Sfuei Mensîl Furlan Indipendent
Archivi de Patrie

ATUALITÂT. Messe grande de Siore Filologjiche

............

ULTIME ORE: come che si previodeve il Consei Gjenerâl al à confermât te sentade dai 20 di Març Lorenzo Pelizzo president de Sff.
Ogni volte che si partecipe a un event targât «SFF» si à la percezion di jessi devant di un rituâl precîs e colaudât. Sì, parcè che e sarà la esperience fate in 90 agns di storie, e sarà la abilitât dai siei president, diretîf, cuadris, i 6 dipendents e ducj i colaboradôrs che a fasin de Societât filologjiche furlane une vere potence (passe 3000 socis; 4 sedis teritoriâls, Udin, Pordenon, Gurize e Tumieç; inseriment te LR 29/2007 pe tutele de lenghe furlane come ent di riferiment pe promozion dal furlan cuntun articul di pueste, unic a jessi stât votât a la unanimitât sedi a çampe che a drete tal grant davoi che al à compagnât la discussion di chê ultime leç; associazion confermade tant che «Istituto culturale di interesse nazionale» dal Ministeri dai Bens Culturâi talian), ancje te ultime assemblee gjenerâl dai socis, no tante zoventût, la impression e je stade la stesse: dut al è lât come che al veve di lâ.
I ULTINS 3 AGNS_ Dai salûts des autoritâts a la elezion pal gnûf diretîf che al varà di rezi la Sff pai prossins trê agns, dut al è lât slis. «Un an memorabil» lu à definît il President Pelizzo. E tra numars al è vignût fûr che la Filologjiche e à sierât il belanç 2009 a passe 900 mil euros: su 556 mil euros di jentradis, 473 mil euros a son i contribûts publics (340 mil euros a rivin de Regjon); il rest e je la cuote patrimoniâl (sedis, apartaments de ereditât Ciceri e altris bens). E vie discorint cun dute la schirie di events, mostris, publicazions, progjets puartâts indevant dal 2007 al 2009.
LA POLITICHE_  Al è stât ringraziât ancje l’assessôr a la culture Molinaro, che a la fin dal 2009, come regâl pai 90 agns, al veve puartât a Gurize la notizie dai 500 mil euros, zontâts ai finanziaments ordenaris anuâi, pe ristruturazion di Palaç Mantiche «La zonte regjonâl e sarà simpri dongje di voaltris» al à dit. Tal so intervent Molinaro al à ancje marcât la impuartance de lenghe furlane e il plurilinguisim «Unic element che vuê al definìs la specialitât de nestre regjon». Al à ancje zontât «Prime di spietâ i intervents dal Parlament e dal Guvier, la cussience di chest valôr e à di rivâ de regjon». Ma plui voltis i è stât fat presint, e che la situazion ancje de aplicazion de stesse LR 29/2007, e no dome de Leç 482/99, e je une vore indaûr, e che i tais de ultime leç finanziarie regjonâl a son stâts di cirche il 20% tes vôs di competence «Ancje se e je la crisi economiche, nol è pussibil che a paiâ a sedin simpri la lenghe e la culture furlane» par bocje dal President Pelizzo. Ma di bande di Pelizzo al è rivât ancje un messaç pal President de Provincie di Udin Pietro Fontanini, che tai ultins timps al veve vût ce dî sul assessôr Molinaro «No si à di smicjâ il singul, ma dute la classe politiche e à di sintîsi responsabil dal avignî dal furlan».
ELEZIONS E MOZION AGOSTINIS_ La riunion si è sierade cu la votazion dai 70 components dal consei gjenerâl (solite modalitât midiant di une liste za predisponude che eventualmentri i socis a puedin modificâ scancelant i nons za scrits e in câs proponi gnovis personis…). Tra i intervents dai socis, si segnale une mozion di Bepi Agostinis, il protagonist di tantis bataiis pal Friûl, massime a pro dal teatri in lenghe furlane, che al à domandât che su lis rivistis «Sot la nape» e «Ce fâstu?», almancul il 50% dai articui al sedi par furlan. Almancul, parcè che no dut ce che al è prodot de Filologjiche al è par furlan: tant materiâl al è publicât dome par talian. Agostinis al à sierât il so intervent sugjerint «Magari si pues domandâ ai tancj che cence pratindi nuie a podaressin jessi dispobii a scrivi e a judâ par vê plui lenghe furlane su chês pagjinis: o vin di recuperâ chel spirt di grande famee e no jessi de bande dome dai «dotôrs», cence nuie cuintri dai «dotôrs»».
NO MOLI_ Cumò il prossin passaç e sarà la riunion dai conseîrs neoelets pe elezion dal gnûf President: Pelizzo al à za dade la sô disponibilitât «Parcè che no mi sint di lassâ cumò che a son in pîts tancj progjets impuartants».
Redazion

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +