Cincuantecinc agns e une lungje vite tra politiche, musiche, art, gjornalisim, impegn civîl e diplomazie, simpri di om libar lontan di etichetis e di cjacaris. Franco Juri, un fi dal Alt Adriatic, nassût in chê Cjaudistrie che e cjale un mâr che al pâr un lât, strent jenfri il Cjars, la Lagune di Maran e sul sfont il Plancjaval e lis Prealps Cjargnelis.
Une gran biel ridi, une vôs salde e voi creatîfs nus dan acet a Lubiane tal Parlament, a pôcs dîs dal vincjesim aniversari de nassite de Republiche di Slovenie.
Franco Juri, mame cravuate de regjon di Flum, pari furlan di dongje Cividât, cressût intune Jugoslavie “speciâl”, chê de dimension istriane, dulà che i cognons, lis lenghis e i toponims si componin, si scomponin e si tornin a componi une altre volte daûr dal aiar storic e politic che in cierts moments, tant che une brise lizere, al pues intiziâ grandis gjondis e in altris, tant che une buere nere, penis insanabilis.
LEAMS FURLANS_ Juri al è cressût intune Istrie dulà che lui stes al ricognòs “tant humus furlan”, che al à tacat a stratificâsi secui e secui passâts cu la emigrazion promovude di Vignesie e da la Austrie e che si è zontât a une lenghe che prime de venetizazion e jere romaniche, di Triest a Rovigno, de zone di Cjaudistrie al dignanês dulà che inmò cumò si fevele che istroromanic siôr di elements associabii al furlan.
Chel di Franco cul Friûl e cul furlan al è un leam paterni, mai lât al mancul. Di frut, al scoltave la cjacarade dal pari cun chei altris compagns partigjans garibaldins, operaris e inteletuâi emigrâts dopo il ’45 in chê Jugoslavie Socialiste sium di avualance, solidarietât e libertât, lât in sclesis par tancj di lôr tal 1948 cu la roture Tito – Stalin. Di sô pari, de resistence, dai fats di Porçûs e dal so leam cul Friûl nus fevele Franco tal so libri “Ritorno a Las Hurdes”, che al merte la presince tes nestris librariis.
ESPERIENCE DIPLOMATICHE
E POLITICHE_ Juri, che vuê al è deputât ae Cjamare di Stât pal partît “Zares – Nova Politika”, al à vivût i ultins trente agns di protagonist tra la Slovenie e il mont tant che ambassadôr in Spagne e a Cuba, e po segretari di stât dal forest. Impuartante e je stade la esperience dal “Gruppo ’88” pe democratizazion di une Jugoslavie ormai inanimade, dulà che i acits dai nazionalisims a varessin in curt tornat a vierzi plaiis mai sieradis. Tal ’91 al à vivude la nassite de Republiche di Slovenie cun «Ategjament critic e difident, stant che denant dai grancj cambiaments storics o ai miôr di tignî une cierte distance». Cundut achel, Franco al à poiade al Slovenie libare e al è stât un di chei che a àn scrite la sô Costituzion: «La Slovenie e il so cjaminâ viers la indipendence (..,), la uniche alternative che nus vignive dade tal caos proponût di Slobodan Milosevic, un caos no dal sigûr democratic, no dal sigûr rispietôs des diviersitâts. Duncje no jere altre soluzion che la indipendence, tant che garanzie di democrazie. Cheste indipendence si basave sul concet democratic dal Stât e su la ambizion di integrâsi ae U.E. Chestis dôs condizions a àn limitade la cariche nazionaliste dal moment, che in cierts ambients e bramave al batisim de nazion cul sanc».
TOLERANCE E MULTICULTURALITÂT_ I mîts che no si puedin tocjâ, i nazionalisims retorics e lis xenofobiis che a tornin a sflorî in chest periodi di crisi politiche economiche, a àn simpri conturbât Juri, pacifist convint e persone puartade al dialic e ae cognossince vicendevule. «La Europe e à di jessi fate sù dì par dì cun convinzion li che un al è a stâ, cui vicins che al à plui dongje»: cun Juri o sin in acuardi che la globalizazion e l’individualisim a limitin la cognossince e a favorissin la intolerance. Vuê, nus dîs Juri: «Par tornâ a promovi i nestris teritoris preseâts dai turiscj di dut il mont pe bielece dai lôr paisaçs e pe lôr varietât culturâl, o vin di incressi la colaborazion tra minorancis, sburtâ pal multilinguisim tes scuelis, potenziâ i traspuarts publics, favorî la cooperazion, la cogjestion, i zimulaments, i scambis culturâi, superâ lis gjelosiis e lis divisions che a fasin prevalê in maniere inesorabile lis fuarcis centralistichis daûr de antighe filosofie dal “Divide et impera”. La int no je spaventade dal rispiet e de tutele des minorancis, ma in condizions di crisi sociâl e economiche al è il pericul che piçui grups che vuê a scancelin i toponims slovens a Triest, chei talians in Istrie o chei furlans in Friûl, a puedin cressi. Lis autoritâts e i opinion maker a àn di esaltâ la fuarce dal multiculturalisim e dal rispiet dal diviers, parcè che il multilinguisim al è la fuarce de Europe e se pûr al è just vê lenghis convenzionâls, al è dificil che une lenghe e rivi mai a sostituî la intimitât, la bielece e la ricjece des lenghis locâls: dal duâl sloven, al furlan cu la sô vene che e ricuarde la storie di dutis lis lenghis romanichis. Scoltant il furlan o scoltìn la storie des nestris tieris di Aquilee indenant: pierdi chestis lenghis al sarès une pierdite culturâl ireparabile. Ogni paîs al à di curâ chestis realtâts che po tant piçulis no son!».
UNE FAMEE PLURILENGÂL_ In conclusion, Franco nus conte che sô mame e fevelave par cravuat, so pari par furlan e in cjase la lenghe francje e jere il venit: une prove vive che multiculturâls in Istrie e in Friûl a jerin prime che il stes tiermin al fos inventât e promovût dai sociolics! Franco Juri al à mantignude une empatie particolâr cul furlan: al lei vulintîr e al capìs tant ben la marilenghe che al à fate pôc timp fa une interviste cun Mauro Missana su Radio Onde Furlane. I siei leams cul Friûl a son strents: la sô femine e je dal Cuei/Brda e, lant a cjatâ i parincj, no mancje mai une zirade par Cividât.
Apontaments / Tarcint, Vinars 6 di Setembar aes 18, Presentazion dal libri “Feminis furlanis fuartis” di Erika Adami te terace de Biblioteche Comunâl
Redazion
L’apontament si tignarà doman, Vinars ai 8 di Mai, aes 18, te terace de Biblioteche Comunâl, vie Divisione Julia a Tarcint. La Aministrazion Comunâl di Tarcint cun la Comision de Pari Oportunitât nus invide ae presentazion dal libri di Erika Adami “Feminis furlanis fuartis” che viodarà la partecipazion di une protagoniste dal libri e de […] lei di plui +
L'EDITORIÂL / LETARE AL GNÛF VESCUL. LA LEZION DI AQUILEE NO VA DISMENTEADE
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
L’EDITORIÂL / Letare al gnûf Vescul la lezion di Aquilee no va dismenteade
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin
Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +