ATUALITÂT – Novitâts a la vuide di Radio Onde Furlane

Pauli Cantarut al è di pôc stât nomenât gnûf president de Cooperative di Informazion furlane, che e je proprietarie di Radio Onde Furlane. O vin cirût cun lui di fâ il pont su cheste sô gnove incarghe ma no dome.
Pauli, a son tancj agns che tu sês a Radio Onde Furlane e nol è facil fâ un struc di dut ce che tu âs fat di cuant che tu sês rivât fint in dì di vuê: nus judistu tu?
«O soi rivât a Rof tai prins agns ‘90, in veretât no par fâ radio ma parcè che o jeri il redatôr dal vuestri gjornâl (La Patrie dal Friûl n.d.r.) che in chei agns al divideve la sede cu la radio. Stant che la radio, tant che mieç di comunicazion, mi à simpri plasût, anzit e je stade un dai miei siums di adolessent al è sucedût che dopo cualchi an o ai molât La Patrie par ocupâmi dome dal microfon. Tal imprin o jeri daûr a la redazion musicâl e daspò par un siet agns o ai fat il diretôr dai programs. In chê volte tal palinsest la matine cu la informazion par furlan e il daspò misdì e la sere soredut a base di musiche par talian a devin la idee di doi monts separâts che o soi rivât un pôc a meti adun. Cuant che o ai passât la man de direzion a Mauro Missana lui al è lât indenant su cheste strade ancjemò miôr fin a rivâ ae radio che si pues scoltâ in dì di vuê. Tai ultins agns, oltri a fâ programs radio in vôs, o soi stât daûr a schiriis radiofonichis tematichis su emigrazion e imigrazion, scuele, ambient e v.i. E a lis produzion esternis ae radio: trasmissions radiofonichis e televisivis par altris emitentis, publicazions di libris e discs, a lis cunvignis e a lis rassegnis su la lenghe e la culture furlanis».
Cuale ise la situazion de Cooperative?
«La nestre struture e da lavôr fis a siet personis e a une desine di colaboradôrs ocasionâi ogni an. O crôt che no sedin altris realtâts che a àn fat un investiment cussì impuartant tal cjamp de lenghe furlane. Cun di plui i investiments o scugnìn fâju simpri par vie che une imprese come la nestre par sô nature e à une dibisugne costante di rignuviment tecnologjic. Chest al vûl dî che o sin simpri un pôc sul ôr de precarietât ma cheste situazion no nus fâs pôre par vie che l’ambient dentri e ator de radio al è simpri stât une crosere di ideis, di creativitât, di volontariât che nus sburte di un continui. Progjets a ‘nt saltin fûr un in dì e la nestre storie lu mostre, o sin stâts i prins no dome a fâ radio ma ancje a fâ programs televisîfs di informazion e di musiche, a meti sù un sît in rêt par furlan, a produsi struments linguistics informatics, a produsi discs di musichis che prime a jerin impensabilis par furlan, a miscliçâsi cui gnûfs citadins furlans par fâ programs par radio e television».
Dal vuestri osservatori privilegjât, cemût judichistu il mont dai media par furlan dai ultins agns?
«Dal sigûr tai ultins agns, daspò des leçs di tutele, o vin viodût une incressite de ufierte su radio, television, cjarte stampade e rêt. Une incressite di cuantitât ma no simpri di cualitât, anzit o ai vût mût di scoltâ e viodi robis orendis, fatis di int che fin in chel moment no i à mai freât nuie dal furlan ma dome dai profits o pûr altris, sul «servizi public», che no jerin a la altece dal budget impegnât. Al è facil cussì capî la reson des critichis periodichis che a saltin sui bêçs straçâts pal furlan. Un altri probleme al è che lis emitentis a son dutis un pôc «gjeneralistis» e no rivin a fidelizâ un çocul di public. Noaltris lu vin fat un pôc cul public zovanîl par vie de grande impuartance che al à par lôr il lengaç musicâl ancje tai procès identitaris. Cu la rêt al è diferent, li si puedin meti adun e puartâ indenant miôr lis comunitâts virtuâls e di fat al è li che o ai viodût lis novitâts plui interessantis e vivarosis par furlan dai ultins timps. A chest proposit o vin juste screât il gnûf sît de radio www.ondefurlane.eu. Lait a dâ un cuc».
Christian Romanini