ATUALITÂT – Plui presince des lenghis minôrs tai media

Leint il so prin editoriâl o vin viodude une atenzion pal element linguistic: metint par ordin lis lenghis dal Friûl al à dit «furlan, sloven, todesc e talian». Roberto Pensa nus spieghe cuale che e sarà la sô linie editoriâl e la sô opinion sui media.
Cemût puartaraial indevant su «La Vita Cattolica» la bataie pai dirits linguistics?
Prime di dut riclamant cui di dovê, une setemane daûr chê altre, a une aplicazion puntiliose des leçs di tutele e de promozion des nestris lenghis locâls, massime par ce che al tocje la scuele e la presince intai mass media. Nol è un lus o une straçarie, cemût che al dîs cualchidun, ma un dirit fondamentâl de persone. In secont lûc, il miôr mût par promovi lis lenghis minôrs al è doprâlis di plui, sedi sul setemanâl che in radio e sul web.
Ce pensial de comunicazion sul web e des pussibilitâts pe vuestre testade?
O sin ae vilie di une grande rivoluzion che, intal zîr di cualchi an, e cambiarà la muse dal mont dai mass media. Par chest, tant che prin at de mê direzion, o ai fate la sielte de integrazion complete des redazions di «La Vita Cattolica» e di «Radio Spazio 103», che cumò a àn no dome che un sôl diretôr, ma ancje un unic prin redatôr, la coleghe Erika Adami che e je ancje la referente di tantis nestris iniziativis di comunicazion in lenghe furlane, tant che par esempli il gjornalin par fantaçuts «Alc&Cè». Il fin al è chel di implementâ dutis lis formis di comunicazion multimediâl, sedi par talian che par furlan, tacant dal portâl informatîf diocesan che al opere za tant che un cuotidian di news e che intal 2009 al à passât in abondance i doi milions di pagjinis visitadis.
Digjitâl terestri o miôr la webTV?
Web e terestri digjitâl no son antitetics: a fevelin la stesse lenghe. Duncje lis frecuencis dal terestri digjitâl a varessin di judâ a puartâ la bande largje dapardut e i contignûts dal terestri digjitâl a varessin di implementâsi a vicende cun chei de web tv. Magari cussì no, i interès economics dal president dal Consei e de sô famee a son daûr a prejudicâ la difusion di internet e de bande largje a vantaç di un model di terestre digjitâl a paiament. O sin l’unic paîs dal mont disvilupât là che, par tacâsi al wi-fi libar intun locâl public, par leç tocje fâsi identificâ dal gjestôr cun tant di cjarte di identitât e di codiç fiscâl.
Secont lui, cualis sono lis gnovis formis di informazion plui eficacis?
O crôt tant inte multimedialitât, e il mieç che le garantìs in mût plui diret e zovevul al è dal sigûr il web. La prevedibile grande difusion dal i-pad e dai siei sucedaneis a cost plui bas e cambiarà intal zîr di 4-5 agns il mût di lei libris e gjornâi. Al sarà un passaç tant delicât: di une bande si puedin inricjî i contignûts e ancje lis fonts di informazion; di chel altri però la dibisugne par ducj di lavorâ cul video, cui coscj relatîfs, e riscje di meti al margjin lis realtâts informativis plui debilis e mancul struturadis.
Lui al è ancje diretôr de radio: ce prospetivis viodial par chest medium?
Di une bande la radio e larà indenant simpri a jessi chel che e je vuê: il mieç principâl di informazion e svagament par cui che al è in moviment o par cui nol pues dedicâ lis energjiis e la atenzion necessariis par lei un gjornâl o par passâlu cul i-pad. Di chê altre bande, la multimedialitât e da gnove linfe e impuartance ai contignûts audio. Aromai tra «la Vita Cattolica» e «Radio Spazio 103» no son plui confins redazionâi e il teren comun al è il web. Il gjornalist al fâs un servizi e lu fâs in trê formis: cuotidian radio, cuotidian web e aprofondiment cul setemanâl. E doman, cuissà, o varìn ancje la web tv diocesane! E no je dome une batude…
Ce pensial di Sapade in Friûl, stant che al è za un paîs de Diocesi di Udin?
In democrazie al decît il popul, e la int di Sapade plui voltis e à dit cemût che le pense: e desidere lassâ il Venit e unîsi ae Regjon Friûl-Vignesie Julie. A fevelin clâr i risultâts referendaris dal passât e il «pols» atuâl de opinion publiche sapadine. Ma par capî cetant che al sedi inlidrisât chest sintiment, il governadôr dal Venit, Luca Zaia, al varès vût di jessi presint ae visite pastorâl resinte a Sapade dal Arcivescul di Udin, bons. Mazzocato, o ae jentrade dal gnûf plevan, l’udinês don Michele Molaro. Ocasions là che si podeve tocjâ cun man il leam storic, culturâl e afetîf dai sapadins cul Friûl. Nol je dome une cuistion di finanziaments, come che al continue a dî cualchi superficiâl.
Christian Romanini