadison (Stregne, Drencje e Torean), par recuperâ chescj terens rivânt a dâur o a tornâur, intal timp, un gnûf valôr e contribuint a fâ plui biel dut il teritori. O volaressin ancje combati simpri di plui il fenomen dal frazionament des proprietâts, che al à puarte ogni famee a vê il so teren privât. Chest al à puartât a vê un teritori framentât intune vore di piçulis parts che a àn proprietâts diviersis. E je une situazion che par nô al è un ostacul grues, parcè che par fâ i nestris intervents nus coventin areis largjis. Il recupar dai terens abandonâts e la lôr cure a varessin, cul timp, l’efiet di dâ aes nestris zonis un aspiet miôr di un pont di viste estetic e paisagjistic, valorizantlis e disfrutant il lôr potenziâl par che a deventin plui trativis ancje di un pont di viste turistic. In cont di chest ultin teme, o varessin di fat il desideri che une part dai terens recuperâts e vignìs doprade ancje pe produzion autonome di prodots agroalimentârs, che a vuê al è une vore limitade ma che e furnirès un grant valôr zontât. Tra i terens di recuperâ e di difindi, o vin un voli particolâr pai cjastenêts; al è impuartant di fat marcâ che intes Vals dal Nadison al jere in passât une produzion pardabon impuartante di cjastinis, che a vignivin vendudis intes buteghis locâls, ma no dome: i comerciants dal puest a fasevin ancje grandis distancis – cui cjars, a cjaval e cualchi volte ancje a pît – par scambiâ lis cjastinis cu la blave. Dopo desenis di agns di abandon, i cjastenêts a son stâts magari cussì no cuasi scjafoiâts ad implen dal vignî indenant de vegjetazion dai boscs. Di là di chest, il nestri obietîf al sigûr ancje chel di incressi il numar dai socis, e sensibilizâ plui personis che si rive sui valôrs dal nestri progjet. Chest par slargjâ il rai di azion de associazion e la cuantitât di areis di podê recuperâ. I ten a marcâ che, cundut che la nestre associazion si ocupe soredut des Vals dal Nadison, o sperìn che la nestre azion e puedi deventâ un esempli ancje par chês zonis – soredut di mont – de nestre Regjon che, ancje cun carateristichis diviersis, si cjatin intune situazion compagne: ven stâi jessi intun stât di abandon ecessîf, ma vint un potenziâl une vore grant di podê jessi disfrutadis cun tantis particolaritâts di tornâ a puartâ ae lûs.”
_
Tal concret, in ce maniere puartaiso indenant la vuestre azion?
“Sul imprin la dificoltât principâl che o vin cjatât e jere propit chê di frontâ il probleme dal frazionament des proprietâts, che o vin analizât tirant fûr dal catastic la liste dai proprietaris dai tancj teritoris abandonâts e cjapant contât cun lôr un par un.
Chest al jere il lavôr plui delicât di puartâ indenant: proponisi te maniere juste cu lis personis, spiegant cui che o jerin e ce che si impegnavin a fâ.
Il strument che nus à permetût di cjapâ acuardis cun tancj di lôr al è contignût inte Leç 10; e je une clausule che e permet ae associazion di acuardâsi cul proprietari par che chest i dedi in man la gjestion dal teren par un ciert periodi di timp (minim sîs/siet agns). In cheste maniere il paron al devente ancje lui soci de associazion in maniere automatiche.
Vie par chescj agns, la associazion e interven cun varis lavôrs che a puartin al disboscament, ae pulizie, ae cure e ae difese dal teren dât in concession.
Di là di cheste azion direte, si impegnìn a difondi lis nestris ideis midiant di riunions e cunvignis periodichis.”
__
Cuâi risultâts che o vês otignût fin cumò?
“Di là di vê contribuît a un abeliment paisagjistic almancul parziâl dal teritori e ae sensibilizazion di un numar simpri plui alt di personis in cont dal nestri progjet, o vin ancje in vore une colaborazion cun dôs aziendis – une logade a Dughe, frazion di Stregne, e chê altre che e lavore di Prepot fin a Stregne – che, dopo dai acuardis cjapâts cu la associazion, a percepissin i contribûts previodûts de Leç 10 e a tegnin curadis lis lôr areis di competence.” ❚
