FRIÛL FUR DAL FRIÛL. Il vecjo dal Mac Mahon

Tarcisio Fabris, 80 agns puartâts benon, al è a stâ a Milan e ae fin dal 2011 al à vût la grande sodisfazion di vinci l’Ambrogino d’oro, il ricognossiment plui impuartant de citât di Milan pe ativitât che al davuelç a pro de citadinance. Aromai di agnorums al tire sù cetancj fruts te societât OSG (oratori San Gaetano) li dal cuartîr Mac Mahon. Di fat Tarcisio lu clamin “il vecjo dal Mac Mahon”, “il vecjo” come un altri alenadôr furlan plui famôs, Bearzot. La sô e je une scuele no dome di sport ma massime di vite, come che nus conte cun braure.
Siôr Tarcisio, lui di dulà isal?
O soi nassût a Basilian, dongje Udin.
Lui jerial un zuiadôr di balon, fint a ce nivei jerial rivât?
O ai zirât la Italie in categoriis piçulis fint a rivâ a une promozion in serie C cuant che o jeri a Saronno. Po dopo o ai molât par cirî lavôr, che chei no jerin agns tant biei, ae fin dai agns 50.
E cemût isal rivât a Milan?
Ancje in gracie di cualchi cognossince par vie de mê cariere sportive, e cun gno fradi Paolo. Ancje lui sportîf, campion di “Stajer” (une dissipline ciclistiche di piste che no esit plui, li che il coridôr al lave daûr a un motociclist). Ancje lui al à scugnût molâ il sport par lâ a vore e al jere a Milan.

Nol à molât dal dut il balon, però: lui à vût l’Ambrogino d’oro tant che alenadôr di scuadris zovins.
Sì, e je simpri stade la mê passion e cun di plui o rivavi a tirâ sù cualchi franc in plui, che come che o disevi a jerin timps che par tirâ indevant al voleve ancje un secont lavorut. E cussì o ai continuât a fâlu in variis scuadris de zone.
Lui al insegne a fruts di ogni etât a ogni nazionalitât…
Lis etâts a van dal 2002 al 2005 e aromai tal cuartîr dulà che o soi jo a son ogni sorte di nazionalitâts. Però la impostazion che o ai volût jo, judât di brâfs dirigjents, e je che prime di dut e à di jessi la serietât e l’impegn. Cussì o vin rivât a vê une societât di grant nivel (amatoriâl, si intint) che e da sodisfazion a ducj, fantats par prins.

A proposit di forescj che a vegnin chenti, ise cualchi someance tra la emigrazion che al à vivût lui e cheste?
Pocjis: jo mi visi che cuant che jo e gno fradi o vignivin a vore a Milan, se o jerin a stâ di cualchi bande i vigii a passavin a viodi cui che al jere, trops che o jerin… Cumò a ‘nd è mancul serietât.
Aial nostalgjie dal Friûl?
Ah, beh, a mi un mês di feriis a Lignan no mal gjave nissun, e cun chel o fâs cualchi zîr sù a Basilian e pal Friûl. Pal rest, dopo che tu stâs cetant intun puest, tu ti fasis leams a Milan.
La premiazion ce emozion ise stade?
Une emozion grandonone, jo no savevi che al jere plui di un a jessi premiât, e dongje a chei personaçs mi sintivi un moscjin tra i elefants. Al è stât bielon e massime savê di jessi stât segnalât dai miei concitadins che si son metûts insiemit par mandâ indevant la mê candidature: e je une prove che se si fasin lis robis ben tu otegnis stime e risultâts. ■
Dree Venier