ATUALITÂT. Ancje a Hong Kong si fevele par furlan

Ai 15 di Otubar stâts al è stât screât in vie uficiâl il prin Fogolâr furlan di dute la Asie. Si trate di chel de citât di Hong Kong, par plui di un secul colonie britaniche e tal 1997 tornade ae Cine.
O vin volût sintî il president dal Fogolâr Paolo Sepulcri, nassût a Udin ma che al è a stâ a Hong Kong di une vore di agns.
President, cemût ise lade la cerimonie di inaugurazion dal vuestri Fogolâr?
Benon. Pal Ent Friûl tal Mont a jerin il president Giorgio Santuz e il vice president Pierantonio Varutti; al jere presint ancje il Consul talian Alessandro De Pedys. L’invidât speciâl al jere l’innomenât regjist locâl Johnnie To, che al à cjapât part putropis voltis al “Far East Film Festival” di Udin e al à zirât il so cine Yesterday Once More ancje tal cjâf lûc furlan.
Cuant e cemût isal nassût il so rapuart cu la Cine?
O soi vignût pe prime volte in Cine, a Pechin, tal 1985. Culì o ai vivût e lavorât par doi agns tant che responsabil dal ufici di rapresentance de Danieli.
Ce lavôr fasial cumò a Hong Kong?
O vîf chenti dal 1989, e o pues pardabon considerâle la mê citât di adozion. La mê aziende e lavore par cont di impresis talianis e europeanis che a àn rapuarts comierciâi cu la Cine: la nestre funzion e je soredut chê di colmâ il gap culturâl jenfri chescj doi monts.
Saial fevelâ par cinês?
Magari cussì no, no masse ben. A Hong Kong o sin un pôc “viziâts” dal fat che une largje maiorance de int e fevele benon par inglês e duncje no vin tante pression par imparâ il cinês.
Cuant e cemût ise nassude la idee di dâ dongje un Fogolâr furlan?
Jo o vîf culì aromai di vincj agns, e in dute la Asie sociis compagnis no ’nd jerin. O ’ndi fevelavin di agnorums par vie che o vevin chê di stabilî un leam plui fuart cu la nestre tiere di divignince. Cussì l’an passât, dutun cun altris doi amîs di lidrîs furlane, Alberto Zancanaro e Claudio De Bedin, o vin decidût di meti in pîts il prin Fogolâr asiatic, nassût ai 7 di Dicembar dal 2007 e screât, come che si à dit, ae metât di Otubar dal 2008.
Trops sono i socis? Ce etât àno?
O vin uns 25 socis che a àn dai 25 ai 60 agns.
Cemût ise stade la rispueste dai furlans di culà vie ae sô clamade?
Une vore positive. Il Fogolâr al è preseât no dome dai furlans ma ancje dai talians di Hong Kong, che lu tegnin tant che un centri vivarôs par cjatâsi adun.
Li di voaltris isal un “Udinese club”?
No ancjemò, ma o vin chê di metindi in pîts un dentri di pôc.
Isal alc di simil tal mût di vivi di Furlans e Cinês?
I Cinês, come i Furlans, a son une vore sparagnins e grancj lavoradôrs. Cun di plui, al è cetant sintût il sens de famee.
Ce puedial conseâ aes aziendis furlanis che a vuelin vê a ce fâ cul marcjât cinês?
In dì di vuê al è impuartanton jessi in chest paîs. Dut câs bisugne prontâsi ben e no improvisâ, se no si va di sigûr incuintri al faliment. Par gno cont, a Hong Kong a podin vê sucès i nestris vins. Cun di plui, si pues fâ valê lis bielecis dal Friûl, fasintlu deventâ mete turistiche. Bisugne però metisi sot par fâ cognossi miôr la nestre tiere: ancje il nestri Fogolâr al darà il so contribût.
ALESSIO POTOCCO