ATUALITÂT – Friuli doc mancul cjoc?

Si scomence dal passât. Ripuartant lis lancetis indaûr, al pont di dulà che e jere partide. E scancelant la plee che e veve cjapât. Un recupar soredut rispiet ai motîfs che culì le vevin fate nassi, prime. E sburtade, po dopo. Duncje, a 15 agns dal so inizi, Friuli Doc (in program a Udin dai 17 ai 20 di Setembar), e torne ae sô stesse origjin e mission: maman barachins de Stirie, wurstel di Klagenfurt e bire di Vilac.
AUTARCHIE_ Al sarà dut «doc», tal sens «cent par cent nestri». Le podaressino clamâ autarchie de crisi? Sigurementri un pugn plui dûr, une strete sui ecûs des ultimis edizions. Al sarà l’anim matematic mai lât al mancul a fâi imbastî a Furio Honsell, sindic di Udin (ent organizadôr) la gnove formule, dute tal trinomi tipicitât – cualitât – sigurece. Par chest motîf, ai spice al prin citadin di sclarî che «cui esercents o vin condividût la necessitât di scomenûâ a proponi modei di fruizion plui sans di cheste manifestazion». Che al vûl dî: mancul musiche «tunz tunz» fûr contest, mancul bevarons a peton. Impegn a combati i abûs e la soministrazion di alcolics a chei plui zovins di 16 agns e a cui che za al û cjoc. La dite che e à l’apalt di animazion e intint invezit improntâ l’intrateniment musicâl evitant gjenars musicâi masse trasgressîfs o che a puedin disturbâ il public. O varìn, duncje plui bandis di strade popolârs, concierts di grups par ogni serade di manifestazion, spetacui pai fruts, coros e cjantosis.
IL TEME DAL 2009_ La edizion dal 2009 e sarà dedicade ae riviere furlane. Te aree di place Libertât, sît principâl de manifestazion, si cjataran i bancuts – vetrinis di Lignan e di Grau, la lagune di Maran –, i savôrs e i profums des stradis dal vin, che a traviersin la plane de Basse. Chescj alestiments e chei di place Venerio a podaran contâ su la colaborazion de Provincie di Udin, che a finanzie cuntun contribût di 12 mil euros.
A coordenâ dut il progjet e sarà la associazion «Strade dal vin» di Aquilee. Trentedoi i comuns cjapâts dentri, di Palme in jù. E in zonte: lis cooperativis dai pescjadôrs, lis doc e lis marinis. Un stîl plui cuiet, insumis. Al dîs l’assessôr al turisim de provincie di Udin, Franco Mattiussi: «O vin dât bon acet ai gnûfs criteris pe partecipazion dai esercents ae manifestazion. Bar, ristorants e ostariis che a parteciparan al event a saran autorizâts ae distribuzion di bevandis e dal mangjâ ancje tai bancuts fûr dai lôr locâi, baste che a sedi robe di cualitât, leade aes tradizions dal puest».
ERSA IN Place_ Altre gnove: e tornarà la Ersa. La Agjenzie regjonâl pal svilup rurâl e larà a gjestî il spazi di place XX Settembre. La presince e segne un coinvolziment diret dal assessorât ae agriculture e de regjon Friûl. Presints i consorzis «OP» (Organizazions dai produtôrs), che e cjape dentri il consorzi dal persut di Sant Danêl, chel dal formadi Montâs, i apicultôrs des provinciis di Udin e di Gurize, la cooperative produtôrs di patatis, la associazion dai arlevadôr di trutis, la cooperative «Le lagune», i valicultôrs di Maran e di Grau, la associazion nazionâl arlevadôrs de vacje «rosse furlane» e la cooperative «Blave di Mortean». Cun di plui, spazi ancje ai ponts di informazion di Turismo FVG, a chei altris ents regjonâi e a un stand pe mangjadorie.
I zovins a varan la lôr «oasi». Par cuatri dîs, fûr di Palaû Antonini e di vie Petracco si fasaran spetacui, moments musicâi e teatrâi, mostris e laboratoris creatîfs, video e di scriture. Sul palc, si viodaran grups musicâi zovanîi e dj. Il program, volût dal assessorât al turisim e di chel aes politichis dai zovins dal Comun di Udin, al û burît fûr diretementri dai fantats coinvolts tai diviers «Forum», par mieû di un bant specific, par dâ la pussibilitât di promovi lis realtâts artistichis locâls.
Si pensarà ancje ae ecosustignibilitât e al sparagn energjetic, ancje intal intrateniment. «O volìn dâ une gnove impronte ae manifestazion – al spieghe il vicesindic Vincenzo Martines – cjapant dentri i zovins te organizazion di un event in grât di sensibilizâ compuartaments plui sans e stratignûts. Rindintlu plui «zentîl», o alûarìn ancje il nivel cualitatîf». Insome, nus spiete un FriuliDoc di profîl plui contignût. E, forsit, no podarìn plui sblefâlu «Friuli-Cjoc». Starìn a viodi.
Oscar Puntel