Sfuei Mensîl Furlan Indipendent
Archivi de Patrie

ATUALITÂT – La Clape Friûl dal Mont a Claut cu la comunicazion 2.0

............

Tal imagjinari comun, l’ex emigrant al è viodût tant che un om intimpât, dispès bessôl, che si strapuarte di un ambient a chel altri contant, ai pôcs amîs, la sô zonventût di fadie passade in Venezuela, in Svuizare, in Gjermanie o in Canadà. Tipiche afermazion di chest om e sarès: «Tal Canadà chestis robis lis ai viodudis za cuarante agns fa!». Nostalgjie, isolament, dûr reinseriment tai paîs di divignince: ae Clape Friûl dal Mont, dut chest no i plâs! La Associazion di ex emigrants e je impegnade di agns inte promozion sociâl di chei che lant a contribuirin a fâ cressi il nestri Friûl e che, magari cuintri la volontât de femine e dai fiis, a àn decidût di tornâ in Regjon. No dome pensionâts: di agns si verifiche un lunc ma positîf fenomen di zovins che a tornin, massime de Argjentine, dal Brasîl, dal Canadà e di altris regjons talians. Si scjampe des grandis citâts, sielzint la cualitât de vite ufierte dai nestris borcs.
ESIGJENCE CHE E VEN DAI SOCIS_ Par rispuindi a lis esigjencis dai nestris socis e no dome, doi agns indaûr al è nassût il sît www.clape.it che vuê al è rivât a cuasi 20.000 contats. Mancjant lis  risorsis suficientis par vierzi un ufici patronâl e i mieçs par une azion capilâr tal teritori, la Clape e à pontât une vore su la comunicazion, organizant cunvignis, partecipant a trasmissions radiofonichis e televisivis, furnint contribûts scrits ai gjornâi locâi, judant students a scrivi tesis di lauree.
LA CUNVIGNE_ Contatade dal Co.Re.Com – F-VJ, la Associazion e à organizade une cunvigne: «La Comunicazion 2.0 a sostegn de economie locâl», davuelte a Claut ai 5 di Lui stât.
La sielte de Val Celine no je stade casuâl. Dome lis tecnologjiis «lizeris» e la riscuvierte des tradizions a podaran ufrî a chestis zonis periferichis une gnove centralitât. Plui di dusinte personis a àn scoltât, con interès straordenari, lis relazionis di Eugenio Ambrosi, Gugliemo Favi, Gino Marco Pascolini, Lauro Nicodemo e lis intervents di Luca Ciriani, Monica Tallone e Marco Macorigh. I  zovins furlans tal forest a podaran cjatâsi, coltivâ amistâts dapardut e deventâ i miôr promotôrs dal «Fat in Friûl», par mieç di Internet e des sôs aplicazion a cost zero. A podaran vierzi gnûfs marcjâts pes nestris piçulis e mediis impresis, meti sù puescj di vore, dut cuntune fuarte conotazion indentitarie furlane.
UNE GNOVE SFIDE_ Se la globalizazion e à danegjât i nestris teritoris, la sfide di vuê si clame «glocalizazion», tiermin di disvilupâ cun progjets, ideis, passion che a varan di lâ plui in là des pagjinis dai gjornâi e des plateis des cunvignis. Insieme si pues, ufrint un spazi di incuintri tra furlans pal mont e furlans in Patrie, cui ex emigrants che a vuelin fâ la part di une buine cole che e ten benon dut adun!
Daniele Martina
pe associazion Clape Friûl dal Mont

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +

L’EDITORIÂL / No stin a colâ inte vuate de indiference

Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +