Al va creât dut un indot ator des ciclabilis,
un setôr in cressite a dôs cifris in Europe
Ator de ciclovie Alp Adria nol è il desert, ma dal sigûr tantis carencis e chest al limite l’impat economic sul Friûl dal cicloturisim, un dai comparts in plui grande cressite in Europe. Luca Mastropasqua, president regjonâl de Fiab (Federazion taliane ambient e biciclete) al è categoric e al bute aes autoritâts un apel fuart par acelerâ l’impegn.
«Cuant che si fevele di cicloturisim bisugne meti dongje trê aspiets – al sclarìs Mastropasqua -: lis infrastruturis ciclabilis, i servizis dilunc dal percors e la comunicazion. Se al mancje dome un di chescj elements, il cicloturisim nol partìs».
Tachìn des infrastruturis: «No si fevele sôl che di percors ciclabii – al splee Mastropasqua -, ma ancje di stradis a trafic bas o dut câs siguris e comudis pai cicliscj. In Friûl- Vignesie Julie une leç regjonâl e à istituît ben 10 agns indaûr la rêt ReCIR, che il so grât di realizazion al è, però, une vore bas. La part plui indenant e je la ciclovie Alpe Adria, di Cocau a Grau, la dorsâl de nestre regjon za fate pal 85 par cent. Al è un dai percors plui desiderâts dai turiscj todescs, tant che al risulte di une investigazion de Fiab todescje dal an passât che lu met al cuart puest in Europe. E in Gjermanie il cicloturisim al è un fenomen di masse che al môf 12 miliarts di euros l’an, a pet di un totâl european di 44 miliarts e ai 2,5 de Italie».
Parcè chest percors atraial cussì tant? «Pôcs itineraris cicloturistics a partissin de mont e a rivin al mâr – al evidenzie il president de Fiab regjonâl -. Pocjissims a cjapin dentri ambients cussì diviers e varis tant che la ciclovie Alpe Adria, cussì siore di atrativis paisagjistichis e culturâls».
Il secont itinerari par impuartance de rêt dal Friûl-Vignesie Julie al varès di jessi chel adriatic, «che magari cussì no al è tant indaûr – al sotlinee Mastropasqua – se escludìn il trat Monfalcon-Grau. A son stâts za stanziâts 16 milions di euros intal ambit di un acuardi tra Friûl- Vignesie Julie e Venit, ma ancjemò i risultâts no si viodin sul teritori. La rêt intal complès no passe il 40 par cent dal completament».
E dal pont di viste dai servizis? «I elements di base a son l’acet e la intermodalitât – al sclarìs Mastropasqua -. Il cicloturist al à bisugn di un jet comut (la etât medie e je tra i 50 e i 70 agns) e di un ricovar pal so mieç a dôs ruedis, cun cualchi imprest par comedâ alc, e covente une buine gulizion di matine e a un cost acetabil. Intal ambit dal acet si sta creant in Friûl une rêt di bed&breakfast dongje des pistis ciclabilis, ma a restin diviersis zonis di cuvierzi. Ancje su la intermodalitât al è tant di fâ, se si esclût il tren Micotra di Clanfurt a Triest».
Infin la comunicazion. «Il cicloturist che al ven in Friûl al cjate cun dificoltât informazions sul percors, ancje sul sît di PromoTurismoFVG. Sui sîts istituzionâi di tantis regjons europeanis al è pussibil scjariâ il segn gps dai percors, ma ca di nô nol è ancjemò. A son i sîts austriacs a dâ lis informazions miôr e plui detaiadis su lis cicloviis in Friûl. Al è dut un indot ator dal cicloturisim che chi di nô al à ancjemò di svilupâsi. Un turist normâl al spint in medie 60 euros in dì, un cicloturist al spint 70. Bisugne svilupâ une ufierte che e fasi massimizâ chest dât pal nestri teritori».
In sumis, un belanç in ombrelûs. «La Regjon e somee convinçude a invistî intal cicloturisim – al siere Mastropasqua – che al è un dai pôcs comparts economics che al cres ancjemò a dôs cifris e al destagjonalize il turisim, lant indenant di Fevrâr a Otubar. Ma al è ancjemò tant ce fâ».❚
Roberto Pensa
