ATUALITÂT. “Lenghe”, un gnûf strument pal insegnament ai adults

Ai prins di Setembar al è stât presentât “Lenghe. Cors di Furlan” di Stefania Garlatti-Costa e di Roberta Melchior, publicât dal Consorzi Universitari dal Friûl. Si trate di un cors di furlan par students di etât adulte, pensât par podê jessi doprât di personis cun abilitâts diferentis: di chei che a capissin ben il furlan, ma no lu fevelin, a chei che lu cjacarin tant che lenghe native, ma no son bogns di leilu e di scrivilu.
UN IMPREST MODERNI_ La particolaritât di cheste publicazion e je la sô modernitât, sedi inte impostazion didatiche, sedi inte vieste grafiche e inte impagjinazion (la grafiche le à curade Francesca Luzzi, i disens a son di Elisabetta Ursella). Il cors al è dividût in trê fassicui: il libri dal student, la vuide pal insegnant e lis soluzions dai esercizis.
IL LIBRI PAL STUDENT_ Il libri pal student al è formât di 14 unitâts progressivis, di une presentazion sistematiche de grafie cun esercizis, di une sezion gramaticâl cun esercizis, e di un glossari furlan-talian. Ogni unitât e scomence cuntun test principâl gjavât fûr e adatât di articui gjornalistics, di tescj leteraris, di saçs e v.i. I argoments sielzûts pal test principâl a son i plui varis: medisine, aministrazion, gjornalisim, sience. La sielte e je fate par peâ a strent l’insegnament de lenghe a une realtât sociolinguistiche concrete. Dopo dal test principâl si cjatin des ativitâts che a judin il student inte comprension e inte riflession di ce che al à a pene let (lis sezions “capìn il test” e “resonìn sul test”). Po e ven une riflession sul vocabolari, di mût di judâ a cjapâ sù il lessic cu la sezion “lavorìn sul vocabolari”. A chest pont il student al è pront par imparâ cualchi regulute gramaticâl, presentade in mût sempliç e lizêr. Dopo al ven il moment pal student di meti in vore il dut cu la sezion “lenghe in funzion”: al è clamât a esercitâsi su la produzion orâl e scrite de lenghe. La unitât si siere cu la sezion “par savênt di plui”, li che il student al è invidât a aprofondî i aspiets frontâts. In cheste sezion si dopre ancje tescj scrits in varietâts locâls, mostrant che la grafie uficiâl e pues jessi doprade cence fastidis par chês.
LA SOLUZION DAI ESERCIZIS E LA VUIDE PAL INSEGNANT_ Intal secont fassicul il student al pues cjatâ la soluzion dai esercizis des 14 unitâts e di chei des sezions di presentazion de grafie e de gramatiche. Ancje la vuide pal insegnant e ripuarte lis soluzions dai esercizis, ma in plui a son zontadis notis didatichis di presentazion une vore interessantis. Simpri inte vuide pal insegnant, si cjatin 36 schedis fotocopiabilis, cun materiâl di rinfuarç e di aprofondiment.
UN IMPREST CHE AL COVENTAVE_ Passant lis pagjinis di “Lenghe”, si à la sensazion di jessi denant di un materiâl che al sta a pâr dai materiâi didatics doprâts pal insegnament di lenghis modernis di grande comunicazion tant che inglês, francês, todesc e v.i. Chest no dome par vie de otime impostazion didatiche e dal grant lavôr di ricercje e di documentazion, ma ancje parcè che la grafiche, la impagjinazion e la sielte des imagjins a son curadis fin tai particolârs plui piçui. In sumis, un strument che al coventave pardabon par une didatiche moderne dal insegnament de lenghe furlane.
Matieu Fogale