ATUALITÂT – Autonomisim Popolâr

Al ven di domandâsi parcè che la nestre regjon e sedi la uniche tra chês a statût speciâl che no je rivade a esprimi une rapresentance politiche no peade ai partîts che a dipendin di Rome o di Milan, e che e vedi come pont centrâl de sô azion e dai siei programs la rivendicazions dai interès e la difese de identitât linguistiche e culturâl di une comunitât che come chê furlane e à tancj elements di origjinalitât. Tal Sudtirôl o vin la Sudtiroler Volkspartei, tal Trentin il Partît Autonomist Trentin Tirolês, te Val di Aoste la Union Valdotaine, te Vignesie Julie la Union Slovene, in Sardegne il Partît Sart di Azion, in Sicilie il Moviment pes Autonomiis. Dome in Friûl al mancje un moviment politic che al dedi vôs ai interès de comunitât.
Lis resons a son tantis e o cirarìn achì di metilis in evidence.
TRÊ RESONS DE MANCJANCE_ Prime di dut, la cussience di jessi minorance nazionâl no je achì come in Sardegne avonde fuarte. Todescs, slovens, francês a son penisulis di realtâts nazionâls. Furlans e sarts no àn un stât daûr. Si pues alore capî cemût che propit in chestis regjons lis espressions politichis de comunitât minoritarie a sedin une vore debulis.
La seconde reson si pues viodile te assence di une trame di realtâts associativis o in ogni câs organizadis che a puedin sostignî in maniere direte o indirete la formazion di une espression politiche de comunitât furlane. La Societât Filologjiche Furlane e chês altris clapis a son masse pôc pandudis sul teritori par podê disvilupâ une azion di cheste nature.
La tierce reson e pues jessi individuade tal particolarisim, che al è une vere maledizion dal Friûl. Se nol è nassût un fuart moviment autonomist, chest al dipent de tindince ae framentazions e aes contraposizions che, se a son un mâl atavic dai furlans, a son une carateristiche particolâr dai autonomiscj. Ogni gruput autonomist si sint plui brâf di chei altris e al è dificil fâju colaborâ.
I MODEI EUROPEANS_ Une ultime, impuartante considerazion e va fate. Si à di rindisi cont che il pûr furlanisim nol è avonde par formâ une fuarce politiche. Sul furlan o sin ducj dacuardi (magari no simpri, cuant che si scomence a fevelâ di grafie, di coinè e di variantis locâls). Si à di dâ al autonomisim une fonde di pinsîr e di orientaments che a podedin peâ la rivendicazion linguistiche a ispirazions di politiche economiche e sociâl avonde fuartis e coerentis. E chi o vin di jessî clârs. La difese e la valorizazion di un codiç linguistic antîc tant che il furlan e il fat che al è stât pussibil mantignîlu dome tes tantis piçulis comunitâts che a formin il Friûl, mentri lis citâts si son vendudis aes fevelis dai parons venits prime, e talians dopo, a individuin intun pinsîr popolâr di ispirazion europeane lis fondis di un autonomisim rignuvît. Il stes pinsîr popolâr e moderât che al à fate la fortune dal autonomisim bavarês, sudtirolês, catalan e ancje basc. Al è chel che al varès di ispirâ un gnûf moviment autonomist furlan che al vedi cualchi sperance di afermâsi. In fin dai conts, il Moviment Friûl al è disparît cuant che su di une fonde popolâr alimentade des parochiis si è soreponût un grup dirigjent di zovins influençâts dal ’68, val a dî di çampe. I eletôrs a sono tornâts a la cjase mari, ae democrazie cristiane, lassant un moviment une vore smagrît a un grup di zovins che a àn resistût fin ae nassite de Leghe, dulà che a son cuasi ducj finîts, dant fuarce a un partît che plui centralist no pues sei.
PAR UN GRANT MOVIMENT AUTONOMIST_ O vin ducj di lavorâ pe costruzion di un grant moviment autonomist che al sepi interpretâ lis aspirazions di strâts impuartants de comunitât furlane. La ricercje di elements di autonomie tes struturis e lis ativitâts economichis, la atuazion di une vere economie sociâl di marcjât, la valorizazion de piçule imprese, la tutele dal ambient e dal paisaç naturâl e costruît, la valorizazion dai piçui comuns, la ricostituzion de unitât de comunitât furlane che e à di cjapâ dentri i furlans che no stan te Regjon (Friûl concuardiês e Sapade), la tutele e valorizazion des comunitâts linguistichis plui piçulis che in ogni câs a fasin part de plui grande comunitât furlane (todescs de Cjargne, slâfs de Slavie furlane e di Resie, venits di divignince storiche de marine, come Grau, Maran e Bisiacarie), il distac di chel centri di disnaturalizazion dal Friûl che al è costituît di Triest: a son ducj elements di un program autonomist. E al è par puartâ indevant chescj obietîfs e programs che, par iniziative soredut di un grup di zovins jessûts in buine part de Universitât dal Friûl, e je stade costituide sîs agns fa la Associazion pe autonomie dal Friûl “Identitât e Inovazion”, che e vûl jessî il motôr pe costituzion di un moderni moviment autonomist furlan.
Marzi Strassolt
Segretari di Identitât e Inovazion