E jere une zornade une vore cjalde, une des tantis di cheste stagjon. Mi soi fermât tal dopo di misdì in place Prin di Mai, un dai lûcs plui nomenâts di Udin e tal stes timp un dai mancul interessants di viodi, almancul par un che al ven di fûr.
In cheste slargjure mi soi cjatât cun Daniele Martina, un zovin di vincjecuatri agns che al rive di Gjenue, o vevi apontament cun lui par fâ une interviste e viodi il fenomen de emigrazion dal pont di viste di un zovin, di un che al è nassût fûr di chenti e di cemût che si cjale al Friûl stant lontan. Par chest mi jeri preparât ancje cuatri domandis di fâ.
La sorprese però e je stade une vore grande, Daniele al è un zovin che al fevele vulintîr, une persone che cuant che e fâs partî lis peraulis lis fâs saltâ fûr sburtadis di une passion e di une fuarce che no si viodin tant dispès. Ce che o vevin di contâsi in chel incuintri lu vin fat fevelant in maniere sclete, tocjant argoments une vore difarents e cul plasê di une cjacarade in buine compagnie. Dopo pôc timp che o jerin sentâts a tabaiâ, lis domandis che o vevi preparât lis ai lassadis di bande e o vin lassât che il discors al cori vie di bessôl dilunc
la sô strade.
O ai scuviert cussì un zovin nassût fûr dal Friûl, che al è cressût, al à studiât, e ore presint al vîf a Gjenue, la citât dulà che subit daûr de seconde vuere mondiâl so nono al jere rivât emigrant par lavôr. Une famee di emigrants chê dai Martina, dulà che sô none e jere nassude in Gjermanie, e che tancj altris de famee a son partîts pal mont, ducj emigrants dal mosaic e lavoradôrs di cheste art. Partîts ducj, lassant la cjase di Taurian di Spilimberc vivude dome di un barbe lontan.
I FURLANS DI GJENUE_ Mi conte dai furlans di Gjenue, in chê citât di mâr in dì di vuê a vivin tor i tresinte furlans tra emigrants e lôr dissendents, ma dome in 60 a fasin part dal Fogolâr Furlan. A dî il vêr il numar dai iscrits nol sarès par nuie mâl, il grop al è ben numerôs, il probleme al è tal fat che la etât medie e je une vore alte e lui al è l’unic “under 40” de associazion.
Lis voris che il Fogolâr al varès di fâ a saressin di stamp culturâl, o ben di tignî vivis lis tradizions e la furlanetât, ma stant la etât dai socis e mancjant il cambi gjenerazionâl la uniche funzion dal grop e je chê sociâl. Cussì i vielis furlans di Gjenue si cjatin la joibe e la domenie di sere par cenâ in compagnie te lôr sede, sistemade in centri a doi pas dal Palaç Ducâl, e mangjant polente e frico a ricuardin la zoventût in tiere furlane.
Dal sigûr masse pôc par un zovin come Daniele che al varès tante voie di fâ alc di gnûf ma che nol cjate lis pussibilitâts par fâlis deventâ concretis.
Lui lu dîs clâr e net, continuant su cheste strade ca di dîs o vincj agns i Fogolârs Furlans ator pal mont no esistaran plui, parcè che come a Gjenue ancje chei altris a son vecjos e i zovins no si interessin plui di chel tant. In Friûl si fevele tant di Fogolârs ma i Fogolârs tra di lôr no rivin simpri a fevelâsi. E tra i tancj che a esistin al mancje un: o ben al coventarès un Fogolâr-on-line, fat di un Friûl virtuâl dulà che i zovins dal mont si cjatin par fevelâ la lenghe di cumò e no simpri e dome chê dal frico e dal muset.
AMÔR CHE AL VEN DI LONTAN_ Un amôr pal Friûl che al rive des contis dal nono, che di frut i contave de latarie, dai magrêts, des sagris, dal Tiliment. E scoltant il vecjo ben planc la sô anime si piturave cui colôrs dal Friûl, e des primis vacancis fatis di frut tornant te cjase dai vons, cumò lis istâts lis passe simpri culì, e ogni volte che al pues al torne in chê che e je la sô seconde cjase.
O forsit prime.
Lui al volarès un leam plui fuart cul Friûl ancje stant lontan e al mostre lis dificoltâts: radio Rai regjonâl no si scolte vie internet, Messaggero Veneto e Il Gazzettino bisugne paiâ, se nol fos par Lenghe.net, cualchi blog o par altris iniziativis privadis dal Friûl no si rivarès a savê nuie. Vivint ator pe Italie no si à il sens di ce che al è il Friûl, nissun al fevele di cheste tiere, di fat e esist une dominance culturâl dai grancj mieçs di comunicazion che a cjalin dome a altris regjons e cussì si pues viodi che al esist une sorte di “scûr di là de Livence”.
SI PODARÈS FÂ DI PLUI_ Prime di lassâsi mi pant la sô preocupazion su lis barufis di curtîl che a son in Friûl, che impen di dâsi di fâ chi si piert timp a cuistionâ, soredut par chel che al rivuarde la lenghe furlane e ce che al zire li intor. Si podarès fâ tant di plui, ma dispès i Ents a son politicizâts e burocratics e lis organizazions no simpri a àn la cognossince di chê che e je la realtât dal dì di vuê. E al siere la lungje cjacarade disint: “a Gjenue no si fevele ma si fâs; in Friûl si fevele ma no si fâs”.
_________________________________________
L’Ent Friûl tal Mont si è cjatât a Midun
Avost mês di vacancis e mês dulà che tancj emigrants a tornin tai lôr paîs.
Si è davuelt a Midun ai 2 e ai 3 di Avost l’incuintri inmaneât dal Ent Friûl tal Mont che al profite de presince dai furlans che a tornin par imbastî la lôr “convention”.
Doi dîs di incuintris par stazâ la situazion dai emigrants furlans, cu la presince di rapresentants che a rivin di ogni bande dal mont, dal nord e dal sud de Americhe, de Europe e fintremai de Cine cu la presidence dai rapresentants des istituzions furlanis.
