ATUALITÂT – ARLeF, si siere un cicli

La Agjenzie Regjonâl pe Lenghe Furlane e à sierât il 2008 cuntune schirie di conferencis stampe par presentâ la ativitât che e à davuelt e i progjets che e à finanziât fin cumò, tai setôrs strategjics de politiche linguistiche. Tal detai, si à fevelât das colaborazions e dai progjets finanziâts ae Universitât dal Friûl e ae Societât Filologjiche Furlane, di chei metûts in vore tes scuelis, dai progjets pe musiche e pe editorie, e de campagne di promozion de Agjenzie stesse. Sîs apontaments, un par setemane, ognidun incentrât suntun argoment specific, in maniere di dâ une imagjine complete de Agjenzie che, magari cussì no, pe plui part de int e je ancjemò pôc cognossude. La int no sa ce che al è stât fat, e chest al à di fâ rifleti sedi il gnûf che il Consei di Aministrazion passât: lassâ la promozion di se ae fin di un mandât no je une sielte imbrucjade, ni pal Ent, ni pe politiche linguistiche.
E in chescj agns la ARLeF  e à metûts in vore biei progjets.
Par chel che al inten la Universitât dal Friûl a son stadis finanziadis borsis di studi e assegns di ricercje su cetancj argoments difarents (de ricercje su la didatiche plurilengâl a chês sul lessic e sul impat des leçs di tutele, dai cors di formazion par insegnants, ae predisposizion di une gramatiche de lenghe furlane). Po dopo il master di secont nivel/cors di inzornament Insegnâ in lenghe furlane, che al è daûr a formâ par un sisteme didatic plurilengâl 50 insegnants des scuelis de infanzie, primarie e secondarie: une preparazion no dome linguistiche, ma ancje culturâl e didatiche. E, tal ultin, il Thesaurus de lenghe furlane: une ricercje su la lessicografie che e ten dongje i aspiets storics, leteraris e documentaristics de lenghe furlane, e che a ‘nd documente ancje la antroponimie e la toponomastiche storichis, cul obietîf di dâ une vision diacroniche de marilenghe.
Une vore siore e je stade ancje la colaborazion cu la Societât Filologjiche Furlane. I progjets finanziâts a cjapin dentri setôrs difarents: si va di Omenuts, i dissens animâts pai fruts plui piçui, al Atlant Toponomastic dal Friûl Vignesie Julie che al cjaparà sù ducj i microtoponims de regjon, al cors di e-learning, ai aromai classics cors di alfabetizazion di lenghe e culture furlanis, par finî cu lis traduzions dai classics de narative foreste e cu la trascrizion in grafie uficiâl di oparis de leterature furlane. Si cîr di rivâ a cjapâ dentri no dome i grancj e i studiôs, ma ancje i plui zovins e, in gracie des gnovis tecnologjiis, ducj chei di chenti, ma soredut tal forest, che a àn gust di imparâ la lenghe furlane.
I progjets plui gnûfs e origjinâi a son chei finanziâts tai setôrs de musiche, de scuele e de editorie, parcè che, come che al declare il Diretôr Massimo Duca, “la promozion de lenghe furlane no si fâs dome cun progjets di ricercje e studi di tescj, analisi dal lessic, produzions scritis, ma ancje doprant formis di comunicazion zovinis, modernis e ae puartade di ducj”. Ve inalore nassi progjets come Lenghe di Vacje, une racuelte di testemoneancis orâls trasformadis in musiche di compositôrs internazionâi di musiche contemporanie. Po dopo, dongje di cheste azion sperimentâl, al è il finanziament dal progjet Suns che, dongje dai zaromai classics apontaments di Musiche e Premi Friûl, al previôt di realizâ une antologjie de gnove musiche furlane. Il fin di chestis azions al è chel di slargjâ la cognossince e la visibilitât mediatiche de musiche furlane ancje fûr dal so teritori.
Une vore biei a son i progjets tal setôr de scuele. Di fat, dongje dai intervents plui istituzionâi tant che la produzion di materiâi, come la guide par gjenitôrs e insegnants Cressi cu dôs lenghis e la conte Aghe sute, aghe bagnade, scrite dai fruts de Scuele Elementâr di Bordan dentri di un progjet european, la Agjenzie e à finanziât doi progjets pensâts pes scuelis mediis inferiôrs e superiôrs. Radio dîs e Fâs furlan, ideâts di Radio Onde Furlane e de cjase editore Kappa Vu, di Novembar in ca a àn puartât la marilenghe ator pes scuelis dal Friûl. Progjets gnûfs, divertents che a fevelin la lenghe dai zovins cul fin di fâi viodi ce che si plate daûr de culture furlane: musiche, video, cine, libris, sîts Web… Un mont che la plui part di lôr no cognòs par nuie e che, in gracie di chestis iniziativis, si spere che al stici la lôr curiositât.
Ancje i finanziaments te editorie a son stâts pardabon tancj e a àn cuviert setôrs difarents: dai bimensîi aes publicazions sientifichis. La ARLeF e finanzie publicazions par fruts come il mensîl Alc&Cè, il bimensîl di cronache, culture, spetacul e timp libar Il Diari, il periodic di tescj, saçs, narative e leterature furlane La Comugne, e il Gjornâl Furlan des Siencis, a dimostrazion di cemût che il furlan al pues deventâ un mieç di elaborazion e di creativitât sientifiche.
L’ultin apontament, pensât dut pai zovins, al è stât chel di plui sucès. Tal auditorium dal Centro Solidarietà Giovani plen di students, la Agjenzie e à presentât i siei progjets di comunicazion: dal concors pai students pe creazion dal gnûf logo, ae presentazion dal gnûf sît Web e dal program radio Furlanication.
Zovins e comunicazion, il sucès de politiche linguistiche de Agjenzie al è inevitabilmentri leât a chescj doi elements. Viodudis lis tantis ativitâts puartadis indevant in chescj agns, il fat che la ARLeF no sedi cognossude, che fin cumò no vei vût un grant impat sul teritori al è pardabon un pecjât. In spiete che il gnûf President e il Consei di Aministrazion si insediin, ben e à fat la Agjenzie a organizâ chescj incuintris: il percors al è stât inviât, viodarìn cemût che al sarà puartât indevant.
FEDERICA ANGELI